Lasanble Nasyonal i aprouv bidze, me avek R140 milyon an mwens |25 February 2017

Apre plizyer zour kot bidze ki ti’n propoze pour sa lannen e ki ti ganny prezante an Desanm lannen pase a en sonm 7,796,480,879 ti ankor pe ganny depouye, tar yer apremidi i ti ganny aprouve avek plizyer lamannman.

Anplis ki sa en sonm R140 milyon in ganny retire dan sa bize ki ti’n ganny propoze orizinalman apre ki bidze serten departman ti’n ganny koupe.

Dirizan lopozisyon dan Lasanble Nasyonal Msye Wavel Ramkalawan i dir sa larzan i kapab ganny servi pour fer plizyer keksoz pour amelyor lavi lepep Seselwa.

Minister Tourizm ek STB zot, parti mazoriter LDS dan Lasanble pa ti aprouv zot bidze e ti pe rod plis leklersisman dan plizyer laspe zot bidze kot pa ti kler. Me apre ki sa minister ek STB ti’n zwenn avek komite finans Lasanble pour eklersi plizyer laspe aprezan en bidze siplemanter pou bezwen ganny prezante avek Lasanble osito posib pour konsider finansman pour sa 2 antite.

Dan son dernyen sesyon deba lo bidze yer bomaten, Lasanble Nasyonal ti depouy bidze pour bann progranm ek lazans ki ganny sibvansyon avek gouvernman.

Ti annan bokou deba lo serten parmi sa kantite progranm, lazans ek lorganizasyon non-gouvernmantal ki ganny sipor finansyel gouvernman.

Ti annan deba lo sipor finansyel ki Lasanm Komers ek Lendistri i gannyen, lo sa ki Natcof i gannyen, sa ki Paradis des Enfants i gannyen e parti mazoriter in demann plis leksplikasyon avan ki zot bidze i ganny aprouve.

Ti osi annan bokou deba lo Seychelles News Agency e ti annan propozisyon lo kote parti mazoriter LDS ki sa lazans i ganny revwar antyerman e ti osi annan propozisyon ki i ganny entegre e vin en sel avek NISA (National Information Services Agency) sa lazans ki prodwi zournal Seychelles NATION.

Vi ki i annan serten lorganizasyon non-gouvernmantal ki ganny larzan avek gouvernman e lezot ki pa gannyen, bann manm in demande ki i annan bann prensip kler e transparan ki ava permet tou bann lorganizasyon parey swiv bann kriter byen defini pour zot osi rod sa sipor.

Apre ki sa bidze ti’n aprouve Msye Ramkalawan ti fer resorti ki i’n en long legzersis kot premye fwa dan Sesel ki bidze nasyonal i ganny depouye koumsa pandan plizyer zour. I ti dir sa in anmenn en tre bon rezilta.

«Sa legzersis in vo lapenn e lepep Seselwa in vwar ki mannyer en Lasanble i merit travay,» Msye Ramkalawan ti dir.

I ti fer resorti ki atraver sa 30 sesyon deba lo bidze Lasanble in kouver 2 term depi ki i’n konmans zwenn an Septanm lannen pase.

I ti osi dir ki menm si Lasanble in fer en bon travay, bokou zofisye gouvernman ki’n vin devan pa’n koz laverite.

I ti eksprim swe ki sa i ava sanze pandan deba lo bidze pour lannen prosenn.

I ti osi swete ki dan bann prosen deba lo bidze manm lo lot kote latab ava partisip plis e poz plis kestyon pour rod laverite pour benefis nou pep.

I ti felisit Minis Finans, Komers ek Planifikasyon Ekonomik, Dr Peter Larose, avek son lekip ki’n akonpanny Lasanble toudilon sa bann deba pour en travay ki i’n dekri konman eksepsyonnel.

I ti osi felisit lepep Seselwa ki’n partisip aktivman atraver mesaz telefonn.

Lo son kote dirizan zafer gouvernman Msye Charles De Commarmond in osi admet ki sa enn deba lo bidze nasyonal in enn ekstraordiner me enn ki son parti dan bann Lasanble oparavan in toultan anvi vwar me ki pa’n arive e ki la i’n arive avek led LDS.

«Nou’n toultan pouse pour fer sa arive atraver FPAC e nou kontan ki avek sipor lopozisyon sa in arive,» i ti dir.

Msye De Commarmond ti azoute ki sa legzersis in en wake-up call pour legzekitif  kot zot in oblize sanz zot fason vwar lasanble e fason zot prepar bidze e in osi en learning process pour Lasanble.

«Nou tou nou’n benefisye e lepep in partisip aktivman,» i ti dir.

I ti fer remarke ki atraver sa legzersis zot in osi reponn lapel Prezidan Danny Faure kot i konsern transparans ek rann kont.

Lo son kote Minis Larose i dir ki sa legzersis in ed pep Seselwa pli byen konpran kisisa en bidze nasyonal.

«I’n en leksperyans ki pou anmenn nou bokou pli devan,» i ti dir.