Bidze 2017 Plizyer mezir pour asire ki larises i ganny byen partaze |10 December 2016
Minis Larose pe prezant Bidze 2017 devan Lasanble Nasyonal yer
Pep Seselwa i ekspekte lannen prosenn vwar lentrodiksyon plizyer mezir pour kontinyen redwir kou lavi, kre plis loportinite ek kondisyon favorab pour lenvestisman ek devlopman pti biznes, rediksyon dan taks e en 13enm mwan lapey pour travayer sekter prive parmi lezot ankor.
Tousala in anonse dan diskour bidze pour lannen prosenn ki nouvo Minis pour Finans, Komers ek Planifikasyon Ekonomik Dr Peter Larose ti prezant devan Lasanble pour son konsiderasyon ek laprouvasyon dan en sesyon yer bomaten.
Sa i 1er diskour bidze Dr Larosse ki ti ganny apwente minis dan nouvo gouvernman Prezidan Danny Faure mwens ki de mwan pase.
Bidze ki pe propoze pour lannen prosenn i en rikord sonm 7 bilyon, 796 milyon, 480 mil 879 roupi (7,796,480,879).
Sa bidze ki annan pour tenm ‘Devlopman Enklisiv – Loportinite pour nou tou’, in ganny dekri par Minis Larose konman enn ki anmenn bon nouvel ek lespwar pour tou Seselwa.
“Lespwar pour en meyer lavenir, lespwar pour batir en gran nasyon ansanm,” i ti dir devan Lasanble.
Sa bidze pou adres 5 lobzektif prensipal:
- Elimin lapovrete dan nou pei ;
- Distribye larises dan en fason pli ekitab pour enkli tou dimoun ki dan bezwen ;
- Ofer nouvo loportinite pour nou pep partisip e envestir dan nou devlopman ekonomik ;
- Transform byen nou nasyon dan en fason dirab e soutenab pour kre plis prosperite pour nou pep ki nou deservi ;
- Asire ki Sesel i reste en destinasyon ki atir e sekiriz lenvestisman.
Lo size 13enm mwan lapey Minis Larose i dirti propozisyon gouvernman pour annan derogasyon pour serten kategori biznes ou endividi dan laplikasyon 13enm mwan saler. Me dan konsiltasyon ki ti ganny fer lo proze de lwa Lalwa Lanplwa (2016), manm piblik ti propoze pour ki tou travayer, san leksepsyon, i benefisye atraver en 13enm mwan saler.
E parey nou’n konstate, konsiderasyon miting konsiltasyon ti’n ganny enkli dan lamannman lalwa lanplwa ki ti ganny prezante avek Lasanble Nasyonal. Me sa lamannman pa’n ganny aprouve par Lasanble Nasyonal.
Lannen 2016 pou dezyenm lannen konsekitiv ki travayer gouvernman i ganny peye en 13 enm mwan saler. Sa i ganny pratike dan bokou pti leta zil, minis ti fer resorti. I ti fer remarke ki i annan menm serten pei ki donn en 14enm e 15enm mwan saler.
« Malgre sa, gouvernman i ankor fermeman krwar ki pa zis travayer gouvernman ki merit benefisye avek en 13enm mwan lapey. Nou konvenki ki tou travayer Seselwa dan sekter prive i osi merit en 13enm mwan lapey, » i ti dir.
Alors Minister Lanplwa, Devlopman Antreprenarya ek Inovasyon Biznes ansanm avek Minister Finans, Komers ek Planifikasyon Ekonomik pe finaliz lamannman neseser pour fer sir ki travayer dan sekter prive i osi benefisye avek en 13enm mwan saler, akoz sa ti laspirasyon e lekspektasyon konsiltasyon ek manm piblik.
E osi sa lamannman pou pran kont formil ki serten kategori mikro, pti e mwayenn biznes ki sa pou aplikab. Par egzanp, en endividi ki annan en biznes “Child Minding” pa pou pey 13enm mwan saler. En pti biznes ki anploy 3 travayer ki ganny klasifye konman en SME i kapab pey 50 poursan 13enm mwan saler.
Sa ki enportan pour fer resorti, se ki sa lamannman i bezwen ganny pase avan le 31 Desanm 2016 pour ki travayer i ganny peye zot 13enm mwan lapey pour sa lannen – e sa i devret pa pli tar ki le 31 Mars 2017.
Parkont, si sa lamannman i ganny pase apre le 31 Desanm 2016, alor la travayer pou due zot 13enm mwan lapey le 31 Desanm 2017 e peyman pou devret an lannen 2018.
Pour plis detay lo bann lezot benefis ek mezir ki Minis Larose in anonse vwar diskour Bidze 2017 an antye dan nou paz milye.
Zournal Nasyon i osi ekspekte pibliy versyon an Angle diskour Bidze 2017 dan son edisyon Lendi.