Polisi moneter Labank Santral |24 July 2017
Labank santral i enn bann lenstitisyon kle dan en lekonomi. Parey i enportan annan en minister ki zer bidze gouvernman ek bann diferan lazans ki enplimant son bann polisi, i osi enportan annan en lenstitisyon ki responsab sekter finansyel e moneter en pei.
Annan son prop lanmonnen i form parti lidantite ek lafyerte en pep. Enn bann lobzektif prensipal lamazorite labank santral i mentenir stabilite dan pri komodite ek servis, savedir fer sir ki lenflasyon i reste lo en nivo stab. Sa i ankouraz aktivite ekonomik ek lenvestisman e osi asire ki valer lanmonnen nasyonal i ganny prezerve. Bann labank santral i fer sa atraver zot polisi moneter.
Dan ka Sesel, polisi moneter i sa prosedir atraver lekel Labank Santral i kontrol lakantite likidite ki i annan dan sistenm finansyel e endirekteman asire ki lenflasyon i reste lo en nivo akseptab. Labank Santral i enplimant swa en polisi moneter sere oubyen relax baze lo sitiasyon ekonomik aktyel pei e osi depandan lo ki mannyer pri bann servis ek komodite i ekspekte sanze dan prosen 6 a 12 mwan (mwayen term).
Kan lenflasyon i ba e pri pa ekspekte mont dan en fason alarman dan mwayen term, Labank Santral i enplimant en polisi moneter pli relax. Savedir lakantite likidite ki i annan dan sistenm banker i ogmante, ki fer ki to lentere i desann. An vi ki kliyan pa ganny gran reveni lo zot kont labank, sa i motiv zot pour aste plis komodite ek servis pour konsonmasyon, oubyen zot deside envestir atraver bann biznes ki ankouraz lekonomi pour agrandir.
Polisi moneter relax
Si pri pa ekspekte mont dan en fason alarman oubyen i ekspekte desann pli ba ki i ete, Labank Santral i pran desizyon pour enplimant en polisi moneter relax:
