Shantasha Hoareau gran ganyan konpetisyon Stilis Mod |17 June 2017
Shantasha Hoareau, en zenn stilis Seselwa aze 35-an, i gran ganyan premye konpetisyon organize par Televizyon SBC kot bann stilis lokal in demontre zot talan atraver en parkour kat semenn lo televizyon kot manm piblik in kapab dekouver zot e apresye zot talan e kalite zot travay.
Sa konpetisyon in ganny finanse par Televizyon SBC avek son bann partener parmi labank Barclays e gran venker in anmenn dan lakour en sonm 50 mil roupi e en masin koud e i pou osi kapab swiv en progranm mentorship 1-an sponsorize par labank Barclays.
Nou ava rapel ki antou set (7) stilis madanm ti reponn lapel letan SBC ti lans sa konpetisyon pli boner sa lannen e atraver diferan progranm lo televizyon telespektater e lezot manm piblik ti kapab swiv sa set madanm ziska semifinal kot trwa (3) parmi zot ti ganny eliminen e sa kat lezot ti kontinyen dan gran final ki ti deroul kot ICCS Dimans pase.
Sa kat (4) stilis ki ti ariv dan final ti Vanessa Songwar aze 26-an ki ti prezant en koleksyon lenz apele Pik ou Lavi, Roudy Valentin 24-an avek son koleksyon ki ti apel Festivite Kolore, Shantasha Hoareau 35-an ti apel pour li La Fleur de Mon Âge e Christine Reginald 38-an ti’n fer en koleksyon pour dimoun ase gro apele Fizyon Komod .
Sa gran final ti deroul dan en sware mizikal kot plizyer group e santer lokal ti perform diferan morso lanmizik e kot sa kat (4) finalis ti prezant sakenn en koleksyon lenz pour diferan lokazyon e bann ziri ti zize e apre anons en gran ganyan.
Fozia Endrias, en gran stilis Etyopyen ki’n partisip lo lasenn lanmod enternasyonal, ti osi defil son koleksyon apele The Royalties akote bann stilis Seselwa.
Sete bann zenn mannken fiy ek garson, laplipar sorti Lekol Lar Vizyel, ki ti defile dan sa bann diferan koleksyon lenz.
Apard sa gran pri, sa trwa lezot stilis dan final ti ganny konman pri sakenn 2000 roupi e osi en masin koud tandis ki sa trwa (3) stilis ki ti ganny eliminen dan semifinal zot osi zot ti ganny en pri e sa i sakenn en tiket avyon pour voyaz dan nenport destinasyon dan larezyon kot Air Seychelles i deservi.
Apre ki i ti’n resevwar son pri prezante par sef ekzekitif SBC, Msye Antoine Onezime, en Shantasha tre emosyonnel ti dir ki i pa ti pe ekspekte ganny sa pri.
«Mon vreman kontan akoz mon’n travay vreman dir, me selman mon pa ti pe ekspekte gannyen akoz tou lezot stilis in osi travay dir. Me mon kontan mon’n gannyen,» Shantasha ti dir.
Lo son kote responsab lavant kot SBC Cindy Wirtz ti dir avan sa final ki atraver sa konpetisyon SBC in oule met bokou lanfaz lo dekouver talan ki bann stilis Seselwa i annan me ki souvan piblik pa tro konn zot.
«I annan dimoun ki annan talan me ki enpe dan kasyet e sa progranm in en fason pour fer dimoun konn zot enpe pli byen e dekouver ki zot kapab fer e ki zot annan pour ofer,» Manmzel Wirtz ti eksplike.
Nou prezant zot serten portre tire par nou fotografer Joena Meme pandan sa defile kot ICS Dimans pase.
|
Pik ou Lavi
par
Vanessa
Songwar |
|
 |
 |
----------------------------------------------------------------------------------------------------------------------------
|
Festivite Kolore
par
Roudy Valentin |
|
 |
 |
------------------------------------------------------------------------------------------------------------------------------------------
|
La Fleur de Mon Âge
par
Shantasha Hoareau |
 |
 |
 |
--------------------------------------------------------------------------------------------------------------------------------------------------------
|
Fizyon Komod
par
Christine Reginald |
 |
 |
 |
