National Day Fair lo Praslin - En varyete stall pour tou gou! |27 June 2017
Bann zil pros ti selebre Lazournen Nasyonal dan en lafwar anyel ki sa lannen ti’n ganny organize lo zil Eve, Baie Ste Anne Praslin.
Pour akeir bann zabitan pour sa lafwar zil pros, ti stall Vallée de Mai, ki ti’n anmenm en pti morso sa sit leritaz mondyal. Plizyer lespes plant ki trouve dan Vallée de Mai ti an ekzibit.
Sa ti swiv par stall Air Seychelles kot plizyer aktivite parey kwiz ti’n ganny organize pour bann zanfan sirtou e an retour zot ti resevwar bann tokenn sa lakonpannyen konman pri. Ti osi annan serten promosyon lo bann tiket avyon.
ISPC, Food Pro, HSL, Intelvision, Cable & Wireless, STC, CCCL, Abhaye Valabjhi ti serten bann biznes ki ti’n sezi sa loportinite pour fer piblik konn plis lo zot e osi fer lavertisman pour bann diferan pos travay pour rekritman. STC ti sirtou pe met lanfaz lo en nouvo kafe ki i fek lanse.
Osi prezan ti bann pti lantreprener tel ki Stephen Morgan avek son bann prodwi patisri; Alain Marie; Janette Ernesta e Ab’s Printing; June Barbe avek bann lobze artizanal ki kapab ganny ofer konman kado pour bann lokazyon spesyal ou menm konman en souvenir Sesel; I-candle gift souvenirs avek bann labouzi personalize; Wilton Constance avek bann bizou artizanal; Makazza avek bann meb e dekorasyon pour lakaz; Tropical Massage pour en masaz, ‘manicure’ ou ‘pedicure’; Ned Descombes avek son nouvo biznes bann sak an papye; Tante Claire e Elina Dugasse ti osi la pour ofer en seleksyon manze.
Lo lot kote, L’Union Estate, ki touzour fidel anver bann tel aktivite, ti pe fer lavant zot bann prodwi tel ki go manze, bouden, graton, fri ek legim. Andrine Denis ti osi la avek son varyete legim ek gro manze.
Lotel Le Duc de Praslin, Tapas Chill Out Lounge e lotel Lemuria Resort ti osi la pour demontre zot bann diferan servis ek prodwi. Lotel Lemuria ti osi annan en seksyon ki ti pe promot zot ‘golf course’ kot la bann endividi, sirtou bann zanfan ti ganny sans esey tap de pti boul. Tapas Chill out lounge ti plito atrakte bokou dimoun aswar kan son bann lalimyer diferan kouler e ‘cocktail’ ti pe ofer en latmosfer konpletman diferan lo sa laplenn.
Lekol Baie Ste Anne Primer e Lekol Segonder Praslin ti pe osi ekzibit zot devlopman ensi ki profil serten bann endividi ki’n pas atraver sa bann lekol. Klib foutbol Côte d’Or ti la zot osi pour profite e fer serten aktivite fundraising.
Bann diferan minister ti’n osi sezi sa lokazyon pour zot osi demontre zot bann devlopman e bann diferan proze lo zil pros. Bann diferan lazans sorti dan Minister Lasante; Minister Labita, Lenfrastriktir ek Transpor lo Later; Minister Lapes ek Lagrikiltir; Minister Lanvironnman, Lenerzi ek Sanzman Klima; e Minister pour Zafer Entern.
Fon Pansyon Sesel ti osi prezan pour eklersi okenn dout manm piblik ensi ki ankouraz zot pour fer bann kontribisyon volonter.
Fair Trade Commission (FTC) ek Public Utilities Company (PUC) ti osi la pour enform piblik lo zot fonksyon e devlopman pandan bann dernyen lannen. PUC ti pe osi ankouraz piblik lo bann benefis prezerv lenerzi e fer lesanz bann vye glob pour bann nouvo glob LED.
Pour bann zanfan, lentere ti plito kot stall SCAA ki ti’n organiz bann aktivite lo delo pour bann zanfan ensi ki en bouncing castle. Grander lalinny ki ti annan kot water splash ek water slide ensi ki pedal boats ti donn en bon lide ki mannyer bann zanfan ti pe vreman apresye sa stall.
Kot depo Seypec, enn zot tanker Seychelles Paradise ti’n pare pour akeir bann manm piblik pour en pti vizit. Sa lakonpanyen ti pe montre bann diferan servis ki zot ofer, bann mezir prekosyon ki bezwen ganny pran e ki mannyer zot bann prodwi i ganny prepare avan ariv kot piblik.
SBC Televizyon, Paradise FM ek Pure FM ti osi la pour transmet sa levennman an direk pandan ki bann benn zil pros ti anim sa levennman avek en melanz lanmizik.
Nou prezant zot serten portre bann stall tire par Romano Laurence.
Teks: Nadia Barbier