Dezord dan plizyer parti distrik lo Mahé |28 August 2017

En zofisye lapolis ek 7 droger i admit lo ward kot Lopital Sesel

Ti annan plis zofisye lapolis pe travay Sanmdi apremidi ek aswar e sa i mezir ki ti’n ganny pran pour evite ki bann droger i fer dega parey ti leka Vandredi swar.

Komisyonner Lapolis Reginald Elizabeth ti dir avek medya Sanmdi apremidi ki «lapolis pa pou toler okenn dimoun oubyen group dimoun kre dezord dan sosyete».

Msye Elizabeth ti dir ki lapolis i konsernen avek plizyer lensidan lager lo semen an servan gran kouto, sopin, baton ek mayos.

Sa bann lensidan ti ganny raporte Vandredi swar Corgat Estate, Les Mamelles, Lari Hangard, Mont Buxton, Petit Paris, Anse Aux Pins, Plaisance ek Anse Royale. Pli gran lafoul ti Les Mamelles kot plis ki 50 dimoun ti enplike dan en bagar, ek kot Chetty Flat, Anse Aux Pins.

Komisyonner Elizabeth i dir ki dapre lenformasyon, sa bann dezord i relye avek en rediksyon dan lakantite drog ki annan lo marse lo Mahé e serten droger in menm fer per bann vander ki’n bezwen deplase se zot.

Lapolis ti menm ede pour anmenn plizyer dimoun lopital kot zot ti ganny swen medikal apre large. Serten in menm ganny admit lopital e 2 i anba larestasyon lapolis.

Dan en lensidan separe Roche Caïman Vandredi swar, komisyonner lapolis i dir ki enn son zofisye ti ganny tape avek ros e in ganny admit Lopital Sesel.

I dir ki de group dimoun ‒ en group 3 ek en lot group 10 ‒ ti’n al rod en zenn onm pour bate e lapolis ti ganny alerte lo sa lensidan.

Trwa (3) dimoun in gany arete dan sa enn lensidan.

Touzour dapre komisyonner Elizabeth, i ti zwenn avek son bann zofisye sinyor Sanmdi bomaten pour reviz fason travay e deplway plis gard lo semen.

I ti osi lans en lapel avek bann dimoun prominan dan sosyete ensi ki bann partener ki travay tre pros avek lapolis pour koz lo sa sitiasyon e ed lapolis dan son demars pour gard lord dan pei.

«Mon fer en lapel avek bann dimoun ki pe servi drog: ‘Pa fer vyolans, rod tretman’,» Msye Elizabeth ti dir.

Vi ki dapre lenformasyon lakantite drog lo marse in redwir e alors pri i vin pli ser, manm piblik pe osi ganny demande pour vin pli alert avek zot propriete. Sa i akoz bann droger ki pa travay i bezwen plis larzan pour zot aste drog. E souvann fwa zot bezwen al vole pour ganny larzan.

Touzour dapre lapolis, zot ti bezwen entervenir Plaisance ek Remise Estate Sanmdi swar pour dispers bann dimoun ki ti pe fer dezord.

Zournal Seychelles NATION ti osi kontakte Lazans pour Lasante e son sef egzekitif, Dokter Danny Louange, in konfirmen ki 12 droger ti raport lopital Vandredi swar.

«Sept (7) ti ganny admit Vandredi swar pour resevwar tretman akoz zot ti pe soufer avek withdrawal. Sa lot senk (5) ti ganny large,» Dr Louange ti dir.

Letan nou zournal ti al enprimen yer swar, sa 7 droger ti ankor lo ward kot Lopital Sesel.

Dokter Louange ti azoute ki pandan lazournen epi aswar Sanmdi, 4 lezot droger ti raport lopital me zot ti zis ganny tretman apre al se zot.

Vi ki lakantite droger ki al dan staz withdrawal i kapab ogmante, Dokter Louange in dir ki Minister Lasante pe fer provizyon pour ed zot.

«Nou bezwen ed zot, sirtou bann ki napa landrwa reste. Nou admit zot akoz nou pa oule zot al dormi dan semen,» Dokter Louange in dir.