Follow us on:

Facebook Twitter LinkedIn YouTube

Archive -National Assembly

Lasanble Nasyonal - Nouvo Spiker i dir sa responsabilite pa pou afekte son travay konman MNA Anse Boileau |29 September 2016

 

Nouvo Spiker Lasanble Nasyonal Msye Patrick Pillay in asir bann dimoun Anse  Boileau ki’n elekte li konman zot reprezantan dan Lasanble ki menm si i annan responsabilite konman spiker i pou osi kontinyen travay pour zot dan distrik parey in promet zot.

« Mon bezwen organiz mon letan konman spiker e MNA elekte pour Anse Boileau pour mwan travay pour zot osi. Sa i en kestyon lorganizasyon e byen definir mon lanplwaditan, » Msye Pillay in dir.

« Koman Spiker i mon devwar pour egzers mon travay avek tou enparsyalite. Mon pou ekout tou dimoun, mon pa pou regard partisan politics dan Lasanble. Nou pou regard lentere nasyonal, » Msye Pillay ti dir dan en entervyou apre ki i ti’n pret serman konman manm Lasanble e osi konman Spiker sa lenstitisyon pandan 1er sesyon nouvo Lasanble Nasyonal Mardi bomaten.

Swivan rapor ki i annan plizyer travayer sekretaryat Lasanble ki pe aret travay avek sa lenstitisyon prosennman, Msye Pillay i dir in koz avek serten parmi zot e in konstate ki bokou in fer referans a bann kritik ki zot pe sibir atraver medya sosyal. Me kontrerman a sa nou’n aprann ki i annan bokou presyon osi sorti kot parti bann nouvo veni dan Lasanble ki pe fer kler ki zot pa anvi travay avek sa bann dimoun e ki zot annan zot dimoun ki zot ti a swete anmennen pour travay avek.

Lo son kote Msye Pillay, menm si i’n eksprim dezapwentman lo lefe ki sa bann dimoun pe aret travay e demann dimoun ki servi medya sosyal pour servi byen sa teknolozi e pour respe dimoun, in osi admet ki i annan dimoun ki ti deza travay avek Lasanble Nasyonal ki’n eksprim dezir pour retournen.

Msye Pillay in dir ki menm si klark lasanble i parmi sa bann staf ki pe kit sa lenstitisyon, i pou kontinyen dan son fonksyon ziska lafendimwan antretan ki demars i fer pour ranpli sa bann plas vid.

Nou ava rapel ki dan son 1er diskour apre ki i ti’n sermante konman Spiker, Msye Pillay ti felisit Spiker sortan Dr Patrick Herminie ek son lekip pour sa ki in apel en Lasanble avanse e modernize avek prosedir ek striktir ki a permet anmenn li lo en lot nivo.

Spiker Pillay ti osi dir ki i annan en rev ki bann zanfan ek pti zanfan Sesel i kapab viv dan en pei kot i annan laliberte e kot Seselwa i gard zot latet anler avek lafyerte e dignite e dir ki «mon en Seselwa e mon fyer mon pei ».

Me pour ki sa rev i vin vre, i ti azoute, fodre garanti drwa tou Seselwa e asire ki tou Seselwa i annan menn drwa e ki sa i vedir aret viktimizasyon e kre en nouvo lepok lanmour e en desten pli zis e pli briyan pour kanmarad.

Msye Pillay ti ensiste ki san bann pratik demokratik, latransparans e bonn gouvernans dan sekter piblik osi ki prive pou napa devlopman, e se la kot Lasanble i antre pour fer sir ki legzekitif i travay dan lentere lepep e non pa lentere personnel.

«Mon donn tou Seselwa en langazman ki nou pou travay san ses pour retourn nou pei lo bon semen. Sa i nou misyon sakre. I nou devwar pour travay dir pour anmenn nou sosyete lo en nivo kot i a an bonn sante. Nepli tan pour nou montre ledwa lo kanmarad. In ariv ler pour nou tyonbo lanmen kanmarad e fer nou rev pour en Sesel performan e prosper vin en realite,» nouvo Spiker ti dir.

I ti koz lo linite nasyonal ek rekonsilyasyon kot i ti dir nou pa devret per laverite e ki i pou plito liber nou lespri ek nou konsyans. Sa, i ti azoute, pa en fason rod revanz me plito gerizon ki a anmenn pardon, linite ek lape. I ti limenm ofer son pardon pour okenn dimoun ki i’n kapab ofanse dan son parkour politik e pardonn bann ki’n ofans li.

«Pardon e pardonnen i en size tre sansib pour bokou nou. Pardonnen pa sitan fasil, me pa pardonnen i osi anprizonn nou lespri, nou leker ek nou konsyans. Pa pardonnen i osi anprizonn bann ki pe esper sa pardon. Nou dan sa 6enm Lasanble Nasyonal nou bezwen montre legzanp e gid nou bann kositwayen lo sa semen pardon. Mon pran sa lokazyon pour dir ki si dan mon long parkour profesyonnel ek politik mon’n konsyaman ouswa non konsyaman bles ou ofans personn, mon demann zot en pardon. Egalman pour tou bann ki’n bles mwan ek mon fanmir konsyaman e non konsyaman, mon ofer mon senser pardon,» i ti dir.

 

 

 

» Back to Archive