Festival Moutya - En sans pour agrandir ou konnesans lo moutya |02 July 2016

Moutya, sa lanmizik, sa ladans, sa fason eksprimen ki’n ne Sesel pe ganny promote atraver en lo edisyon Festival Moutya ki ti lanse yer.

Festival Moutya ti ganny inisye par Lasosiasyon Mizisyen Seselwa (SeyMas) an Zilyet 2012 e pour mark son katriyenm lanniverser, sa manifestasyon pou dir pandan trwa zour avek bi pour kontinyen promot, sovgard e propaz sa zanr lanmizik parmi nou pep, e pour ki SeyMas i osi aport son kontribisyon anver demars pour Unesco rekonnet nou moutya.     

Louvertir ofisyel sa festival ti konmans avek en latelye kot Domaine de Val de Près organize par Msye Patrick Victor anba Patrick Victor Cultural Foundation an kolaborasyon avek SeyMas, Konsey Nasyonal pour Lar (Nac) ek Fon Leritaz Nasyonal Sesel.

Tyermenn SeyMas, Jean-Marc Volcy, ti fer lapel avek okenn dimoun ki pa neseserman en mizisyen me plito annan en lanmour pour lanmizik pour zwenn zot lasosiasyon pour donn koudmenm ede lev nou lanmizik e gard li vivan.

“Ozordi nou kapab dir ki moutya i la e i an bonn sante, me i annan bokou travay ki bezwen ganny fer pour edik nou bann zenn zenerasyon e anmenmtan montre bann zenn mannyer pour fabrik tanbour moutya pour li kapab reste toultan la,” i ti dir.

I ti dir ki sa latelye in ganny organize pour ankouraz sa ki anvi aprann e ganny plis konnesans i ganny sa sans pour aprofondi li lo sa size moutya.

I ti remersye tou bann partener ki pe ed SeyMas dan sa parkour.

Msye Victor ti dir ki bi sa latelye ti osi pour fer levanter pour konnen lekel ki ankor konn sa vre moutya, lekel ki ankor konn zwe, sante, danse e sirtou konnesans lo lafason ki tanbour moutya i ganny fabrike.

“I enportan ki nou retourn lo nou vre moutya akoz nou vre moutya i pa en ladans sovaz, tou lekontrer i en zafer ki sakre. Sa son moutya ti geri dimoun ziska pa tro bokou lannen pase dimoun La Digue ti konn sa sekre,” i ti dir.

Msye Victor ti osi dir ki bann rankont pou ganny fer dan bann vilaz kot zot pou zwenn bann gran met moutya pour konnen lekel ki ankor annan konnesans lo lafason ki sa trwa tanbour moutya i zwe pour fer ki ava kapab montre zenerasyon ki pli zenn.

Prezan pandan sa latelye ti bann sef egzekitif, mizisyen, danser, artis, enstrikter ek ansennyan lanmizik, serser, aktivis kiltirel ek bann dimoun ki enterese avek moutya.

Pour kontiny selebrasyon tanto aparti 7er en sware moutya ‘Otour Dife’ pe ganny organize an kolaborasyon avek Berjaya Beau Vallon Bay Resort & Casino.

Sa aktivite pou enkli boufe kreol, lanmizik tradisyonnel (live band), spektak par artis lokal renonmen, moutya otour dife e en disco kreol.

Aparti trwazyenm zour piblik pou kapab apresye, defoule e eksprim zot santiman atraver ‘Lenfizyon moutya’ kot Asian Fusion Restaurant,(ex-Ty Foo) Au Cap. Avek en disco kreol pli tar dan la sware ki kout zis R50 larantre, sa a permet SeyMas ranmas en pti fon pour ed li anver bann depans lozistik ek artistik.

Pou annan bann fasilite tel ki manze, twalet ek servis bar.