Reaksyon bann manm lo diskour Prezidan Faure devan Lasanble Nasyonal Mardi: |21 October 2016

Lider Zafer Gouvernman dan Lasanble Nasyonal Charles Decommarmond ti yer osi donn son larepons a diskour ki Prezidan Danny Faure ti fer dan Lasanble Mardi.

Onorab Decommarmond ti komans par akei diskour prezidan avek sa ki i ti dekri konman en lazwa. Se osi avek lazwa ki i dir in ekout Sef Lopozisyon Wavel Ramkalawan sa ki i dir «i nouvo fason e lespri ki i’n vin avek » an presizan ki « se serten pwen ki i’n vin avek ki pou permet nou al annavan ».

«Pei i pli gran ki nou tou e si nou ekout kanmarad personn pa pou sourd lo personn, » i ti dir.

I ti azoute ki zot «pa kapab dezapwent lepep Seselwa ki’n donn nou sa kalite Lasanble ».

I ti osi byen akei lapros Prezidan kot i pe zwenn bann partner e dyalog avek zot.

«Se atraver dyalog ek sizesyon ki nou pou al annavan », i ti dir.

Msye Decommarmond ti donn legzanp Komite Finans ek Kont piblik dan Lasanble ki pe zwenn avek  Minis Finans avan ki en bidze siplemanter i pase dan Lasanble. Lasanble pa kritik minis me i travay avek li, i ti dir, e sa i pli bon fason pour al annavan.

I ti osi koz lo Lartik 55 Konstitisyon kot i ti dir i kontan ki sa diskisyon lo «pas baton » pe pran plas. I ti azoute ki kestyon se ki mannyer pour fer lo sa size e osi pour rezourd kestyon vis-prezidan ki ganny elekte avek prezidan.

I ti azoute ki revi ki pe fer dan bann minister i osi enportan, kot bann minis i devret fokaliz lo polisi, e ladministrasyon lo lezot keksoz. Pour sa, i ti donn donn legzanp Minister Ledikasyon ek Minister Lasante.

«Koumsa servis a ganny desantralize e ariv kot kominote dan pli bon fason posib, » Lider Biznes Gouvernman ti osi presize.

Anmenmtan, i ti azoute ki fodre revwar serten polisi ek lalwa pour fer sir ki lepep i ganny pli bon servis. Par egzanp, i ti dir, fodre revwar ler ki bann biro i ouver pour kapab servi tou dimoun dan bann ler ki zot pa pe travay, parey dan midi.

Lo sitiasyon lakaz, ki i dekri konman en gro problenm e petet problenm limero enn Sesel, i ti dir ki nou pa pou kapab rezourd li akoz i annan toultan plis demann e serten dimoun pa kapab kontribye pour zot lakaz. Eski sa bann dimoun pa kapab ganny en lakaz, i ti demande, an ensistan ki nou devret vin pli zis dan alokasyon lakaz.

I ti azoute ki i annan serten striktir gouvernman ki blok demars en dimoun pour ganny son prop lakaz. Par egzanp, kot polisi gouvernman pa permet paran partaz later an pti porsyon a zot zanfan e en dimoun pa kapab ganny en loan akoz i’n garanti en paran ou sa paran i annan en pti aryeraz lo son loan. I ti osi demann Labank Santral ek bann labank komersyal pour revwar sa.

Lo kote ‘Security Clearance’, Onorab Decommarmond ti dir ki parfwa i annan bon rapor sorti kot Lapolis me ki en lorganizasyon i fer sa aplikan malis e pa anploy li. I ti azoute ki i osi annan dimoun ki profite pour rod en lot plas travay ler in konmet fot dan en travay presedan e son kes pa ankor fini zize e son rikord i ankor an prensip prop.

I ti eksprim son sipor pour Onorab Ramkalawan lo Komisyon kont Vikmitizasyon e i ti demann Spiker Lasanble Patrick Pillay pour diriz sa komisyon. I ti dakor ki bann sef egzekitif i devret osi deklar zot byen e ki plas lo bann bord i ganny partaze e kot en dimoun i kapab asiz lo zis de bord. Sa, i dir, a permet plis profesyonnel pour partisipe e donn plis letan sa bann manm pour fer zot travay.

Msye Decommarmond ti dir ki serten lalwa i apartenir a serten lepok e ki dan sa enn nouvo, serten lalwa e polisi i devret sanze pour kapab reponn a bann nouvo legzizans lepep. Lo en not zeneral, i ti dir ki Lasanble i bezwen mazin pli lwen ki sa ki Prezidan e demande pour ranforsi serten lalwa, polisi ek lenstans dan nou pei.

Lo sitiasyon drog, i ti dir ki sa i en problenm serye e ki rol bann lenstans parey Gard Lakot ek NDEA i devret ganny revwar. I azoute ki zot devret kapab aret bann bato ki paret napa destinasyon e bann peser ki al lapes pandan de semenn e pa retourn avek pwason. Koripsyon, i dir, i permet reveni pour pa ganny ranmase e i ti donk dakor ki larzan dan bann tranzaksyon komersyal fodre pas par labank. I ti azoute ki Komisyon Reveni i plito tay lo bann pti biznesmenn olye lo bann gro biznes.

Lo problenm drog, Lider Biznes Gouvernman ti fer rapel ki tou le zour  i annan bann toksimann pe ‘kick’ dan peron bann housing estate. I ti dir ki nou bezwen trouv en solisyon e esey met sa bann dimoun dan lanplwa.

I ti osi adres size lazistis sosyal kot i dir ki parfwa sa ki devret ganny lasistans pa gannyen.

«Nou pa pou kapab kontinyen koumsa, avek sa sitiasyon ki pe kit nou deryer e pe anpay nou, » i ti soulinyen.

Msye Decommarmond ti dir ki Lasanble pe fer en lapel pour ki travayer i vin pli responsab e delivre servis san met politik ladan.

I ti osi azoute ki i pou siport Lalwa lo Laliberte Lenformasyon, ki i dir i devret ariv devan Lasanble byento. Apard sa problenm ekout telefonn, i azoute ki sa lalwa pou osi bezwen adres size medya sosyal.

Onorab Decommarmond ti dakor ki parol i ganny mete an aksyon. Me i ti osi ensiste ki fodre donn sipor Prezidan Faure ek son lekip pour ki sa bann keksoz i kapab arive. I ti donk demann Lasanble Nasyonal pour donn sipor nouvo lekip Prezidan pour ki i kapab anmenn sa ki i’n promet e donn nou pei en pli bon lavenir.