En nouvo progranm formasyon pour bann madanm i lanse dan Dyosez Katolik |21 August 2017

En nouvo progranm formasyon pour bann madanm in lanse dan Dyosez Katolik avek bi ed bann madanm Seselwa redekouver zot vre valer konman fanm dan sosyete san get zot stati sosyal pour pli byen ekip zot pour zot konn e pran zot vre plas dan zot fanmir, zot kominote, zot landrwa travay osi byen ki dan sosyete an zeneral.

Seremoni ofisyel pour lans sa progranm ti deroul Zedi apremidi dan lasal konferans STC e ti asiste par Minis responsab Zafer Lafanmir Madanm Jeanne Simeon, responsab Dyosez Katolik Levek Denis Wiehe, reprezantan Dyosez Anglikan Reveran Danny Elizabeth osi byen ki plizyer madanm sorti dan diferan kous sosyete.

Sa progranm i viz bann madanm ki pa neseserman pre avek legliz me ki an gran bezwen sipor pour kapab fer fas avek plizyer defi konman fanm, konzwen, manman e dan plizyer ka konman sa enn ki a latet zot fanmir.

Sa progranm formasyon ti fonde Moris an 2007 par Madanm Gina Poonoosamy, en madanm ki’n fer bokou letid dan domenn sosyal, teolozi ek lasyans imen, spirityalite  atraver diferan retret spirityel osi byen ki swiv plizyer formasyon lakonpannyman spirityel dan legliz.

Ti  an 2015 ki sa progranm ti ganny entrodwir dan Dyosez Katolik isi Sesel apre ki Madanm Poonoosamy ti’n annan en rankont avek responsab dyosez, Monsenyer Denis Wiehe, ki ti byen akey sa progranm.

Lannen pase Madanm Poonoosamy ek en lot madanm responsab sa formasyon ti retourn Sesel pour konmans demars pour lenplimantasyon sa formasyon isi.

Pandan zot sezour zot ti zwenn e annan diskisyon avek responsab Komisyon Formasyon dan dyosez Ser Alice Vivien ki’n ganny responsabilite pour fasilit sa bann demars e deswit avek plizyer madanm ki ti’n montre lentere pour fer sa dekouvert, sa group in konmans en progranm pour sansibiliz lezot madanm e zot pe zwenn toulemwan pour reflesir lo plizyer size an relasyon avek madanm.

Ozordi dan dyosez i annan en senkantenn madanm tre motive ki’n vin devan e pe montre gran lentere pour partisip dan sa formasyon entansif ki’n konmanse Vandredi pase pour bann formatris ki ava swiv apre par formasyon pour bann group madanm dan bann parwas.

Formasyon i konm swivan: 5er apremidi a 8er diswar tou le Lendi apartir 4 Septanm dan parwas St Roch, Bel Ombre; tou le Mardi apartir le 5 Septanm dan parwas St Jean Bosco, Pointe Larue; tou le Merkredi apartir le 6 Septanm dan parwas Ste Therese, Plaisance; tou le Zedi apartir le 7 Septanm dan parwas Notre Dame des Sept Douleurs, Anse Boileau e apartir wikenn le 8 -10 Septanm dan parwas Notre Dame de l’Assomption, La Digue.

Sa progranm formasyon i en parkour e non pa en groupman e i pou ed bann madanm redekouver zot menm e reganny zot dignite.

I en dekouvert personnel avek Zezi e apre ki zot in swiv e termin sa formasyon sa bann madanm zot ekspekte vin sa vre legzanp pour lezot madanm dan zot kominote.

Pandan seremoni lansman Zedi apremidi plizyer personalite ti pran laparol e ti koz an faver sa progranm formasyon e sa ti enkli sekreter prensipal pour Zafer Lafanmir Madanm Marie-Josée Bonne, Monsenyer Wiehe ek Madanm Poonoosamy zot menm, osi byen ki Ser Alice Vivien.

Madanm Poonoosamy ek de lezot madanm Morisyen pou isi pour trwa mwan pour diriz sa bann sesyon formasyon.

Dan son ladres Madanm Bonne ti transmet swe felisitasyon sorti kot Prezidan Danny Faure pour sa bann madanm pour sa linisyativ.  

Madanm Bonne ti fer resorti ki sa formasyon in alor ariv Sesel a en bon moman e in asir sa trwa formatris sipor gouvernman dan zot parkour atraver Minister Zafer Lafanmir.

“Ler nou regard atraver nou pei nou vwar bokou zoli fanm Seselwa avek labote eksteryer me nou osi bezwen labote enteryer. Nou bezwen annan lape dan nou lespri e dan nou lavi pour ki nou kapab fer fas avek bann defi ki nou pe viv ladan dan sa 21enm syek. Nou konnen ki Sesel pe fer fas avek bokou problenm e premye pour ganny touse se bann madanm ek bann zanfan e menm si i pe fer son mye, gouvernman li tousel pa pou zanmen kapab rezourd e anmenn solisyon pour tou problenm,” Madanm Bonne ti dir.

Sa seremoni ti osi enkli sesyon lapriyer e plizyer sanson ki onor bann fanm par Janny Deletourdie ek Sandra Esparon.