Stratezi Departman Lasante pour 2017 : |30 December 2016
END-OF-YEAR ISSUE
Donn meyer swen e amelyor lenfrastriktir
Apre en vizit ki i ti fer dan bann sant lasante dan pei e dan bann ward Lopital Sesel semenn pase, nouvo Minis pour Lasante ek Servis Sosyal Jean-Paul Adam ti dir ki sa kontak avek staf ek pasyan i reponn a stratezi son minister pour donn pli bon swen.
Dan kad sa stratezi, i ti azoute ki Minister Lasante pou osi revwar leta bann lenfrastriktir, repar zot kot i neseser e konstrir nouvo fasilite kot i posib.
«Nou annan plizyer proze kapital ki pou reabilit lenfrastriktir aktyel e anmenn nouvo proze. An 2017 nou pou revwar plan devlopman lopital e deza i annan travay ki pe ganny fer. An plis ki sa travay lo nivo santral, nou pou osi met lanfaz lo bann klinik dan distrik pour nou kapab donn pli bon swen,» Minis ti dir.
Minis Adam ti rekoz lo sa stratezi letan i ti pe defann bidze Minister Lasante ek Servis Sosyal dan Lasanble Nasyonal. Pour lannen ki pe vini, sa minister in resevwar en bidze 876.9 milyon roupi, enkli 800.9 milyon pour Lazans Swen Lasante.
Parmi bann lenvestisman ki Departman Lasante pe anvizaze fer an 2017 i annan sa bann swivan :
- Konstriksyon en nouvo lopital pour zanfan ek madanm lo Zil Persévérance
- Konstriksyon Sant Lasante Zil Persévérance
- Renovasyon ward zanfan dan Lopital Sesel
- Renovasyon Sant Lasante Rivière Anglaise
- Renovasyon lo Lopital Anse Royale
- Renovasyon sant lasante dan bann distrik
- Lenstalasyon en sistenm lenformasyon atraver en don gouvernman Endyen
- Reentrodiksyon telemedsin
- Lenportasyon sis nouvo lanbilans
Konman en lot gro proze, sa minister pe osi anvizaz konmans travay konstriksyon lo nouvo Lopital La Digue.
Lo kote Lopital Anse Royale, i pe depi sa lannen ofer servis klinik lo en baz 24er lo 24. Minister Lasante in anonse ki sa lopital pou osi konmans admet pasyan pandan lannen 2017. Sa pou konmans avek ward Msye avan ki i plitar admet madanm ek zanfan.
En lot laspe ki Departman Lasante pe met lanfaz lo la se formasyon resours imen, ki Minis Adam i dir i zot pli gran larises. Sa pou posib atraver Lekol Lasante – National Institute of Health Studies (NIHSS) – ki ekspekte vin a en pli o nivo. Par formasyon ki i ofer, sa lekol i osi anvizaze ogmant konpetans bann asistan ners oubyen ‘health care assistants’, pour fer zot vin ners.
«I enportan ki nou kontinyen batir konpetans sa bann dimoun devoue,» Minis Adam in komante.
Avek zis 13 ners ki’n fini zot formasyon avek sikse an 2016 e en mank apepre 163 ners dan bann servis, i neseser pour atir plis profesyonnel dan domenn lasante. Apard bann pos strikteman medikal parey ners, dokter ek dantis, Minister Lasante pe osi ofer plizyer pos teknik e administratif tel ki zofisye relasyon piblik ek enzenyer.
Apard lenvestisman dan swen ek lenfrastriktir, minis responsab pour Lasante in dir ki nou osi bezwen revwar nou bann fason viv e reviv an armoni avek lanatir pour nou kapab zouir en pli o nivo lasante.
«Lasante se pa zis donn swen. Se osi en stratezi pour fer dimoun annan en stil lavi pli sen. Endividi ki pa pran swen avek zot lasante i koz lezot problenm pour zot menm e pour kominote,» in ensiste.
Minis Adam i dir ki i konnen ki lekspektasyon piblik i o e ki i annan en kantite konplent. Me in promet ki son minister pou fer tou zefor pour amelyor servis an 2017. Sel fason pour fer sa in dir, se pour etabli en o standar atraver bann konnesans ek levidans syantifik.
An ka ki piblik pa satisfe, i pe demann zot pour fer zot konplent an ekri. Sa a permet en lenvestigasyon e sanksyon an ka okenn protokol pa’n ganny respekte.
Ou osi ou kapab ede pour amelyor servis lasante e benefisye avek pli bon lenfrastriktir e sirtou meyer swen. Konmans par aret abiz lo sa servis ki ou ankor privilezye pour ganny pour nanryen !
