Lasanble i aprouv bidze Minister Lasante |31 December 2016
Lasanble Nasyonal ti Zedi aprouv bidze 2017 pour Departman Lasante.
Dan sa bidze, en total 800.9 milyon roupi pou al pour Lazans Swen Lasante e 76 milyon roupi ki Departman Lasante pou partaz avek Departman Zafer Sosyal. I osi kouver depans Lotorite Lasante Piblik ek Konsey Nasyonal kont SIDA.
Letan i ti pe defann son bidze, Minis pour Lasante ek Servis Sosyal Jean-Paul Adam ti komante ki sa sonm i reprezant en lenvestisman pli direk dan nou pep, akoz bidze lasante i al direkteman dan byennet lepep. I ti azoute ki i osi fonde lo plan stratezik pour redevlopman Lopital Sesel ek lezot lenfrastriktir.
Me ti annan konsern sorti kot serten manm lasanble ki in annan en gran logmantasyon – 100% konpare avek 2012 – dan bidze Lasante ek Zafer Sosyal. Sa zot in dir, in koze par pri latizann ek kontra ki Minister Lasante i ofer lezot lazans, oubyen ‘outsourcing’.
Zot in azoute ki labi i osi en lot problenm ki sa minister i devret adrese.
Bann manm ti osi soulev konsern an relasyon a en mank 150 ners ki Minister Lasante i dir pou pran 5-an pour kouver.
Zot ti soulinyen ki akoz anplis a akse a swen lasante, nou bezwen en sistenm lasante de kalite e efikas. Donk zot ti demande ki minister i met zefor ek resours dan rekritman.
Zot ti dir ki i osi neseser pour atir bann pli bon kandida ki fini lekol segonder avek pli bon grad.
Zot ti osi demann en pli bon scheme of service pour bann travayer lasante, avek en saler minimonm R10,000. An se ki konsern bann dokter ki pa retournen apre zot letid, Minis Adam ti dir ki son minister in met anplas en progranm pour anpes sa.
En lot preokipasyon se bann dokter ki pe travay konman administrater. Minis ti eksplike ki napa dimoun ki’n ganny formen dan ladministrasyon lopital e ki finalman sa ki konn plis dan zesyon lopital se dokter.
Me i’n donn lasirans ki son minister in reflesir lo sa problem e ki i pou byento kapab ofer formasyon dan zesyon lopital e reponn a sa ideal kot dokter pa direkter.
Parmi bann lezot demann, bann manm lasanble in fer lapel avek Minister Lasante pour ofer servis desantralize e spesyalize lo Praslin, annan en dezyenm dokter oubyen en paramedik lo La Digue, revwar kondisyon travay bann ners kot Sant Lasante North East Point e adres problenm mank lapropte ek risk lenfeksyon dan lopital.
Minis Adam ti osi donn leklersisman lo serten lezot size. Parmi ti disparite ant saler travayer Seselwa ek etranze, kriter pour rekritman dokter ek ners etranze, kredibilite bann fourniser latizann pour Minister Lasante e re-entrodiksyon telemedsin.
An se ki konsern ansyen batiman NIHSS kot Lopital Sesel ki’n ganny devalize par manm piblik e ki’n tonm an rin, minis in promet en lanket dan sa sitiasyon.