Distrik Bel Air ek Ile Perseverance Prezidan Faure i vizit proze kominoter e ekout konsern zabitan |05 September 2017

Prezidan Danny Faure in kontiny son bann vizit yer dan distrik Bel Air ek Ile Perseverance 1 ek 2.

Akonpannyen par reprezantan plizyer lazans dan pei osi byen ki bann diferan departman ki tonb anba son lofis, Prezidan Faure ti konmans son vizit kot Msye Felix Suzette, en sitwayen aze anler San Soucis. Apre sa i ti desann apye pour al vizit nouvo day care centre Home 2 kot i ti diskit avek responsab Sheila Uzice e osi enterakte avek bann zanfan. I annan aktyelman 70 zanfan ki sorti enpe partou lo Mahé ek 10 travayer kot sa day care.

Prezidan Faure ti apre al vizit en landrwa Curio Road kot i ekspekte annan en proze semen e apre desann pour al vwar landrwa kot en lot proze semen i ekspekte fer Stevenson Delhomme Road kot en semen pyeton i ekspekte ganny transformen an en semen segonder kot transpor i kapab pase. Sa semen i ekspekte vin zwenn avek semen prensipal Bel Air.

Prezidan Faure avek son delegasyon ti apre fer en pti rankont avek lotorite distrik Bel Air ki ti enkli son manm Lasanble Msye Norbert Loizeau ek son ladministrater distrik Madanm Alexandrine Zelia.

Apre sa Prezidan Faure ti diriz ver Ile Perseverance. Laba i ti vizit plizyer zabitan dan zot lakaz osi byen ki  vizit plizyer landrwa kot i ekspekte annan bann proze devlopman.

Lapolis ki deservi sa de vilaz Ile Perseverance i sitye dan Ile Perseverance 1 e i pe fonksyonn konman en substation avek distrik Anse Etoile e son bann loperasyon ek servis enkli son kaso i trouve dan 2 lakaz 3 lasanm ki’n konverti an lofis pour li kapab donn bann servis ki lapolis i donnen.

Prezidan Faure i dir i annan nesesite pour annan en nouvo stasyon lapolis Ile Perseverance.

“Dimoun in ogmante, problenm osi in ogmante e i annan nesesite pour annan plis mendev e en bon landrwa pour lapolis donn son servis,” Prezidan in dir.

I’n fer resorti ki gouvernman in fini donn en morso teren pour konstrir en nouvo stasyon pour lapolis Ile Perseverance e ki sa size pou ganny priyorite e diskite pli afon dan Konsey Minis demen.

“I neseser annan en proper kordgard ekipe Ile Perseverance akoz dimoun i bezwen sipor lapolis,” Prezidan Faure in fer resorti.

Responsab sa stasyon, Asistan Sirentandan (ASP) Wilson Denis, i dir ki krim in ogmante e vyolans domestik lapolis i bezwen deal avek preski toulezour.

I ti profite pour met tou konsern ek difikilte ki lapolis Ile Perseverance pe fer fas avek a latansyon Prezidan Faure e anmenn li vwar kote bann zofisye i travay.

Pandan ki Prezidan Faure ti dan vilaz Ile Perseverans 1 i ti osi vizit en zarden zanfan ki dan en leta enpitwayab e ki dapre administrater sa vilaz, Christina Dora, zanfan pa kapab zwe akoz bann aktivite ilegal ek bandisite ki deroule dan sa landrwa.

Prezidan Faure in demande ki sa zarden i ganny redevlope avek en nouvo konsep.

I ti fer resorti ki mannyer sa landrwa i ete aktyelman lapolis pa kapab byen egzers son lotorite me ki son striktir i bezwen ganny revwar.

En lot proze ki Prezidan Faure ti vizite i trouve Ile Perseverance 2 e sa i en morso teren vid kot i annan propozisyon pour fer en proze esplanad me akoz sa proze pa ankor materyalize apre plizyer lannen, sa landrwa pe ganny servi pour tou sord kalite aktivite ek konportman anti sosyal. Menm si sa landrwa in a plizyer repriz dan lepase ganny netwaye i aktyelman dan en move leta e Prezidan Faure in demann reprezantan tou bann lazans konsernen ki ti la dan sa vizit pour fer konsiltasyon neseser pour asire ki sa landrwa i ganny netwaye pandan sa mwan e ki i konmans ganny byen mentenir e lalimyer i ganny mete kot i neseser si posib.

Lo son kote sekreter prensipal pour departman lenfrastriktir dan Minister Labita, Msye Yves Choppy, in dir ki plan pour fer sa devlopman esplanad dan sa landrwa pe ganny finalize.   

Lo son kote Msye Choppy i dir ki bann proze zot ganny retar akoz i demann bokou finansman e bann proze zot ganny fer baze lo priyorite ki gouvernman i annan osi byen ki finansman ek kordinasyon ant plizyer lazans.

En lot sit ki Prezidan Faure avek son delegasyon ti vizite i enn trouve obor laboutik Kannu’s, touzour dan Ile Perseverance 2, ki’n ganny demarke pour fer en konpleks komersyal e osi landrwa pour bann pti antreprener fer e vann zot bann prodwi dan domenn lakoutir, lartizana osi byen ki salon kwafir pour nonm enn de.

Prezidan Faure in demann lotorite sa de vilaz pour vwar tou bann bezwen dimoun e pour analiz bann ki fer sans e anmenn devan kot gouvernman atraver Minister ki responsab pour Lendistri, Devlopman Lantreprenarya ek Linovasyon Biznes.

Prezidan in dir ki sa size pou ganny diskite dan Konsey Minis demen avan ki diskisyon i ganny fer avek Fon Pansyon Sesel ki ava kree bann striktir ki kapab siport sa bann zabitan.

An sa ki konsern sa proze lakaz prefab  140 younit ki trouve dan Ile Perseverance 2 kot bann zabitan pe rankontre bokou problenm defo konstriksyon avek sa bann lakaz, sa bann fanmir zot ekspekte sorti  lannen prosenn pour ki sa bann lakaz i ganny rearanze.

Prezidan Faure i dir sa bann younit pa pou ganny vann me pou antre dan stok lakaz ki gouvernman i ava lwe.

Lo kote sa bann defayans Prezidan i dir fodre annan mezir pli strik pour deal avek bann kontrakter e i’n osi demann PMC pour vin pli proaktif e azir vitman letan bann zabitan i anmenn zot konsern vizavi problenm ki zot rankontre avek bann lakaz.

Bann portre ki akonpanny lartik i montre Prezidan Faure ek son delegasyon pandan vizit yer dan distrik Bel Air ek Ile Perseverance.