FPAC i kontiny son lenvestigasyon par kestyonn NDEA |07 September 2017

Reprezantan NDEA ti prezan yer dan lasanm trwa dan biro Lasanble Nasyonal pour reponn kestyon manm Komite Finans ek Kont Piblik (FPAC) dan Lasanble Nasyonal.

Sa ti form parti kontinyasyon lenvestigasyon sa komite ki zot pe fer lo rapor Oditer Zeneral lo tranzaksyon finansyel National Drugs Enforcement Agency (NDEA) letan ki sa lazans ti pe fonksyonn anba son sef zofisye Niall Scully ek Liam Quinn e Financial Investigation Unit (FIU), lo zot depans kot en sonm apepre 150 milyon roupi in ganny peye lo kont lakonpannyen aletranze pour servis konsiltan e legal ki zot ti pe ofer NDEA.

Sa bann lakonpannyen spesifik i Solas Beo Inc.; Tech Ltd; Calendula e Barry Galvin & Sons.

Sa rapor ti dir ki lodit ki’n fer pa’n kapab determin zistifikasyon serten peyman pour sa bann lakonpannyen.

Kishnan Labonte, sef egzekitif NDEA, Romano Songor, depite sef egzekitif pour loperasyon e Manmzel Christine Dogley, direkter asistan personnel sef egzekitif, ti prezan pour reponn kestyon.

Osi prezan pour reponn kestyon sa zour an relasyon avek sa menm tranzaksyon, ti manager Barclays Bank (Seychelles) e Madanm Lise Bastienne (vwar lartik separe).

Sa lenvestigasyon pe dirize par tyermenn FPAC Wavel Ramkalawan, ki osi dirizan lopozisyon dan Lasanble. Apard Msye Ramkalawan konman tyermenn, sa komite i konpri Terence Mondon, Charles Decommarmond, Jean-François Ferrari, Sebastien Pillay, Ahmed Afif ek Churchill Gill.

Sa lenvestigasyon i annan pour bi determinen kwa ki’n arive dan sa bann tranzaksyon ki Oditer Zeneral ti soumet en rapor lo la avek sa lenstitisyon an Zilyet sa lannen. Apre ki in konplet son lenvestigasyon, FPAC pou soumet en rapor kler e detaye lo la avek Lasanble Nasyonal.

Kestyon manm FPAC ti baze lo prosedir peyman, kopi invoice ouswa payment voucher, kontra, bann diferan peyman, sinyatir lo dokiman tel ki invoice ouswa payment voucher, responsabilite Msye Scully ek Msye Quinn pandan sa letan, resours, lenformasyon e nesesite ek lentelizans ki sa bann lakonpannyen etranze ti pe donn NDEA ki NDEA aktyel i bezwen pour fer zot travay.

Konsernan kestyon Msye Afif lo si NDEA i okouran ki ti annan en kontra avek bann lankonpannyen etranze ki ti ganny sinyen an Oktob 2014 pour serten servis, Msye Labonte ti dir ki li ek son tim fek pran sa fonksyon le premye Mars sa lannen e zot ti okouran sa bann zafer enkli konteni rapor Oditer Zeneral letan FPAC ti pe fer lanket. Lo kestyon si i annan en mank resours spesyalize ki pe konmela anmar lanmen NDEA, Msye Labonte ti dir i pa leka.

«Non. Me selman nou annan en partenarya avek nou bann partner etranze, me sa i gratwit. Resaman nou’n partner avek bann partner komoryen, Malgas e Morisyen. Zot pa fer nou pey nanryen,» Msye Labonte ti eksplike.

Msye Labonte ti osi fer resorti ki «apre ki Lasanble ti koup bidze NDEA right, left and centre avek gran kouto, sa lazans in vwar zot dan enpe konstrent finansyer pour travay me selman zot pa bezwen sa gro sonm 90 milyon roupi ki ti’n prevwar”.

I ti azoute ki zot annan en kont apepre 1 milyon roupi dan en lot seksyon zot lazans ki zot pa’n servi alors zot ti ava apresye si sa ki konsernen i transfer sa larzan dan zot kont operasyonnel.

Lo nesesite pey en lot lakonpannyen pour sours lentelizans, Msye Labonte ti dir i pa konnen akoz sa sonm akoz i pa okouran ki kalite travay son predeseser ti fer, me an sa ki konsern li i pa’n pey en sou lentelizans depi ler in konmanse.

«Me mwan mon pa vwar okenn nesesite pey en sours lentelizans avek okenn lakonpannyen kan mon kapab ganny sa avek mon bann partner etranze pour nanryen,» i ti dir.

Msye Labonte ti osi dir ki dan NDEA i annan en younit ki ranmas lenformasyon. Sa lenformasyon i bezwen ganny analize pour kapab servi.

Manmzel Dogley ti dir ki i panse ki sa bann peyman parey pour liniform, baton par egzanp avek Tech Ltd ti tro ser e pri ti pe kontinyelman ogmante. Me napa okenn moman ki Labank Santral ouswa Departman Finans ti met okenn lobzeksyon peyman.

Lo kestyon Msye Ramkalawan si ti annan invoice orizinal, Manmzel Dogley ti dir dapre sa ki li i ti’n vwar wi ti annan menm si Msye Ramkalawan ti dir ki dapre rapor oditer ti annan bann invoice ki ti en fotokopi kot non en lakonpannyen in ganny reye e ranplase par en lot e ki serten invoice ti pe ganny raise par Msye Scully li menm. Manmzel Dogley i dir ki i pa okouran si i annan invoice ki ti’n fer kopi.

Lo kestyon Msye Ferrari si NDEA pa ti rod detrwa kotasyon diferan landrwa, Manmzel Dogley ti dir sa ki li i okouran se ler sa tim NDEA sa letan ti rod liniform, sa lakonpannyen ti toultan anvoy sa komodite avan ki zot ti anvoy invoice. Sa ti fer ki NDEA ti bezwen peye.

Lo kote rapor Oditer Zeneral kot ti fer resorti ki serten tranzaksyon ti napa supporting documents e si sa biro ti retournen pour verifye avek NDEA, Manmzel Dogley ti dir non menm si serten resi ouswa lezot dokiman ti deza dan zot file.

Msye Labonte ek son tim NDEA devan FPAC