Follow us on:

Facebook Twitter LinkedIn YouTube

Archive -National Assembly

Eleksyon Lasanble Nasyonal |21 July 2016

SPM i konfidan ki i pou ganny en syez proporsyonnel 

Msye Francourt, akonpannyen par Msye Rath ek Msye Larue, pandan konferans avek lapres yer

Nouvo parti politik Seychelles Patriotic Movement (SPM) i deza annan reprezantan pour 24 distrik ki’n pare pour sa eleksyon Lasanble Nasyonal ki pe aprose e zot konfidan ki zot pou ganny enn ou de syez proporsyonnel.
Se lider sa parti Regis Francourt ki ti dir sa pandan premye konferans lapres ki sa parti ti fer kot Chilli Bar, La Louise yer apremidi.

Osi prezan ti de manm egzekitiv SPM – sekreter zeneral Vincent Larue ek trezorye Jerry Rath.
Msye Larue ek Msye Rath ti travay avek Lalyans Seselwa oparavan e zot in deside zwenn sa nouvo mouvman dirize par Msye Francourt.

SPM ti resevwar zot sertifika lanrezistreman le 12 Zilyet e aprezan zot legalman kapab fer bann loperasyon.
Msye Francourt ti fer resorti ki retar ki zot in gannyen pour resevwar sa sertifika in fer ki zot pa’n ganny ase letan pour prepar zot parey bann lezot parti e malgre ki zot ti lo teren pour enpe letan, i annan serten keksoz ki zot pa ti pe kapab fer.

I ti osi dir i konfidan ki SPM pou ganny enn ou de plas proporsyonnel dan lasanble pour sa prosen eleksyon parlmanter.
“Nou konfidan dan sans ki nou lo teren e tou nou bann kandida i lo teren pe koz avek bann dimoun toulezour e en kantite bann siporter Lalyans Seselwa pe ofer nou zot sipor. En kantite ki ti avek Msye Pillay lo teren pe aprezan travay avek nou. Mon krwar ki i annan serten landrwa ki nou annan bon sans gannyen me mon konnen sa i difisil pour zot krwar,” i ti dir.

I ti dir ki sa i akoz direksyon ki Lalyans Seselwa in pran son bann siporter pa ti anvi swiv.
I ti dir ki si i ganny sa plas dan lasanble i oule fer en diferans dan prosesis demokratik.
“Pour konmanse nou’n dir ki nou manm Lasanble Nasyonal (MNA) pa pou vin pran lord avek mwan konman lider sa parti. Ler i vin dan lasanble i vin reprezant pwennvi sa bann dimoun dan distrik savedir sa i fors sa MNA pour sak fwa ki i annan en key vote dan lasanble i bezwen al koz avek bann dimoun pour rod zot lopinyon avan ki i vin vote akoz ki nou’n annan la i bann MNA ki’n vot pour zot prop lekor,” i ti dir.

En lot priyorite se pour retir divizyon e osi fer desann pri lavi atraver redwir pri manze akoz Sesel i enn bann pei pli ser dan lemonn.

I ti azoute ki son bann siporter i sorti dan tou parti tel ki Parti Lepep, SNP ek Lalyans Seselwa.
“Fodre realize ki SNP in sorti lo en nivo 46% e zot in desann dan dernyen eleksyon pour ariv 35% e i vreman kler ki sa parti i lo en decline, e sa bann siporter pe rod en lot brans pour zot vin apoz lo la akoz zot pa kontan avek direksyon ek lentonasyon ki sa parti pe prozekte,” Msye Francourt ti dir.

Lo bann diferan alegasyon ki pe ganny fer kont Msye Francourt i ti dir ki i pa fatig li avek sa akoz i pa vre.
“Sa ki mon dir avek mon tim se reste ‘focused’ akoz sa se bann pti distraksyon. Zis parey si ou anvi fer en keksoz lo kote gos i annan lisyen ou pran de trwa lezo ou anvoy lo kote drwat e zot tou zot tay laba. Pa bezwen ganny distrer akoz nou annan en travay pour fer e eleksyon pa ganny lo Facebook, eleksyon ou ganny lo teren; ou bezwen al tap laport e koz avek dimoun menm si sa dimoun i vot ver, ble ouswa zonn pa fer nanryen akoz i annan menm problem li osi,” i ti dir.

Mesaz pour sitwayen Seselwa se: “Nou pei i bezwen bouz devan e pour fer sa nou bezwen annan en serten nivo linite antre nou e an se moman nou pe vwar ki menm si dimoun i koz lo linite, dan larealite i pa egziste. Nou dan en pei ki divize e mon krwar in ariv ler nou tir enpe sa divizyon.”
SPM pou organiz en konvansyon le 6 Out.

» Back to Archive