Follow us on:

Facebook Twitter LinkedIn YouTube

Archive -Youth

18enm Festival Lazenes (17 -27 Out, 2017) - En nouvo polisi byento pour lazenes |25 August 2017

 

 

 

 

• En premye travayer lazenes i pran son retret

 

“En nouvo polisi pour lazenes pou ganny prezante boner lannen prosenn e tou bann zenn i bezwen vwar zot ladan,” Minis pour Lazenes, Spor ek Kiltir Madanm Mitcy Larue in anonse.

Minis Larue in dir ki travay lo sa nouvo polisi lazenes in deza konmanse avek en legzersis konsiltasyon ki son premye sesyon in fini fer lo La Digue kot bann zenn Zil Pros in partaz zot laspirasyon ek lide. Sa legzersis i ekspekte kontinyen dan tou rezyon lo Mahé e osi Praslin.

Minis Larue ti fer sa lanons pandan seremoni louvertir 18enm Fetival Lazenes ki ti fer yer apremidi dan ICCS.

Prezan kot sa seremoni ti plizyer minis ek bann o zofisye gouvernman osi byen ki en delegasyon etranze frankofonn ki isi dan kad progranm antreprenarya lazenes frankofonn ek plizyer zenn sorti dan diferan mouvman anba Konsey Nasyonal Lazenes.

Festival Lazenes in komanse depi le 17 e pou ale ziska le 27 Out. Sa lannen sa festival pe deroul anba tenm ‘Selebrasyon Langazman Lazenes’.

Minis Larue in dir ki pandan sa bann zour festival, pou annan dyalog avek bann zenn par Seychelles Behavioural Committee ki pou ede rod solisyon pour risk ki zenn i ganny ekspoze avek.

“Ser zenn fer zot partisipasyon konte, anmenn zot lide akoz sa nouvo polisi i enn ki bezwen reflekte laspirasyon ek realite tou zenn dan Sesel,” Minis Larue in demann bann zenn e in fer zot rapel ki nanryen pa kapab ganny fer pour lazenes san lazenes zot menm.

I ti osi demann bann zenn pour profit sa moman festival pour partisip plennman dan tou bann aktivite ki Konsey Nasyonal Lazenes avek son bann partener in prepare pour zot pour permet zot demontre zot kapasite ek zot talan.

“Akoz sa i letan pour nou dekouver potansyel bann fitir vedet dan lanmizik ek lezot form lar,” Minis Larue ti dir.

Me i ti osi fer resorti ki i moman kot zenn i bezwen reflesir lo zot lavenir fas a bann defi ki zot fer fas avek.

I’n demann zot pour sezi tou loportinite ki pei i met a zot dispozisyon atraver bann diferan progranm Konsey Nasyonal Lazenes pour realiz zot rev e fer fas avek defi lemonn ozordi.  

Minis Larue in profite pour salye e remersye bann zenn pour zot bann linisyativ ek kontribisyon pozitiv dan sosyete e la i ti donn legzanp batay ki zenn zot menm in anmennen pour elimin plastik dan pei.

“Sa i montre laprev sikse lo ledikasyon proteksyon lanvironnman ki’n vreman ankre dan nou zenn. Sa i montre zot abilite konman zenn pour vwar kekzoz atraver en nouvo dimansyon i enportan pour enspir  nouvo lide ek solisyon,” Minis Larue ti dir.

“I pour sa rezon ki gouvernman, lepep Seselwa i selebre ansanm langazman lazenes,” Minis Larue in fer resorti.

Pandan sa seremoni yer apremidi Konsey Nasyonal Lazenes in pour premye fwa remersye enn son travayer ki pe pran son retret. Madanm Marilyn Joseph, ki’n en ansennyan pour plis ki 47-an, in temwanny kreasyon Mouvman Zenn Sitwayen e apre in travay avek bann zenn dan sa mouvman depi 2003  ziska son retret. I’n direkter sa mouvman pour plizyer lannen. I ti resevwar en souvenir ek tokenn lapresyasyon sorti kot konsey Nasyonal Lazenes prezante par Minis Dezinyen Madanm Macsuzy Mondon.

Sef egzekitif Konsey Nasyonal Lazenes Msye Alvin Laurence i dir konsey ek lazenes Seselwa pa pou zanmen fini remersye Madanm Joseph pour sa disiplin ek devouman ki i’n annan pour bann zenn Seselwa.

“Laport i toultan ouver pour ou si ou anvi retournen,” Msye Laurence in dir avek Madanm Joseph. 

Madanm Joseph pou ganny ranplase dan sa pozisyon par Madanm Anne-Marie Adrienne.

Lo size tenm pour sa festival limenm, Msye Laurence in dir ki pandan en lannen konsey pou selebre sa tenm e osi 20-an kot lazenes in annan en langazman spesyal dan pei ki pe kontinyen ranforsi.

Msye Laurence in koz fortman lo langazman lazenes dan konsiltasyon ki’n konmanse lo La Digue pour nouvo polisi lazenes kot i dir zenn in met devan zot kontribisyon e enn parmi i nesesite pour revwar laz ki defini zenn isi.

Parmi bann lezot size pertinan ki Msye Laurence i dir bann zenn in fer resorti i nesesite pour zot osi ganny akse avek tou nou bann zil.

“Sa bann zil i pour tou Seselwa e non pa zis bann politisyen. Zenn osi pe demande pour zot osi kapab dekouver nou bann zil e Konsey Nasyonal Lazenes pe pran sa langazman pour fer sir bann reprezantan dan Lasanble e dan gouvernman i tann zot lavwa e fer sa vin en realite,” Msye Laurence ti dir.

Parmi lezot dimoun ki ti adres bann zenn ti tyermenn nouvo bord Konsey Nasyonal Lazenes Msye Marcus Hoareau ki ti prezant tou bann lezot manm sa konsey ki in dekri konman en lekip dinamik e angaze pour travay pour tou zenn.

Msye Hoareau in dir sa tenm ki’n ganny swazir i dir bokou lo kontribisyon bann zenn dan zot kominote e dan sosyete me ki i osi en lapel pour zot ranforsi sa ki zot deza pe fer. Nou demann tou bann lezot zenn pou leve e angaz zot e pran bann loportinite pour devlop zot prop prosperite.

“Sosyete in met bann lenstitisyon, fasilite ek lenfrastriktir a nou dispozisyon e i depan lo nou pour reserse kot nou vwar laport ouver pour nou prop devlopman. I annan bokou zenn ki pe travay dir pe kontribye e ki’n fer bokou progre e mon felisit zot. Me pour bann zenn ki’n glise e tonbe dan fleo sosyal ki pe afekte zot lavenir, nou ki pe debout nou bezwen esey ed zot pour releve e redrese,” Msye Hoareau in demann tou son bann kanmarad zenn.

Osi pandan sa seremoni louvertir bann etidyan plizyer lekol ki ti pran par dan spektak pour Lazournen Nasyonal, e osi bann ki dan plizyer mouvman ki ti pran par dan parad ti resevwar sertifika.

Sa seremoni ti enn ki ti byen vivan avek en prezantasyon video ki montre lakonplisman bann zenn e osi plizyer sanson ek morso ladans par bann zenn.

Bann aktivite sa festival lazenes pou kontinyen pandan sa wikenn avek en sesyon spesyal Lasanble Lazenes demen e en bazar lazenes, lanmes spesyal ek lezot aktivite lwazir ki pou deroul Baie Lazare Dimans.

 

 

 

 

 

» Back to Archive