Bidze 2017: Lasanble i aprouv bidze Minister Lanplwa, Devlopman Lantreprenarya ek Inovasyon Biznes |29 December 2016

Lasanble Nasyonal ti yer aprouv en total plis ki R37.6 milyon ki reprezant bidze Minister Lanplwa, Devlopman Lantreprenarya ek Inovasyon Biznes pour lannen 2017.

Sa vot pou partaze ant trwa konponan dan sa minister dan fason swivan : Departman Lanplwa preski 23.2 milyon, Devlopman Lantreprenarya ek Inovasyon Biznes 2.2 milyon e Senpa (Small Enterprise Promotion Agency) 12.3 milyon.

Avan ki sa bidze ti aprouve, minis ki responsab sa minister, Wallace Cosgrow, sekreter prensipal (PS) pour Lanplwa Jules Baker, sekreter prensipal pour Devlopman Lantreprenarya ek Inovasyon Biznes Pamela Charlette ek Konseye Spesyal Veronique Bresson ti reponn kestyon ki bann manm ti annan lo sa minister e bidze ki ti pe ganny propoze. Sekreter prensipal pour Finans Patrick Payet ti osi prezan, parey i ti’n prezan depi ki bidze ti prezante pli boner sa mwan.

Lo kestyon logmantasyon pour voyaz ek bennzin ki’n ogmant par plis ki R700,000 konpare avek lannen pase, Msye Baker ti eksplik nesesite pour aste en nouvo transpor e ogmant kantite lenspeksyon ki son departman i fer dan bann landrwa travay. I ti azoute ki son minister pe an se moman diskit avek Minister Finans pour rekrit plis lenspekter e osi ranpli bann pos ki vid an se moman. I ti anmenmtan dakor pour vwar konman son minister i kapab minimiz depans.

Lo kote en milyon roupi ki rapor Oditer Zeneral in klasifye konman kado personnel e ki en manm Lasanble ti kalifye konman « gaspiyaz », menm si zot ti dir ki serten depans i zistifye, PS Baker ek Minis Cosgrow ti tou le de dakor ki fodre annan plis sipervizyon.

Swivan konsern ki Departman Lanplwa pe lwe biro dan Horizon Complex lo Praslin ki propriyete Parti Lepep, PS Payet ti dir ki Minister Finans pou revwar sa sitiasyon e konsider vwar lezot lokasyon pour lwe biro.

Lo lefikasite trwa lazans lanplwa prive ki anrezistre e ki pe fonksyonnen, Minis Cosgrow ti dir ki son minister i travay an etrwat kolaborasyon avek zot pour zot kapab plas bann zenn dan lanplwa.

I ti osi ganny demande pour rezourd problenm dan bann lotel kot en manm Lasanble ti dir ki travayer Seselwa i ganny maltrete, ganny met deor malapropo e ganny ranplase par etranze.

Serten manm Lasanble ti osi demande ki minister responsab pour Lanplwa i konsider ranplas travayer etranze par plis Seselwa.

Lo kote Inovasyon Biznes ek Senpa ti annan de pti konsern: Ki serten rol Inovasyon Biznes i an diplikasyon par egzanp avek NISTI (National Institute of Technology and Innovation). Pour Senpa, bann manm ti not en logmantasyon preski R5 milyon konpare avek bidze 2016. Sef egzekitif sa lazans, Penny Belmont, ti eksplike ki sa depans i pour rekritman staf sinyor,  alawenns e osi formasyon.