5enm konpetisyon enter-skoler ladans kanmtole ek romans


12-August-2017

Bann etidyan primer, segonder ek pos-segonder i montre zot talan dan sanson ek ladans tradisyonnel

 

Ankor en fwa sa lannen pandan 5enm konpetisyon enter-skoler ladans kanmtole ek romans ki ti fer Vandredi pase bann etidyan tou laz in montre talan ki zot annan pour enterpret nou bann romans e osi dans bann diferan figir nou kanmtole.

Lodyans ti enpresyonen letan Anse Boileau primer ti enterpret romans Ah rendez-moi me pli gro sirpriz ti letan lekol Mont Fleuri ti vin avek Amis partons sans bruit. Ti napa okenn dout dan lespri personn ki ti sa enn lekip ki ti pou sorti venker akoz larmoni dan lavwa sa zenn fiy ek sa zenn garson ti vreman enpresyonan pour zot zenn laz e laplodisman dan lasal ti etourdisan e pa ti sirprenan alor ler sa lekip sorti Mont Fleuri ti pran sa pri.

Pour segonder ti menm zafer. Lekol Anse Boileau segonder ti vin avek en enterpretasyon Bertha ki ti fantastik me pli enpresyonan ti enterpretasyon La grise Hirondelle par lekol Anse Royale segonder ki evidaman ti sorti venker.

Lo kote ladans bann manm ziri ti san dout ganny enpe difikilte pour swazir akoz batay ti for menm ant Anse Boileau primer osi byen ki segonder ki ti pe tap tou pour defann zot bann tit ranporte lannen pase me Beau Vallon ti met zot o defi e balye bann pri pour primer tandis ki Plaisance ti balye pri o nivo segonder. Sa ti fer ki lekol Beau Vallon primer avek lekol Plaisance segonder ti sorti konman meyer lekol e Anse Boileau li i ti bezwen kontant avek dezyenm plas dan toulede kategori.

O nivo pos-segonder la osi batay ti so menm ant Lakademi Lapolis (SPA), Lakademi Tourizm (STA) ek Lakademi Letid Biznes (SBSA) e alafen ti SBSA ki ti sorti konman meyer lenstitisyon pos-segonder ansanm avek STA tandis ki Lenstiti Formasyon Ansennyan (Site) ti sorti dezyenm. 

Bann organizater sa levennman in byen satisfe avek performans bann etidyan ki zot dir sa lannen in vreman alaoter malgre bann defi ki sak lekol i annan.

Msye Norbert Dogley ki responsab bann aktivite lar ek kiltir o nivo Minister Ledikasyon i dir sa lannen zot vreman satisfe avek partisipasyon bann lekol a tou nivo ziska pos-segonder konpare avek lannen pase.

I’n eksprim swe ki zot kontinyen avek sa menm lantouzyazm pour promouvwar nou sanson ek ladans tradisyonnel parmi bann diferan zenerasyon.

Me malgre sa bon partisipasyon in osi annan lekspresyon mekontantman konsernan rezilta e osi ler ki sa final in fer e kote in deroule.

I annan paran ek lezot manm piblik ki dir sa konpetisyon ti’n devret ganny fer dan en landrwa pli konvenab kot plis dimoun ti ava ganny sans pour vin vwar e apresye parey dan ICCS  e non pa dan en pti sant kominoter parey Roche Caiman kot bokou ki ti’n vini ti bezwen debout deryer akoz mank lespas.

Msye Dogley i dir zot okouran sa me zot in napa swa akoz zot in ganny difikilte pour ganny en landrwa akoz partou ti’n boukte e ki zot swete ki par lannen prosenn renovasyon lo Lasal Teat Nasyonal i ava pare atan pour 6enm konpetisyon.

 

 

 

 

 

 

 

 

 

 

 

 

 

 

Send your comment :

Name *

Email *

Comment *