Marguerite Hoareau i selebre 106-an |12 July 2016

Madanm Marguerite Hoareau ti fet son 106enm lanniverser Dimans dan en pti seremoni spesyal kot son lakour St Louis dan prezans manm fanmir, vwazen ek zanmi.

Madanm Hoareau i annan set zanfan – kat i ankor vivan (Georgette, Ginette, Harry ek Cecile) tandis ki trwa garson (Evan, Gilbert ek George) in mor.

I annan li plis ki 20 pti zanfan, e zot menm pa asire konbyen aryer pti zanfan i kapab annan.

Ladministrater distrik (DA) St Louis Rachel Joseph ti prezant sa santener avek en pannyen sorti kot Prezidan James Michel e ladan i annan bann keksoz ki i pou kapab servi dan son bann bezwen toulezour.

Madanm Joseph ti pas swe Prezidan Michel avek li, ki i ava pas en bon letan pour son 106-an.

Per David Alcindor ti selebre en pti lanmes spesyal pour Madanm Hoareau pour ki bondye ava kontinyen donn li lavi ek lasante.

“Madanm Hoareau in ganny sa sans pour li viv sa long letan e nou bezwen remersye Senyer pour sa lavi ki i’n donn li, sa lavi ki i ankor pe donn li e nou priye pour ki i donn li ankor lasante, i donn li ankor lavi ziska limenm li i ava deside pour apel Madanm Hoareau pour vin anler pour vin partaz son lazwa,” i ti dir.

I ti osi fer resorti ki petet sa pwisans pour viv lontan i en gene dan disan lafanmir vi ki manman Madanm Hoareau (Aline Amelie) ti viv ziska 109-an e son ser (Furzencia Amelie) ti ariv 100-an.

Madanm Hoareau, ki byen kontan manz gato bannann, ti dir ki i santi li ere malgre ki son latet i fatige.

“Mon pa ti pe ekspekte pour ariv kot mon ete ozordi, mon byen kontan,” i ti dir.

“Mon’n byen viv mwan, pour tou sa ki mon’n pas ladan. Bann zenn konmela pa parey lontan, mon fatige donn zot mesaz me zot pa tande,” i ti dir.