Eleksyon Lasanble Nasyonal - Linyon Sanzman pe partisip dan prosen eleksyon anba en nouvo parti politik |17 August 2016

Lider parti politik Linyon Sanzman Martin Aglae in dir ki son parti pou pran par dan prosen eleksyon Lasanble Nasyonal anba en nouvo parti politik ki’n fek formen apele Lafors Sosyal Demokratik (LSD).

Sa i menm si i’n ganny en let konfirmasyon yer bomaten sorti kot Komisyoner Eleksyon Hendrick Gappy konmkwa zot kapab partisip dan sa eleksyon konman Linyon Sanzman.

“Lefe ki sa let in vin en zour avan Dat Nominasyon ki ozordi, nou konman en parti politik ki serye nou ti pran serten mezir pour adres sa bann sitiasyon. Enn sa bann mezir se ki nou’n ouver en nouvo parti politik ki apel Lafors Sosyal Demokratik (LSD) ki pe ganny dirize par Msye Jimmy Gabriel.

“Nou ankor Linyon Sanzman e nou reafirm nou langazman ki Linyon Sanzman i egziste dapre dokiman ki nou’n gannyen sorti kot Komisyon Eleksyon ki’n konfirmen ki nou Linyon Sanzman. E mon konman lider Linyon Sanzman ansanm avek manm egzekitiv parti nou pe donn ‘full’ sipor LSD. Konman en parti lopozisyon ki serye, dan sa eleksyon nou pe al partisip anba Lafors Sosyal Demokratik (LSD),” Msye Aglae ti anonse.

Msye Aglae in osi devwale ki slogan sa parti pour eleksyon Lasanble Nasyonal i  ‘Fer li Nou Lasanble’.

Msye Aglae in dir ki ouver sa nouvo parti politik, LSD, ti zot dezyenm opsyon an ka ki Komisyon Elektoral ti tarde pour donn en ‘ruling’ lo si zot kapab servi Linyon Sanzman oubyen non.

E se selman yer bomaten ki Msye Gappy ti enform zot atraver en dokiman ki dezormen se zot Linyon Sanzman e ki zot kapab partisip dan sa eleksyon konman Linyon Sanzman.

“Demen (ozordi) bomaten nou pou soumet nou bann laplikasyon kot Komisyon Eleksyon; bann billboard pe deza ganny fer konman LSD. LSD ek Linyon Sanzman pou prezant son komite egzekitiv demen (ozordi),” Msye Aglae ti dir.

“Konman LSD nou’n deside pour nou zwenn ansanm avek Linyon Sanzman pour konteste sa eleksyon ki pe vini. Napa nanryen ki pou anpes nou partisip dan sa eleksyon avek Linyon Sanzman. Akoz sa kantite letan ki Komisyon Eleksyon in pran pour donn en larepons Linyon Sanzman, nou ti bezwen trouv en lot opsyon pour partisip dan sa prosen eleksyon,” Msye Gabriel, lider LSD, in dir.

Msye Gabriel in dir ki son parti i annan son ban manm egzekitiv, komite ki pare pour travay for pour fer zot lavwa tande.

Caption:

Msye Gabriel (a gos) avek Msye Aglae pandan konferans avek lapres yer