Moris i fet son 11enm ‘Festival Enternasyonal Kreol’ |16 December 2016
Parey nou selebre nou kreolite tou le Oktob, Moris ti met son pli zoli resanz tradisyonnel pour selebre son 11enm ‘Festival Enternasyonal Kreol’ depi le 17 ziska le 26 Novanm.
Zournal Seychelles NATION ti parmi plizyer lapres rezyonnal ki ti ganny envite pour asiste sa gran lafet kreol lo zil Moris par Mauritius Tourism Promotion Authority (MTPA).
Plizyer aktivite ti ganny organize pour reviv kreolite Moris, avek lanmizk, ladans kreol, manze kreol, parmi plizyer ankor.
Sa gran festival ti ganny kree an 2006 pour selebre langaz ki tou Morisyen i servi, zot kiltir atraver lanmod, lartizana, literatir avek lanmizik ek ladans. Tou sa bann aktivite i kontribye pour ki vre lidantite Morisyen i ganny met an valer.
Boukou dimoun in noubou reviv zot kreolite atraver bann aktivite ki fer labote kiltir Morisyen.
Zournal Seychelles NATION ti ganny sans asiste trwa parmi sa bann aktivite.
Konpetisyon konser sega tipik
Premye aktivite ti en konpetisyon konser sega tipik, ki ti fer le 24 Novanm. Dis group sorti partou dan Moris ti bataye pour ranport premye pri pour meyer group sega. Konpetisyon ti atir en gran kantite spektater. Gran gannyan sa konpetisyon sega tipik ti group Zwe nu lanmizik, ki ti ganny en tyek R25,000.
Group Mizik Dan Lapo e gannyan sa konpetisyon an 2015, ti osi prezan pour anim sa sware. Sa group ti resaman Sesel pour en lesanz ant Moris ek Sesel pour partaz zot kiltir.
Bal Rann Zariko
Pandan sa festival, bann trwazyenm-az pa ti ganny oubliye. Le 25 Novanm zot ti donn randevou pour en gran Bal Rann Zariko.
Anviron 2000 dimoun ti asiste sa aktivite, e bann dimoun aze ti prouve ki laz pa en baryer pour anmiz ou lekor.
Sa gran bal ti fer Port-Louis kot sa bann dimoun aze ti ganny sans danse, e partaz leksperyans lepase, ki mannyer zot ti selebre zot kreolite.
Bal Rann Zariko i form parti en vye koutim kot dan en parti ant fanmir ou zanmi en zariko i ganny mete dan gato. Sa dimoun ki resevwar sa bout gato ki zariko i ladan i organiz prosen bal.
Minis pour Tourizm Xavier-Luc Duval ti osi prezan pour don son sipor.
Gran Konser
Sa 11enm Festival Enternasyonal Kreol ti termin an splander avek en gran konser ki ti fer le 26 Novanm. Ti annan en latmosfer enorm, e tou dimoun ti kapab danse ziska 6er bomaten. Dimoun diferan laz – zenn konman aze – ti pe partaz menm lemosyon.
Pandan sa konser ki ti dir pour 12erdtan, lanmizik kreol ti rezonnen avek lenerzi ek lafyerte. Bann spektater ti ganny sans dans zot sega, raga, zouk ek rege kreol.
Bann santer ti sorti non selman Moris me osi Lareinyon ek Rodrig.
Parmi tou sa bann artis prezan ti osi annan nou santez renonmen dan Losean Endyen Sandra Esparon ki ti anim sa konser avek 4 sanson tire lo son nouvo albonm, parmi son sanson tre popiler En lot lannwit.
Randevou in fini donnen pour en lot edisyon ‘Festival Enternasyonal Kreol’ lannen prosenn.
U-Roy Jules
