Gouvernman i propoz ogmant laz retret sorti 63-an pour vin 65-an |26 July 2017
Avan lafen sa lannen gouvernman pou prezant en lamannman dan lalwa pour fer ki laz retret pou sorti 63-an e vin- 65-an.
E si Lasanble Nasyonal i donn son laprouvasyon, sa nouvo lalwa pou vin an viger apartir le 1er Zanvye lannen 2023, Prezidan Danny Faure in anonse.
Prezidan Faure ti fer sa lanons yer bomaten letan i ti pe adres lepep Seselwa atraver Lasanble Nasyonal.
Prezidan Faure i dir sa i neseser akoz nou annan en popilasyon ki pe viv pli lontan e gouvernman i kwar ki moman in arive pour nou prepar nou popilasyon pour en logmantasyon dan laz retret.
“Nou panse ki 5-an notis i apropriye,” Prezidan Faure in dir.
En lot lamannman, Prezidan Faure in dir pou dan lalwa Fon Pansyon kot la osi laz ki en dimoun ki’n kontribye pou kapab benefisye avek son pansyon sorti laz 60-an pour vin 63-an. Sa osi pou vin anfors apartir le 1er Zanvye 2023.
“Sa i tre enportan si nou anvi adres kestyon soutenabilite e sa i bann desizyon ki nou bezwen pran konman en pei, touzour dan lentere Sesel,” Prezidan Faure in fer resorti.
I ti azoute ki sanzman dan lalwa i selman en parti sa solisyon. Me en popilasyon ki viv pli lontan i depann lo bann servis tel ki lasante, progranm Home Carer, lozman, transportasyon, fasilite rekreasyon, ensideswit.
Anliny avek sa, Prezidan Faure in anonse ki aparti Zanvye 2018 sistenm ledikasyon pou oryante pour ki lekol konman sa lenstitisyon i ganny plis kontrol lo ledikasyon nou bann zanfan.
Head teacher ek son lekip pou pran kontrol konplet lo ladministrasyon lekol, enkli desizyon lo disiplin.
“Letan ki nou zwe minister, lekol, paran, ansennyan ek etidyan kont kanmarad in fini,” Prezidan ti dir.
I ti fer resorti ki zanfan zot bezwen konnen ki zot paran i ekspekte de zot, kwa ki lekol i ekspekte de zot, konn konsekans si lareg i kase.
“Konman paran, konman Prezidan mon pa devret enterfer e les lekol fer son travay,” i ti dir.
“Avek lotonomi ki lekol i gannyen, gouvernman pou osi ogmant bann resours ek zouti neseser pour fer zot travay. Letan kot nou ti “micro-manage” lekol in fini. Administrater lekol i ganny son loryantasyon sorti kot Konsey Lekol,” Prezidan Faure in fer resorti.
I ti osi dir ki tou Lenstitisyon pos-segonder pou osi zer zot prop bidze e annan kontrol direk lo zot ladministrasyon.
“Paran, nou bezwen realize ki letan nou met en zanfan lo later, se nou ki zot premye edikater. E ler nou zanfan i al lekol, annou kontinyen siport nou zanfan. Annou partisip dan zot devlopman e annou apir bann ansennyan ek ladministrasyon lekol,” Prezidan Faure in demande.
In osi demande ki tou dimoun i fer atansyon bann remark, konmanter ek video clip ki nou met lo diferan platform lo rezo sosyal ozordi.
“San ki nou realize, nou pe ede senm lagrenn negativite ki anpwazonn lespri nou bann zanfan ek zenes a en tre zenn-az. Nou tou nou annan en responsabilite kolektif pour promouvwar bann bon valer moral ek spirityel dan nou zanfan ek nou zenes,” i ti dir.
Prezidan Faure in osi lans lapel pour bann zanfan, zenes Seselwa, pour silvouple, servi loportinite ki zot annan pour aprann, aprann, e aprann.
“Lavenir Sesel e lavenir nou pep i depan lo sa ki zot pe fer ozordi e sa ki zot pou ete demen,” Prezidan ti fer zot mazinen.
Lo size lapovrete reel dan nou pei Prezidan Faure in donn langazman gouvernman pour adres sa sitiasyon dan en fason konpreansif.
“Nou pou travay etrwatman avek bann leaders dan kominote. Nou travay atraver Task Force lo Corgate Estate i baze lo en partenarya solid e i ilistre sa nivo langazman. In montre nou ki nou bezwen aziste nou bann polisi, amelyor nou progranm ek servis, e osi byen sanz nou lapros dan lasistans. En nouvo lapros pli kordinen i neseser. Enn ki santre lo bann sitwayen avek bi elev kalite lavi nou bann fanmir,” Prezidan Faure in dir.
I ti azoute ki lazans pour proteksyon sosyal pou bezwen ogmant son kapasite pour ki lasistans pa zis enn ki finansyel, me i enn ki annan swivi ek lakonpannyman sipor pour bann fanmir.
I ti eksplike ki Minister Lafanmir i annan en rol enportan pour li zwe anmezir ki nou sanz nou lapros ek nou polisi.
“Nou pa kapab kit personn deryer. Dignite sak nou sitwayen i bezwen ganny prezerve a tou pri,” i ti dir.
Endepandaman avek sa travay ki gouvernman pe fer pour asire ki lasistans sosyal i enn pli kordinen, Prezidan Faure i dir gouvernman i santi ki i annan en nesesite pour revwar nivo lasistans finansyel ki dimoun ki merite i resevwar. Sa pou pran lefe apartir le 1er Septanm sa lannen.
Anliny avek sitiasyon sosyal ek prezervasyon dignite tou nou sitwayen, i sitiasyon lakaz. “Nou sitiasyon lakaz in ariv en leta kritik,” Prezidan Faure i dir.
I ti azoute ki anplis ki sa bann mezir ki i ti anonse an Fevriye sa lannen, e ki pe ganny enplimante, gouvernman in deside met later a dispozisyon sekter prive lo zil Perseverance pour konstrir ankor omwen 250 younit. Sa mezir i vedir ki gouvernman i a dan en pozisyon pour konsantre lo planifikasyon ek konstriksyon ankor 250 younit dan bann distrik e dan bann rezyon.
Touzour an sa ki konsern konstriksyon lakaz, Prezidan Faure in osi anonse ki 5-an sa lannen apre ki IDC ti ganny demande par gouvernman pour antre dan aktivite konstriksyon lo baz komersyal, gouvernman i kwar ki le moman in arive pour IDC sorti dan sa sekter e konsantre plis lo son manda pour devlopman bann zil. IDC in ganny ziska lafen lannen prosenn pour fer sa.