‘Diskour Prezidan Faure in donn nou pei lespwar ek en nouvo vizyon,’ Msye Decommarmond i dir |26 July 2017

«Prezidan Danny Faure atraver son ladres in ekri en lot sapit ansanm avek pep Seselwa e in donn nou pei e nou pep en nouvo vizyon,» dirizan zafer gouvernman dan Lasanble Nasyonal Msye Charles Decommarmond in dir.

Msye Decommarmond ti dir sa letan i ti pe donn so reaksyon lo ladres Prezidan Faure a pep Seselwa pli boner son bomaten.

I ti fer resorti ki bokou dimoun ti pe kestyonnen e demande si Prezidan Faure ti antann bann konplent ki ti pe ganny fer e menm Lasanble ti pe demande si i ti pe antann bann deba ek mosyon ki ti pe ganny fer sorti.

«Atraver son ladres i kler ki nou annan en prezidan ki pe ekoute e ki pe ekout atantivman sa ki pe ganny dir e sa ki pe pase dan nou pei. Atraver sa lekout prezidan in vin devwal direksyon ek vizyon ki i annan pour nou pei.  Me i kler ki sa direksyon ek sa vizyon i pa pou kapab fer tou litousel. I pou bezwen tou dimoun pour anmenn sa vizyon devan pour fer ki nou tou ek nou pei i benefisye,» Msye Decommarmond ti dir.

I ti fer resorti ki pour bokou lannen in met devan dan Lasanble nesesite pour travay dan en fason pour ki tou Seselwa i santi i annan par dan tou sa ki zot fer me sa ti konsern plis lekonomi me ozordi sa i aplik osi pour politik ek lezot devlopman sosyete pour ki nou tou nou benefisye atraver bann bon rezilta ki i anmennen.

Atraver son vizyon nou pe vwar bann keksoz ki prezidan in fer sorti tre kler e sa se ki nou pep ek nou sosyete pa oule lapovrete, pa oule drog, pa oule divizyon, pa oule viktimizasyon me nou oule lape e nou anvi travay ansanm.

Lo size koabitasyon, Msye Decommarmond i dir sa i en keksoz ki pe mars byen akoz i fer ki nou Lasanble Nasyonal pe zwe en rol tre enportan atraver bann diferan mosyon e proze-d-lwa ki ganny diskite e debat, i kler ki legzekitif pe ekoute.

I ti azoute ki osi atraver foronm bann lider ki zot in annan avek Prezidan Faure zot in ganny sans pour osi diskit lo direksyon ki pei i devret ale.

I ti osi fer referans a bann diferan komite ki Lasanble in fer pour asire i annan en foronm pour diskisyon e plis diskisyon.

«Sa i bann keksoz remarkab e fantastik ki pe amelyor leta koabitasyon dan nou pei,» Msye Decommarmond ti dir.

Me i ti fer remarke ki i annan amelyorasyon ki bezwen ganny fer akoz letan i annan progre lo en kote i malere ki staf Lasanble pe servi medya sosyal pour donn en move zimaz e persepsyon lo tou sa bon travay ki pe ganny fer e i ti dir ki i annan nesesite pour sa ganny adrese lo en lot nivo touzour avek bi pour kontinyen amelyor sa latmosfer koabitasyon.

I ti fer remarke ki Prezidan Faure dan son ladres in tous plizyer pwen e size ki tre pertinan e enportan parey lotonomi pour bann lekol.

I ti azoute ki pour Lazournen Ansennyan lannen pase li menm i ti demann bann ansennyan Cascade pour konmans get lekol dan en lot fason e konmans prepar zot pou lotonomi.

«Mon krwar ki sa i ava met an valer sa konsep kot en kominote ki elve e fer grandi en zanfan e lekol Cascade i deza annan en komite ki pe travay avek management lekol pour al dan sa direksyon,» Msye Decommarmond ti dir.

I ti azoute ki i osi annan nesesite fer bann diskisyon pour fer ki i annan bann lesanz ant bann lekol pour partaz leksperyans ek bann bon pratik pour fer tou bann lekol bouz devan e amelyor nivo ledikasyon.

Msye Decommarmond i dir ki avek sa nouvo fason fonksyonnen i ava fer ki i ava annan mwens dimoun ki travay kot Minister Ledikasyon ki a permet li reflesir plis lo son bann polisi ek vizyon gouvernman.

Kot i konsern lapwentman lo bann bord, Msye Decommarmond i dir ki sa i donn sans plis dimoun pour partisip plis dan lavi ekonomik ek sosyal son pei.

«Lontan ti annan konplent ki menm dimoun i lo tou bord me la aprezan tousala pe sanze e plis dimoun pe kapab partisip lo bann bord,» Msye Decommarmond in dir.

I’n demande ki sistenm raportaz sa bann bord i bezwen osi lo en pli o nivo pour anmenn plis benefis pour nou pei ek nou dimoun.

Lo size lanplwa Msye Decommarmond ti dir ki si tou dimoun ti pran en lanplwa nou ti pou napa sa to mank lanplwa 4% e lefe ki nou annan etranze i montre ki nou’n sitan devlope ki nou annan travay pour tou dimoun.

“Nou bezwen pous sa eleman ledikasyon dan nou bann zenn pour fer zot kalifye pour pran sa bann dyob ki etranze pe fer,” i ti dir.

I ti osi met lanfaz lo nesesite pour vwar retraining e donn sans tou nou dimoun.

I ti azoute ki i osi enportan annan lankourazman pour permet Seselwa fer formasyon dan diferan domenn kot i annan etranze.

I ti byen akey lide Public Service Commission ki i dir ava anmenn servis piblik lo en lot nivo kot travayer Seselwa ava ganny peye korekteman.

A sa pwen, Msye Decommarmond ti osi met lanfaz lo nesesite pour dimoun annan plis vokasyon olye mazin zis en dyob.

«I annan bann domenn kot dimoun i bezwen senserman annan lanmour, lanvi, pasyon e serten don pour kapab antre dan bann profesyon parey ansennyan, ners, lapolis, firemen ki demann bann kalite spesyal kot ou travay avek ou leker me i osi annan nesesite pour revwar byen lapey ek pansyon ki al avek sa bann profesyon pour ankouraz dimoun ki kontan pour reste ladan e nou bezwen pouse pour ki sa i ariv vitman,» Msye Decommarmond ti dir.

I ti osi fer remarke ki legzizans pep Seselwa i deplizanpli o me nou bezwen dimoun avek bann kalite neseser pour anmenn sa bann servis lo en nivo ki pli o pour kapab zwenn sa bann legzizans.

Lo size laz pansyon ki prezidan in propoze i ogmante an 2023, Msye Decommarmond i dir i ava en dekourazman pour dimoun ki pa oule pran en lanplwa me ki zis pe esper laz pansyon.

I dir sa bann desizyon i enportan pour nou kapab soutenir nou pansyon.

An sa ki konsern lapovrete Msye Decommarmond i dir i an relasyon avek bann fleo parey drog e ki nou bezwen fer refleksyon lo sa size pour byen definir lapovrete.

I dir i neseser annan en travay konpreansiv pour donn nou en lide kler lo kote sa lapovrete i ete e ki pli meyer fason pour adres li.

«Nou demande ki en legzersis serye i fer pour ki anmenmtan kestyon welfer osi i ava ganny regete,» Msye Decommarmond i dir. I ti fer remarke ki koman en pti nasyon nou kapab sorti dan lapovrete e nou bezwen sorti.

Msye Decommarmond in byen akey propozisyon pour etabli sa bann tribinal ki i dir ava fasilit zot travay e fer nou bouz pli vit  devan e osi rezourd tou sa bann vye issues dan en fason koeran e vit pour anmenn rekonsilyasyon ek linite lo en lot nivo pour permet nou pei grandi ankor plis.

An sa ki konsern koudlavi, Msye Decommarmond i dir sa i en vye size ki lontan pe koz lola e ki plis i annan koze lo la plis koudlavi li i kontinyen monte e ki in ler pour azir lo la a tou nivo.

I demande ki i annan plis konsiltasyon lo nivo distrik lo sa size.

I demande osi ki gouvernman i kontinyen donn bokou plis latansyon lo sa size koudlavi.

A sa pwen i ti koz lo bokou lezot laspe sa size parey to lentere lo lòn, sipor pour bann dimoun ki annan bann lide inovativ, sipor pour bann pti antreprener, pri komodite enporte, ranforsman mezir pour ranmas plis taks, parmi lezot ankor. 

Msye Decommarmond in osi koz fortman an faver sa fon spesyal pour lagrikiltir ki i dir ava met lanfaz lo prodiksyon lokal pour koup lo lenportasyon.

I ti osi pronons son lekor anfaver sa fon pour kanpanny eleksyon ki i dir i en nouvo vizyon me ki i bezwen ganny fer dan en fason byen e prop pour fer ki tou dimoun ki anvi ava kapab partisip dan politik menm  si i napa larzan e i pa milyonner e ki pa larzan ki ava determin politik e plitar met pei dan problem.