Selebrasyon 125-an Dyosez Katolik |21 July 2017
Legzibisyon i retras listwar ek misyon Dyosez Katolik
En gran legzibisyon anba tenm ‘Listwar ek Misyon nou Dyosez an Mars’ in ouver yerapremidi kot Domus Katedral Imakile Konsepsyon dan kad bann aktivite pour selebre 125-an Dyosez Katolik.
En bon nonm dimoun tou laz ti’n ralye kot Domus pour en sesyon lapriyer dirize par Monsenyer Denis Wiehe avan louvertir sa legzibisyon.
Sa legzibisyon plizyer tablo portre ek desen osi byen ki bann pti teks anekdotal i travay plis ki en 40enn mouvman ek group dan legliz e dan diferan parwas.
Sa legzibisyon pou reste ouver pandan sa wikenn antye e pandan semenn prosenn ziska Zedi le 27 Zilyet.
Bann portre ki lamazorite i an kouler i rakont bann zistwar ek levennman tre enteresan ki’n arive dan bann parwas pandan plizyer lannen e bann zistwar ki zot rakonte pou anmenn bokou souvenir pour bokou sirtou bann ki pli vye e i pou en moman ledikasyon pour bann ki pli zenn.
Letan i ti pe eksplik konteni sa legzibisyon, Madanm Antoinette Bonne, vis-prezidan Konsey parwas Katedral Imakile Konsepsyon, ti dir ki pandan sa 125-an bokou in ganny akonpli dan Dyosez.
«Tou sa bann portre ek lekritir dan sa legzibisyon i montre listwar nou dyosez parey konstriksyon bann legliz ek lasapel, bann pret ek levek ki’n deservi bann parwas dan dyosez, levanzelizasyon ki’n arive e ki pe kontinyen dan dyosez par diferan kongregasyon relizyez, kominoter, mouvman ek servis. En kantite travay in ganny fer par bann volonter dan bann parwas,» Madanm Bonne ti dir.
I ti remersye e felisit tou dimoun ki’n donn zot letan, lenerzi ek pasyans dan en fason volonter pour realiz sa bann egzibit pour sa legzibisyon.
«Sa legzibisyon pou donn nou konnesans lo legzistans ek fitir misyon nou dyosez pour sa gran selebrasyon,» Madanm Bonne ti dir.
Lo son kote avan ki i ti deklar sa legzibisyon ofisyelman ouver, Monsenyer Denis Wiehe ti osi remersye tou bann parwas ek mouvan ki’n prepar tou sa bann egzibit.
I dir sa legzibisyon i istorik e i pe montre nou klerman listwar nou dyosez, ki mannyer i ete ozordi e direksyon i anvi ale, savedir son misyon.
Bann portre dan sa legzibisyon i dir bokou. I annan antou 46 mouvman ek group dan legliz ki pe pran par dan sa legzibisyon.