Komisyon Eleksyon i enform Linyon Sanzman ki i pa kapab servi sa non |05 August 2016

Komisyon Eleksyon in ofisyelman enform Linyon Sanzman ki i pa kapab servi sa non.

Sa in vin atraver en let date le 3 Out 2016 ki tyermenn Komisyon Eleksyon Hendrick Gappy in anvoy kot lider sa parti politik, Martin Aglae.

Dan sa let, Msye Gappy in fer referans a lord ki Ziz Lakour Siprenm Bernardin Renaud ti fer sorti Lendi pase, konmkwa ki okenn parti politik pa kapab servi sa non ziska ki tou dispit otour sa non in rezourd.

Sa in vin apre ki Linyon Demokratik Seselwa (LDS) ki ti’n konteste dezyenm tour eleksyon prezidansyel anba Linyon Sanzman an Desanm 2015, ti’n fayle en petisyon an kour kont lanrezistreman en lot parti anba sa menm non.

Msye Aglae in sepandan dir ki malgre sa lord lakour e malgre let ki Msye Gappy in ekri li, son parti pou kontinyen servi non Linyon Sanzman e ki i menm annan lentansyon konteste eleksyon lezislativ ki pou fer le 8, 9 e 10 Septanm anba sa non.

Dan en konferans lapres ki ti fer kot son biro lo Laveni Revolisyon yer, Msye Aglae ti ensiste ki se sa menm tyermenn Komisyon Eleksyon ki’n siny son let ki ti osi siny sertifika lanrezistreman son parti e ki sa i fer li legal e lezitim.

«Nou pa pou propoz en lot non akoz Gappy ki ti aprouv sa non,» Msye Aglae in dir.

In azoute ki Komisyon Elektoral pa’n zanmen enform zot ki i annan en ka an kour e ki Msye Gappy in plito refize pour koz avek zot.

Sa, i dir, i montre ki “Gappy i kontradir son lekor dan diferan fason e i montre ki Gappy pa fit”.

An konsekans, Msye Aglae in dir ki i pe al ekri lezot parti dan lopozisyon pour demann Msye Gappy ek Komisyon Eleksyon pour demisyonnen.

An se ki konsern zizman Ziz Renaud, Msye Aglae in dir ki “lakour in pran en sel kote” dan sa zafer e ki i pou anmenn en ka devan Lakour Konstitisyonnel pour demande ki sa desizyon i ranverse. In azoute ki i pou osi anmenn en lot ka devan sa menm lakour pour konteste serten keksoz dan lorganizasyon eleksyon ki pe vini.

Son lot opsyon i dir se pour demann son bann siporter pour desann dan semen pour proteste.

I azoute ki zot in deza fer sa sa semenn kan en group 25 dimoun ti al kot Kordgard Santral pour demande pour vwar Komisyonner Lapolis, apre ki i ti’n refize donn zot permisyon pour fer en manifestasyon kont Komisyon Eleksyon.

Lo kestyon en zournalis konmkwa konteste e refize aksepte en lord lakour i en aksyon ilegal ki kapab rezilt an larestasyon e prosekisyon, Msye Aglae ti reponn ki sanmenm sa ki i anvi akoz i pa’n ganny sans eksplik pozisyon son parti.