Care ek son bann partener i lans 1 mwan sansibilizasyon kont labi drog |16 June 2017

‘Debout for, fer swa pozitiv’ i mesaz rezilyans kont labi drog ek lezot sibstans danzere swazir par lorganizasyon ki fer kanpanny pour plis konsyantizasyon, rezilyans ek ledikasyon kont labi sibstans, Care, ki’n lans 1 mwan sansibilizasyon, depi le 14 Zen ziska le 14 Zilyet, dan bann lekol atraver pei.

Sa ti pandan en lanmes aksyon de gras, Merkredi, organize e animen par bann zanfan e ansenyan lekol primer Bel Ombre, sirtou bann ki dan klib Care.

Sa lanmes ek lansman sa 1 mwan kanpanny i koensid avek Lazournen Enternasyonal bann Papa ki selebre le 19 Zen.

Responsab Care, Madanm Sarah Rene, lezot manm sa lorganizasyon, bann zofisye Minister Ledikasyon ek Devlopman Resours Imen, bann responsab lekol Bel Ombre osi byen ki plizyer paran sirtou en bon pe papa ti’n akonpanny zot zanfan pour asiste sa lanmes e donn sipor zot zanfan e lankourazman lekol.

Dan sa lanmes ki ti byen animen avek en swa bann sanson byen apropriye ki’n fer lasanble byen reflesir, pret parwas Bel Ombre Collin Underwood, ki ti prezid sa seremoni, ti dir ki bann zanfan zot bezwen Bon Dye pour ed zot fer en swa pozitiv.

I ti azoute ki souvan bann move swa ki bann zenn i fer i anmenn zot dan fernwanr e zot bezwen lalimyer e lalimyer pour ganny li se atraver bann bon swa dan lavi.

«Zanfan zot pran legzanp an premye lye lo zot paran e paran zot bezwen sa bon lalimyer pour zot kapab kler zot bann zanfan e paran alor zot bezwen bann bon legzanp pour zot zanfan swiv,» Per Collin ti dir.

Per Collin ti azoute ki «keksoz negativ i toultan bokou pli for ki nou e sa nou tou nou konnen me tenm sa 1 mwan kanpanny i dir bokou akoz si ou fer en bon swa ou bezwen debout for pour tenir e mentenir sa swa.»

Lo son kote, Madanm Rene ti dir ki nou bezwen byen boner a en laz tre zenn kiltiv dan bann zanfan bann bon valer ki pou fer zot for.

«Problenm drog i telman konplike e telman gran ki mon pa krwar i annan enn ant nou ki annan larepons, me selman si zis nou ti pran en pti moman e demann nou lekor ki mannyer nou sosyete ti pou ete si ti napa drog ek lalkol,» Madanm Rene ti demande.

I ti azoute ki se mank spirityalite e bann bon valer moral ki nou’n perdi ki a la baz tou nou bann problenm e malez sosyal ki ozordi pe ronz nou bann fanmir e annan lenpak direk lo nou bann zanfan.

Madanm Rene ti dir ki erezman i ankor annan dimoun ki ankor annan sa sans spiritialite e pe esey redres sa  sitiasyon ki pe deplizanpli deteryore e ki laprev i la pour tou sa ki anvi vwar.

«Nou bezwen kontinyen travay avek bann zanfan menm si i annan bokou problenm e fernwanr dan bann lakour, dan lanvironman, dan vwazinaz e zanfan pa konnen kot pour vire pour vwar lalimyer e se sa ki fer zot pran move direksyon e fer bann move swa,» Madanm Rene ti dir.

I ti fer resorti ki 90% bann zanfan ki Care i travay avek dan bann lekol i bann garson ki  tre sansib avek problenm ki zot annan dan lakour kot swa papa pa prezan oubyen kot zot ganny difikilte pour konekte avek zot papa akoz problenm drog ki fer zot santi zot ganny neglize.

I ti azoute ki i annan tro bokou lalkol avek drog alatrenn kot bann paran zot abiz tro bokou sa bann sibstans e negliz zot zanfan.

«Me nou bezwen kontinyen travay avek sa bann zanfan e donn zot bann zouti ki pou ed zot fer bann bon swa e debout for pour tenir e viv zot swa e meyer fason fer sa se ki zot reste konnekte avek Bon Dye e zot krwayans spirityel,»  Madanm Rene ti dir.

I ti azoute ki nou sosyete i an danze e nou tou nou bezwen santi nou konsernen e esey fer sa ki nou kapab pour ede amelyor sitiasyon e sov sa bann zanfan.

I ti dir ki si nou entansifye nou zefor e travay ansanm dan tou bann lekol pour ed nou bann zanfan depi byen pti «mon annan lespwar ki nou pou annan bann meyer zanfan segonder alavenir.»

Osi pandan sa seremoni, Msye Hugue Albert ki en papa, en staf lekol e osi en manm klib Care sa lekol, ti annan bann mo lankourazman pour bann paran ki pe fer zot mye pour siport zot zanfan osi byen ki lekol e i ti demann bann papa pour vin pli sansib e atantiv anver zot zanfan pour ed zot fer bann bon swa.

Lo son kote, en lot papa Msye Dereck Amade, ki annan en garson 13-an ek enn 7-an, i’n dir ki i vreman apresye zefor ki Care pe fer e i dir ki konman en papa i vreman konsernen par sitiasyon drog dan nou pti pei.

«I vreman fer mwan trakase e konsernen akoz sa sitiasyon dog pa sanble ki i pe amelyore malgre tou zefor ki pe ganny fer. Mwan mon toultan koz avek bann dimoun ki mon konnen pour dekouraz zot servi sibstans me i annan en kantite pour fer e sa i depan lo zefor nou tou,» Msye Amade ti dir.

Sa seremoni ti termin avek en benediksyon pour tou papa.