Prezidan i demann plis lord Ile Perseverance |05 September 2017
Prezidan Faure in felisit Christelle avek Daniel Simeon (portre agos) ek Madanm Miriam Pool pour byen antretenir zot landrwa
I neseser etabli lord dan sa de vilaz Ile Perseverance akoz gouvernman in depans en kantite larzan pour kre sa de vilaz e si nou pa fer atansyon Ile Perseverance i kapab vin en landrwa vreman problematik e i annan nesesite pour donn priyorite lafors lapolis.
Se Prezidan Danny Faure ki ti dir sa yer apre ki i ti’n fer letour sa de vilaz akonpannyen par en delegasyon reprezantan bann diferan lazans osi byen ki ladministrater sa de vilaz -- Christina Dora pour Ile Perseverance 1 e Pharisianne Lucas pour Ile Perseverance 2.
Prezidan Faure in fer rapel ki avan ki bann zabitan ti antre dan sa de vilaz plizyer lannen pase ti annan rankont avek zot kot zot ti tonb dakor ki pou annan serten lareg ki zot bezwen swiv e tou dimoun ti konnen kwa ki lotorite i ekspekte de zot e zot kwa ki zot ekspekte avek bann lotorite.
“Me mon krwar nou pa’n tenir nou parol lo toulede kote e bann keksoz ki pe arive in vin en norm e en pratik. Alor i annan en gran zefor pour nou fer kolektivman pour retourn lo sa ki bann dimoun ti ganny dir depi o konmansman avan zot ti antre dan vilaz,” Prezidan Faure in dir.
In osi fer resorti nesesite pour ki tou bann lotorite konsernen i enform biro ladministrasyon distrik (DA) letan i annan nouvo dimoun ki vin reste dan Perseverance pour ki sa biro i a son tour enform lapolis ek lezot lazans konsernen.
I dir sa networking par bann lotorite kot lenformasyon i ganny pase i tre enportan.
Apre ki i’n ekout bann konsern ki lapolis in met devan e logmantasyon dan ka krim ek vyolans domestik ki ganny raporte preski toulezour, Prezidan Faure in dir i annan nesesite pour revwar fonksyon bann striktir ki fer marse sa de vilaz.
Dan bann landrwa kot dimoun i groupe pour fer bann aktivite parey fim ou vann drog, prostitisyon ek lezot aktivite anti-sosyal, Prezidan Faure in demann lapolis avek NDEA pour fer patrol pli regilye e ranforsi sirveyans dan sa landrwa pour dekouraz sa bann move pratik.
Prezidan ti dir ki sa de vilaz i bezwen en landrwa kot dimoun i an sekirite.
Pandan ki i ti fer letour sa de vilaz pour ekout konsern bann zabitan, Prezidan ti pran not tou sa ki i ti vwar dan sa de vilaz.
Dan Ile Perseverance 1 Prezidan Faure ti vizit lakour Christelle avek Daniel Simeon ki annan 2 zanfan e ki’n dekor zot lakaz pour fer li vin en lakour avek en lanbyans tre konvivyal kot zot in osi maksimiz zot landrwa deor osi pourt plant fler e met bann fasilite pour asize.
Lo Ile Perseverance 2 Prezidan Faure ti vizit lakour Madanm Miriam Pool avek son 2 fiy ki li osi son lakour i byen antretenir.
Prezidan ti felisit sa 2 fanmir pour fason zot pe okip zot lakour e asire ki i toultan sa landrwa kot i gou pour viv.
Prezidan ti eksprim swe ki lezot fanmir ti ava swiv model sa de fanmir ek lezot fanmir ankor ki pe fer zot mye, fer bokou sakrifis pour ganny sa ki zot anvi e pour aranz zot lakour.
Dan Ile Perseverance 1 Prezidan Faure ti ekout bann konsern en manman tousel avek 7 zanfan ki travay konman en carer e in demann Minister Lafanmir pour swiv sa ka.
“Nou annan striktir ek polisi tre kler anplas e pa prezidan ki devret pe rezourd problenm dimoun,” i ti dir.
I ti fer resorti ki bann manman tousel zot kapasite pour fer fas avek problenm i debord zot e zot bezwen striktir sipor pour ankadre zot.
In demann DA pour not sa bann ka pour anmenn devan.
I ti fer resorti ki fer zanfan enn lo lot i en problenm sosyete ki fodre met lanmen lo la sirtou dan fanmir kot i annan plizyer zenn fiy e in demande ki tou lazans konsernen i travay ansanm pour met lanmen lo sa bann sitiasyon.
Bann lezot konsern ki’n ganny anmenn a son latansyon dan sa enn vilaz i konsern nwizans dan leskalye kot zanfan ek lezot dimoun i groupe pour fer diferan aktivite ki fatig bann zabitan dan sa blok lakaz. En zabitan ti o non tou lezot fanmir met tou zot konsern ki ti osi enkli problenm ki annan pour fer avek mank presyon delo ki fer souvan delo pa ariv anler dan bann lakaz pli o, lakaz koule, mank lekleraz dan leskalye ek lezot problenm ankor.
Prezidan ti osi koz lo nesesite annan en progranm pour bann zanfan pandan letan vakans pour anpese ki zanfan zot eran.
In ankor demann bann minister ek lazans konsernen pour travay ansanm pour trouv en solisyon.
Lo son kote Minis Dezinyen Madanm Macsuzy Mondon, ki osi annan responsabilite pour gouvernman lokal, i dir i annan nesesite pour revwar tou bann striktir ki ti ganny met anplas letan bann zabitan ti vin reste Ile Perseverance kot ti annan en task force me ki i domaz ki bann striktir in kasee i annan en gro travay pour asire Perseverance pa vin parey Les Mamelles ek Corgat Estate ti ete oparavan.
I ti fer resorti ki tou bann lazans ek servis i bezwen travay ansanm pour kapab fer sa arive.
Prezidan Faure in osi demande ki tou bann lakaz ki pe ganny servi konman biro i ganny libere pour donn dimoun lakaz. In demann Minister Labita, Lenfrastriktir ek Transpor Lo Later pour seryezman rod en kare later pour konstrir en blok pou abrit tou bann lazans. I annan antou 16 younit lakaz ki pe ganny servi konman lofis.
Prezidan Faure in osi demande ki nivo lapropte i osi ganny eleve e la ankor in demann bann lazans konsernen pour revwar lapropte dan sa de vilaz pour asire ki i en landrwa ki akeyan e gou pour viv.
