‘Prezidan Faure in rekonnet sa nouvo fason fer dan Lasanble Nasyonal,’ Msye Ramkalawan i dir |26 July 2017

Dan ladres a pep Seselwa ki i ti fer atraver Lasanble Nasyonal yer, Prezidan Danny Faure in rekonnet sa nouvo fason fer dan Lasanble Nasyonal e bann linisyativ ek bann propozisyon konkret ki pe ganny met devan. Sa i en lankourazman akoz i montre ki nou kapab konman en Lasanble partisip direkteman dan sanz nou pei ek lavi nou pep.

Se dirizan lopozisyon Msye Wavel Ramkalawan ki ti dir sa yer apremidi letan i ti pe donn son reaksyon lo ladres ki Prezidan Danny Faure ti’n fer son bomaten.

Msye Ramkalawan ti dir ki ozordi nou pe viv dan en Sesel kot politik i ganny fer dan en diferan fason, i enn kot nou met lanfaz lo regard nou sosyete, nou pep, nou pei, regarde dan ki direksyon i pe ale e letan nou’n fer sa, pran bann desizyon ki fason nou pou met latet ansanm pour fer li avanse.

“Sa prensip met nou pei ek nou pep premye i sa ki mwan mon’n toultan adopte konman mon filozofi menm si i pa’n toultan ganny konpran e mon kontan ki ozordi dan Sesel politisyen e bokou lezot dimoun pe regarde kwa ki zot kapab fer pour met Sesel ek Seselwa dan en pli bon pozisyon ki ava permet nou pep viv bokou pli byen anmezir ki nou elimin lapovrete, fer desann pri lavi, defet bann fleo, travay dir, donn lazenes en meyer semen posib e donn nou pep en bon lavenir”.

I ti dir ki sa i nou devwar e ki nou pa devret zanmen deroute avek sa fason fer.

“Diskour prononse par Prezidan Danny Faure i enn kot i’n esey adres bokou defi ki nou pei pe fer fas avek,” Msye Ramkalawan in dir.

I dir ki Prezidan in fer en lesey pour kestyonn serten pratik e esey anmenn en solisyon. “In pran en semen rod retir Sesel lo sa brizan ki devan nou e sanz serten move pratik oubyen neglizans ki nou pei pe fer fas avek. Me eski i’n al ase lwen? Eski i’n osi brav? Eski se vreman bann solisyon? Tou sa bann kestyon se lepep Seselwa ki bezwen rod son prop larepons,” Msye Ramkalawan ti dir.

I ti fer resorti ki li konman dirizan lopozisyon me osi konman en Seselwa angaze dan vwar son pei avans devan, i bezwen fer en analiz e vwar ki mannyer nou kapab bouz dan en direksyon ki pozitiv akoz i kler ki Sesel i annan bokou defi.

“Solisyon oubyen nouvo fason fer ki’n ganny prononse i montre nou ki sa bann defi i prezan.

Ki swa lo size drog, ledikasyon, lasante, distribisyon later, relans lagrikiltir, annan en meyer lafors lapolis oubyen konstrir plis lakaz, fer lekonomi grandi… i kler ki nou annan en montanny pour nou grenpe konman en pep,” Msye Ramkalawan ti fer resorti.

I ti dir i kler ki i annan langazman lo lapar sa de kote politik dan Lasanble Nasyonal e osi avek legzekitiv pour met Sesel premye.

Msye Ramkalawan ti fer resorti ki sa sitiasyon koabitasyon ki nou pei i ladan ozordi in kree en nouvo latmosfer kot lafreyer pe disparet, dimoun pe zouir zot drwa e nou pep pe kapab met zot abilite ek konnesans a dispozisyon nou pei.

Dan konteks koabitasyon, i ti dir ki i kler dan diskour Prezidan Faure ki i rekonnet sa nouvo fason fer dan Lasanble Nasyonal e bann linisyativ ek bann propozisyon konkret ki pe ganny met devan.

“Sa i en lankourazman akoz i montre ki nou kapab konman en Lasanble partisip direkteman dan sanz nou pei ek lavi nou pep,” Msye Ramkalawan ti dir.

A sa pwen i ti fer resorti plizyer size deba dan Lasanble Nasyonal ki’n ganny rekonnet e sa i enkli parey;

--Travay komite lo laverite ek rekonsilyasyon nasyonal ki’n resevwar en rekonnesans direk an sa ki konsern letablisman 3 tribinal – enn pour regard size lakizisyon later e anmenn lazistis ek finalite lo sa size, e de lezot lo konpansasyon pour bann dimoun ki’n ganny abize par militer ek lapolis pour rezon politik.

“Konman tyermenn sa komite, mon kapab dir ki sa i en bon desizyon akoz dan bann plent ki’n ganny anmennen devan nou komite i annan en kantite lo sa 2 size. Pli vit ki sa i ganny rezourd, i ava pli bon dan sa semen laverite ek rekonsilyasyon,” i ti dir.

Msye Ramkalawan in profite pour demande ki lapolis ansanm avek bann fanmir i rezwenn pour fer en travay lo sa koksis imen ki ti ganny ranmase Bel Ombre pour kapab met en konklizyon e donn lape spirityel fanmir konsernen.

-- Mosyon lo size later lagrikiltir ek en fon pour relans sa sekter in osi byen ganny resevwar par gouvernman. “Nou swete ki i pa ava menm dimoun ki ava benefisye, me ki bann fermye serye i ava kapab fer en diferans,” Msye Ramkalawan in dir.

 -- Lo size later ek bann lease later endistriel, Msye Ramkalawan i dir i ankor enn fwa welcome sa devlopman e avek letablisman sa komisyon, i dir i swete ki deswit i ava annan en travay serye ki ava permet biznes Seselwa, pti e gro, benefisye e fer zot kontribisyon dan devlopman nou pei. 

“Sa 3 legzanp i montre klerman ki nou Lasanble Nasyonal pe fer sa diferans,” Msye Ramkalawan ti dir.

Touzour lo size later i dir ki in ler pour osi regard lezot later gouvernman e pa zis later endistriel akoz in  annan bokou labi ki’n anpes plizyer fanmir Seselwa ganny zot prop lakour.

Lo size ranforsman bann lenstitisyon, Msye Ramkalawan ti dir ki sa i ankourazan akoz ozordi en Seselwa ki annan son abilite, bon laptitid ek konnesans, i kapab ganny konsidere pour en pozisyon lo bann bord e in demann tou dimoun lo sa bann bord ek lenstitisyon pour zot fer en travay ki drwat, onnet e profesyonnel.

In osi demann bann anplwayer pour donn sa bann dimoun lespas pour zot desarz zot travay e pa pour met okenn lobstak.

An sa ki konsern sa fon pour kanpanny eleksyon, Msye Ramkalawan i dir i konpran sa prensip, me selman fodre nou fer atansyon ki sa pa vin en lenvitasyon pour dimoun krwar ki zot ava zis vin devan konman en kandida pour ganny larzan kanpanny ki zot ava donn bal ladan.  In propoze ki olye donn en kandida larzan avan en eleksyon, ki sa larzan i ava ganny donnen apre en eleksyon apre ki en dimoun i ava montre ki i en kandida vreman serye par ganny en serten poursantaz vot, dizon 10%. Sa i ava elimin labi.

Lo size pansyon Msye Ramkalawan i dir i enn ki dimoun pe deza reazir lo la e ki i annan 5-an pour nou reflesir lo sa size.

“Mon konpran konsern dimoun tel ki dimoun pe osi mor pli zenn e ki dimoun pou bezwen travay plis menm si zot pa tro byen. Lo nou kote, nou pou anmenn sa size dan nou bann miting konsiltatif ki nou fer dan distrik, e nou pou les dimoun donn nou zot lopinyon ki nou ava anmenn devan kan sa deba i vin dan Lasanble. Enn fwa pour tou, nou pei pou bezwen annan en sel pozisyon lo size pansyon, ki i pour travayer oubyen politisyen,” Msye Ramkalawan ti fer resorti.

Asosye avek pansyon Msye Ramkalawan i dir nou bezwen osi met plis lanfaz lo travay pour Seselwa. “Mon pa vwar li akseptab ki nou annan en to 4.7% dimoun ki napa lanplwa, me anmenmtan anviron 1/3 nou mendev i etranze. Sa i en gro kontradiksyon dan limenm ki nou bezwen adrese. Pour fer sa i bezwen 2 kote. Premyerman, fodre ki sa Seselwa i leve e i reklanm sa travay. I bezwen fer li avek en lentere pour li pa trenn son lipye, me pour fer en diferans. Lo lot kote, fodre ki swa sekter piblik oubyen prive i met konfyans dan abilite sa Seselwa. I neseser annan en dyalog ek lankourazman,” Msye Ramkalawan ti fer resorti.