3enm Konferans lapres prezidansyel |17 August 2017

Prezidan Faure i adres plizyer size pertinan

Si pou annan eleksyon konsey distrik lannen prosenn, reaksyon gouvernman lo rezilta rapor oditer lo FIU ek NDEA, progre dan koleksyon sa 1 bilyon roupi larzan taks ki pa ti ankor ganny ranmase, stati sa lakor militer ann Lenn ek Sesel lo size zil Assomption, lanket dan disparisyon Marvin Asba e nesesite pour lapolis amelyor kominikasyon ek relasyon ant bann pei larezyon…

Sa i zis serten parmi bann kestyon ki zournalis ti demann Prezidan Danny Faure dan 3enm konferans lapres ki ti deroule State House yer swar e ki ti pas an direk lo radyo ek televizyon SBC.

Lo size eleksyon konsey distrik ki sipoze fer lannen prosenn Prezidan Faure in dir ki en diskisyon pe deroule pour vwar si i annan nesesite pour repous sa prosesis vi kou finansyel ase sibstansyel ki atase avek. I’n dir ki gouvernman i ekspekte pronons li lo sa size ver lafen lannen.

An sa ki konsern reaksyon gouvernman lo rapor oditer lo size FIU ek NDEA ki komite Finans Lasanble in met a latansyon piblik, Prezidan Faure in dir ki li konman Prezidan i respekte tou bann lenstitisyon ki anplas pour fer sa bann travay e ki FIU ek NDEA zot anba mikroskop e sa i baze lo prensip bonn gouvernans, transparans ek rann kont e in eksprim swe ki tou bann ki konsernen e ki’n ganny demande pour vin devan pour reponn kestyon zot fer li e ki letan tou bann fe i ava fini etabli, lepep Seselwa ava dan en pozisyon pour fer son prop zizman.

Lo size sa plis ki 1 bilyon roupi larzan taks ki pa ankor ganny kolekte, Prezidan i dir travay pe fer pour ranmas sa bann larzan e ki byento lepep Seselwa ava ganny plis detay lo travay ek progre ki pe fer lo sa size dan bidze ki Minis Finans pou prezante devan Lasanble le 31 Oktob.

Konsernan detay lakor ki Sesel i annan avek gouvernman Lenn lo size fasilite lo zil Assomption, Prezidan Faure in eksplike ki sa de pei i annan en lakor etrwat dan plizyer domenn enkli ladefans e ki Sesel ti ava kontan annan son prop fasilite lo sa zil etabli avek sipor gouvernman Lenn.

“I annan sa volonte lo lapar gouvernman Lenn pou revwar sa lagreman,” Prezidan Faure in dir.

Letan i ti reponn en kestyon lo size efikasite ek konpetans lapolis dan lanket konsernan disparisyon Marvin Asba, Prezidan Faure i dir nou’n perdi tro bokou letan dan sa ka.

“Fodre pa i arive ki letan en sitwayen i anmenn en plent devan nou zwe dan papye akoz nou perdi letan,” Prezidan in dir.

I ti azoute ki dan en sitiasyon parey nou bezwen azir vit e lapolis i bezwen annan posibilite pour kapab telefonn en koleg dan larezyon pour eksplik en sitiasyon e rod lasistans vitman e ki sa i mars avek konpetans, avek standar e avek protokol.

I ti fer resorti ki i annan defayans dan sistenm ki fodre ganny adrese.

Prezidan Faure i dir i konpran soufrans fanmir Marvin akoz sa garson i enn nou zanfan e konman paran nou tou, enkli li osi, ti ava swete sa garson ti ava ganny retrouve.

I dir i swete ki sa bann eksper ki dan pei e osi byen ki rezilta DNA ava kapab etabli kwa ki’n vreman arive avek sa garson.