En lamars an sipor bann fanmir |28 August 2017
Legliz Advantis Sesel an kolaborasyon avek Minister Lafanmir ti organiz en lamars anba temn ‘Sov Nou Bann Fanmir’ ki ti fer dan lavil Victoria, yer bomaten.
En gran group dimoun tou laz ti’n rann lapel pour sa aktivite ki ti konmans kot Unity Building, lo semen Palm Street.
En manm organizater Joanne Ratsara sorti kot Legliz Advantis ti dir ki zot in organiz sa lamars akoz zot konsernen ek lakantite fanmir ki pe kase akoz drog ek bann lezot fleo sosyal ki pe afekte lafanmir.
Dan lafoul ou ti kapab remark prezans Minis pour Lafanmir Jeanne Simeon, Minis pour Lazenes, Spor ek Kiltir Mitcy Larue, sekreter prensipal pour zafer sosyal Linda William Melanie, serten manm lasanble nasyonal parmi lezot ki ti prezan pour anmenn zot sipor.
Osi prezan dan lafoul ti prezidan legliz Advantis Sesel, ki baze Sid Afrik, Paster Paul Ratsara.
Avek bann diferan plakar ek slogan lo lafanmir, sa lamars ti fer direksyon sant Victoria kot bann partisipan ti sante e kriy bann slogan tel ki ‘Sov nou fanmir’, ‘Sov nou zanfan’, ‘Elimin drog dan nou fanmir ‘, ‘Aret vann drog dan nou lekol’, eksetera...
Zot ti desann ver lorloz, pas lo semen Francis Rachel, pramn semen 5th June Avenue, pas lo Manglier Street e antre lo Freedom Square kot en seri aktivite divertisman ek lwazir ti’n ganny organize par en lot kolaborater sa lamars lasosiasyon ‘Sov nou Zanfan’.
Mike Rose, en partisipan sa lamars, ti dir : “Mon’n deside zwenn sa lamars akoz i en fason pour montre sipor pour sosyete akoz tou keksoz i konmans par lafanmir. Si ou napa en fanmir solid ou pou napa en sosyete ki solid e alor si i annan sa bon lanmour dan en fanmir, i annan sa kominikasyon solid ou pou vwar ki tou keksoz pou marse. Alor mon konsey se ki bann fanmir i vin solid pour ki nou kapab vwar en sosyete ki meyer».
En lot partisipan, Tracy Cecile, ti dir ki i’n deside zwenn sa lamars akoz i ti a kontan vwar sanzman dan konportman bann fanmir dan nou pei.
«Akoz pe ariv tro bokou bann problem, bann sitiasyon kot pli ale nou vwar nou bann zenn, bann marmay lekol, tousala pe tonm dan drog, dan lalkol e dan bann diferan problenm e mwan, mon kapab dir ki sa bann problenm i konmans dan lafanmir,» i ti fer resorti.
Dan en diskour lo Freedom Square apre sa lamars, Minis Simeon ti dir ki ozordi i montre klerman ki tou dimoun i bezwen kanmarad e pour donn sipor kanmarad e ki gouvernman ansanm ek lasosyete sivil i bezwen travay ansanm pour arive donn sipor bann fanmir, espesyalman bann fanmir ki vwar zot dan gran difikilte. Me, ki bann fanmir osi zot leve e pran zot responsabilite pour zot kapab sirmont zot bann problenm e pa toultan esper lezot pour rezourd tou zot problem.
«Si nou kapab travay e i annan loportinite pour travay akoz ki nou bezwen depan lo welfer e fer mizer nou fanmir ek nou bann zanfan? Si nou valoriz nou lasante akoz nou pa pran responsabilite pour reste an bonn sante? Akoz ki nou ferm nou lizye ler nou zanfan i fer en keksoz mal premye fwa, dezyenm fwa e les sitiasyon deteryore avan ki nou pran aksyon ouswa rod lasistans pour redres sitiasyon ?» Minis Simeon ti demande.
Dan son mesaz pour sa bann fanmir ki trouv zot dan difikilte, anba tenm sa lamars ‘Sov Nou Bann Fanmir’, Minis Simeon ti dir ki lasosyete i anvi, i pare pour sov zot me zot bezwen osi pare pour esey sov zot lekor.
«Nou nou la pour donn zot tou sipor posib atraver tou bann tetap,» i ti dir e demann zot pour pa bliye pour reste konnekte avek Bondye si zot anvi reisir.
Minis Simeon ti remersye Legliz Advantis pour son linisyativ pour organiz sa lamars e tou lezot partener ki’n ede ki sa aktivite in kapab pran plas.
Paster Ratsara ti dir vi ki lafanmir i labaz lasosyete e ki tou sikse i konmans dan lafanmir, tou son bann negativite i osi sorti dan lafanmir.
I ti dir ki fason pour sirmont bann difikilte lafanmir i reste responsabilite sa endividi e pour pa esper en lot pour fer li pour nou.
Sanmdi bomaten ti annan en lamars preski dan menm zanr kot serten denominasyon relizyez kretyen ti zwenn ansanm pour en lamars ‘Pour Zezi’. Zot ki ti konmans kot stenn bis avek bann diferan plakar e slogan, pas Lari Albert, kot lorloz, lari Lendepandans e al fini kot ansyen zarden zanfan kot zot ti kontinyen sant laglwar pour Zezi parey Reveran Hermitte Freminot ti fer remarke ki se Zezi ki pou kapab sanz tou sitiasyon negativ dan Sesel parmi bann lezot slogan.
