Tou travayer Seselwa pou ganny en 13enm mwan saler |28 December 2016
Lasanble in aprouv lamannman pou permet peyman 13enm mwan lapey pour tou travayer Seselwa.
Sa i swiv bokou deba apre ki lamannman dan lalwa lanplwa pour fer li obligatwar ki tou anplwayer i pey en 13enm mwan saler zot travayer ti ganny rezete par bann manm LDS (Linyon Demokratik Seselwa) dan Lasanble letan i ti ganny prezante pour premye fwa 2 semenn pase.
Minis pour Lanplwa, Devlopman Antreprenarya ek Inovasyon Biznes Msye Wallace Cosgrow ti yer apremidi retourn ankor en fwa devan Lasanble avek sa bann lamannman ki ti’n ganny reaziste e modifye.
Dan son prezantasyon yer Minis Cosgrow ti fer resorti ki in annan bokou diskisyon ek konsiltasyon lo sa size sitan enportan pour tou Seselwa e i ti remersye tou dimoun ki’n anmenn zot kontribisyon lo sa size.
I ti fer remarke ki sa prosedlwa i etabli en baz legal pour en 13enm mwan lapey dan Sesel e ki san sa bann anplwayer napa okenn lobligasyon pour pey en 13enm mwan saler zot travayer lafen lannen.
“Nou’n ekoute e pran kont bann pwennvi tou parti konsernen enkli pour lasanble,” Minis Cosgrow ti dir.
Bann nouvo provizyon swivan plis konsiltasyon ki Minis Cosgrow ti prezante yer i swivan:
• Ki tou travayer Seselwa ki zot lanplwa i ganny sipervize par Lalwa Lanplwa i ganny en 13enm mwan saler anba lalwa;
• Ki gouvernman i etabli en fon pour siport bann anplwayer ki dan difikilte finansyer pour pey zot travayer en 13enm mwan lapey. Sa fon pou ganny zere par en komite spesyal 13th month pay committee ki pou etabli par minister finans an konsiltasyon avek minister lanplwa. Anplwayer konsernen ava fer laplikasyon avek sa komite ki ava anretour egzamin zot demann pour lasistans e zot bezwen soumet zot laplikasyon o mwen 3 mwan avan ki peyman 13enm mwan lapey i devret peye;
• Bann anplwayer ki annan en kontra pour pey en bonous zot travayer e si sa bonous i plis ki en 13enm mwan lapey, sa anplwayer pou kapab aprezan tir lekivalan sa 13enm mwan lapey dan sa bonous e pey sa ki reste konman bonous;
• 13enm mwan saler pou ganny egzanpte dan lalwa taks lo saler e i pou parey sa egzanpsyon lo bonous me ki sa pou ganny revwar letan gouvernman i finaliz sistenm taks lo saler lo en baz progresiv.
Minis Cosgrow ti fer resorti apre ki pour lezot bann pwen dan sa prozedlwa ki Lasanble ti agree sa i reste parey.
Pour bann apwentman konstitisyonnel, prezidan ek vis-prezidan, minis, manm lasanble nasyonal, prokirer zeneral, ombudsman ek lezot, zot pa pou ganny en 13enm mwan saler akoz zot saler i ganny etabli, gide e regle anba zot prop lalwa.
Bann manm Lasanble ti byen akey sa bann nouvo propozisyon e zot ti dir ki bann deba in itil, pozitiv, enteresan, kontansye, kontroversyel… lo en size ki pros avek leker tou dimoun e kot in annan bokou largiman pour e kont ki normal lo en size sitan enportan.
In annan demann lo tou lede kote latab pour ki travayer zot an retour prodwi plis pour ki ava annan alafen lannen ase reveni pour partaze konman 13enm mwan lapey. Zot ti demande ki bann travayer Seselwa zot osi pran zot responsabilite pour ogmant prodiktivite dan zot lorganizasyon.