Dimoun ki’n perdi en pros i ganny konsey lo ki mannyer pour fer fas avek dey |22 July 2017

Dan kad son progranm ‘Valer pour mwan, valer pour nou tou’ ki Konsey Nasyonal Lazenes (SNYC) pe promouvwar pour sa lannen, sa konsey ti organiz en latelye pour bann dimoun ki’n perdi zot bann fanmir pros dan bann lanmor sibit.

Se valer ‘Konprenezon’ (Understanding) an relasyon avek diferan reaksyon anver dey ki ti topik diskisyon dan sa latelye. Anviron en douzenn dimoun, enkli bann zenn, ki’n perdi en manm pros dan lafanmir ti pran par dan sa sesyon enteraksyon en demi zournen ki ti fer yer bomaten kot lotel Berjaya Beau Vallon Bay.

En partisipan, Melitine Malbrook sorti Reef Estate, ki’n perdi son garson, zournalis SBC Kevin Malbrook, ti dir ki i’n vin sa latelye pour li rankontre lezot dimoun ki dan menm sitiasyon avek li e an kozan sa i ava ed li dan son difikilte akoz i ankor vwar li difisil pour aksepte ki son garson pa la sak fwa i antre kot lakour akoz zot ti reste zis zot de.

Linda Simeon sorti St Louis ki ti perdi son fiy 5-an, Ella Simeon ek son gran ser Christianne Simeon dan en aksidan bato Ile Therese an Avril 2017, ti dir sa sesyon i a ed li fer fas avek son sitiasyon kot i vwar zot vizyon tanzantan sirtou son pti fiy ki ti kontan sante.

Per Colin Underwood, ki fek perdi son granmanman Irenne Monthy, ki i’n grandi avek, ti dir ki i pa fasil pour fer fas avek en tel sitiasyon e sa i pran letan ek kouraz.

Per Colin ti la konman en partisipan e osi pour donn benediksyon bann ki ti prezan dan sa sesyon.

Sesyon ti dirize par fasilitater SNYC, counsellor Beryl Dodin ki ti fer en prezantasyon lo ki mannyer sa valer ‘konprenezon’ (understanding) i kapab ede pour fer dimoun ki reakte e manifeste dan diferan fason anver lanmor, sorti dan troma ki zot vwar zot ladan.

I ti eksplike ki ler en dimoun i perdi en dimoun ki vreman pros, i vreman enportan ki ou annan konprenezon e sa i a ed ou pour aprann e fer bann bon swa ek desizyon.

Counsellor Dodin ti dir ki pour met sa valer ‘konprenezon’ fodre ki i annan konpasyon e pour met li an pratik fodre annan sa bon latansyon, gete ki pe arive, ekoute e reflesir.

I ti montre bann partisipan atraver en prezantasyon video bann diferan legzanp staz ki bann dimoun zot manifeste ler zot perdi en fanmir pros, depi akseptans ki sa dimoun nepli la, kot ou rennyen ki sa dimoun in mor, lakoler anver ou prop lekor e avek lezot dimoun, depresyon par sagrinasyon, negosyasyon par met blanm lo ou lekor e rekiperasyon apre lanmor kot ou’n konpran e konnen kwa ki ou pe pas atraver.

Bann konsey ki counsellor Dodin ti pas avek bann partisipan se pour reste atase avek bann pros ki zot vreman kontan ki a ede ranplas sa en ki’n kit zot, gard e petet pratik bann bon souvenir sa ki’n kit zot, reste an bonn sante e pran swen avek lezot, angaz zot dan bann aktivite ki zot kontan, pa konpar zot fason dey avek lezot e finalman zot kapab rod led avek dimoun ki zot annan konfyans avek.

Caption: