Minis Benstrong i dir SFA i lo bon semen |22 November 2016

“Mon krwar Lotorite Lapes Sesel (SFA) i lo bon semen. Avek sa bann planifikasyon ek bann keksoz nou kapab met anplas o pli vit posib, mon santi ki SAF i ava ariv lo sa nivo ki nou ti ava swete i ete.”

Se Minis pour Lagrikiltir ek Lapes Michael Benstrong ki ti fer sa deklarasyon apre ki i ti’n vizit headquarters SFA lo vye por yer.

Minis Benstrong ti pe kontinyen avek son bann vizit familyarizasyon dan bann biro ek landrwa travay ki tonm anba son minister.

Lo son vizit kot SFA i ti akonpannyen par son sekreter prensipal Michael Nalletamby; sef egzekitif SFA Bernard Arnephy ek lezot zofisye son minister ek sa lotorite.

Bi sa vizit se pour ki minis i kapab vwar pour limenm kot bann staf pe travay, ki kondisyon travay zot ladan e pour li apresye enn pti pe pli byen kontribisyon ki sa bann staf ek lotorite pe fer.

Avan konmans son vizit Minis Benstrong ti rankontre ‘management’ SFA dan en miting kot zot ti diskit plizyer size baze lo sa lotorite. Apre minis ti pas dan diferan lofis pour enterakte avek bann staf.

“En keksoz ki mon’n apresye se mannyer bann staf zot travay e mannyer striktir sa lotorite i ete, bann staf zot travay konman en lekip. En department i siport en lot departman. Savedir ‘output’ en departman i al konman ‘input’ en lot departman,” Minis Bentrong ti dir apre son vizit.

Minis ti osi fer remarke ki sa bann dimoun i desarz en gran responsabilite dan lendistri lapes. E la i ti nonm bann eleman statistik, eleman resers e menm teknolozi ki’n entrodwir dan SFA sirtou an sa ki konsern ‘monitoring’ bann bato lapes. E sa se bann bato lapes komersyal ki port paviyon Sesel e ki pe lapes dan nou delo teritoryal. Menm pour peser lokal zot annan en sistenm ki permet SFA detekte kote zot pe lapes.

“Tou sa ansanm i montre lenportans sa rol ki SFA pe zwe. Me byensir i annan bann ‘challenge’. I annan bann ki ‘short-term’ kot solisyon imedya i devret ganny war,” minis ti fer remarke. La i ti donn legzanp ‘ice’ kot i ti dir ki en louvraz in deza fer.

“Nou annan pour revwar ki mannyer nou zer sa bann ice plant pour fer sir ki zot breakdown i ganny diminyen. Akoz konmela letan ice plant i down se sa ki koz bann ‘issues’ ki peser pa ganny ice,” minis ti dir.

I ti osi fer remarke letan i ti pas dan bann distrik i ti war bann plan ki SFA pe travay lo la ki i’n dekri konman efikasite SFA pour li kapab desarz son responsabilite lo kote planifikasyon menm si bokou plis ti a’n kapab ganny fer si ti annan ase staf.

Minis ti dir ki i annan en demann kot SFA pour plis staf. Sa mank staf i afekte proze sa lotorite ki ler zot pe ganny enplimante i annan en mank aksyon, ki vedir i pa sa lavites swetab. I ti fer resorti ki SFA pe adres sa size.

Minis Benstrong ti osi vizit lezot fasilite SFA lanmenm obor ‘headquarters’.