Ansyen gouverner Labank Santral i reponn kestyon FPAC |16 September 2017
Dan son lenvestigasyon pour konnen ki’n arive dan bann lannen 2006 a 2016 kot i konsern serten peyman ki pa kler, komite ki responsab pour sirvey kont piblik ti sa semen kontinyen kestyonn bann o zofisye ki pe travay oubyen ki ti travay dan gouvernman e ansyen gouverner Labank Santral Msye Francis Chang Leng ti enn parmi.
Tyermenn FPAC Msye Wavel Ramkalawan i dir sa legzersis pou osi ed pei an zeneral kot alavenir ava napa bann sitiasyon kot serten peyman i ganny fer san bann dokiman aproriye atase avek.
Msye Chang Leng i dir in fer 30-an Labank Santral e i ti vin gouverner an 1999. Son kontra ti terminen an Oktob 2008.
Msye Chang Leng ti eksplik fason ki li i konnen peyman ti fer dan son lepok.
I ti eksplike ki Labank Santral i osi en lenstitisyon ki menm si i konsey gouvernman i osi annan bann kont parey en labank ordiner me i pran bann kont ki son lalwa i permet li parey bann pour gouvernman e bann lazans gouvernman.
«Gouverner napa lotorite pour fer peyman e rezerv Labank Santral avan ganny release ti bezwen laprouvasyon bord e pour debit kont person ti napa lotorite fer san lenstriksyon neseser,» i ti eksplike.
Swivan kestyon si i ti okouran kontra ki gouvernman atraver biro prezidan avek en Msye Barber ti sinyen an 2007 kot apre ti annan plizyer peyman e li ki ti son rol konman gouverner e si i ti satisfe avek fason sa bann peyman ti pe ganny fer, Msye Chang Leng ti dir ki sa lepok i pa ti’n vwar okenn kontra ni okenn rikord sa kontra.
I ti fer resorti ki Labank Santral ti ganny responsabilite pour kre en younit poue FIU e sa ti an 1996 e Msye Phillip Moustache ti travay avek sa younit ki son bidze ti form parti bidze Labank Santral.
Ler ti annan amandman dan lalwa an 2008 fonksyon FIU konman en lorganizasyon ti sorti anba Labank Santral e a sa pwen li osi son kontra ti fini e i ti sorti Labank Santral.
I dir son rol konman gouverner i spesifye anba lalwa Labank Santral i sef ekzekitif, responsab sa lenstitisyon se tyermenn bord.
Kot i konsern lenstriksyon ki Labank Santral ti gannyen pour fer peyman, Msye Chang Leng ti dir sa lepok «lenstriksyon ti vin swa atraver en let oubyen mesaz teleks avek bann sinyatir otorize e bann sekreter ti fer prosedir neseser e kiiI pa ti dan en pozisyon pour pas en zizman lola,» i ti dir.
I ti eksplike ki i rapel ki Labank Santral ti pe fer ant 40 a 50 tranzaksyon gouvernman toulezour sa bann lepok.
Me kot i konsern rapor konmkwa ti annan mank serten bann dokiman sipor neseser atase ki detay sa bann peyman, Msye Chang Leng ti dir ki dan sa lepok byen rar lenstriksyon ki ti vin Labank Santral ti annan invoice atase avek.
«Me ozordi keksoz in sanze e okenn labank pa pou fer en tranzaksyon san en invoice me sa lepok en gran poursantaz tranzaksyon gouvernman ti napa invoice,»Msye Chang Leng ti eksplike.
Letan i ti ganny demande si i rapel en peyman €2.6 milyon ki ti ganny fer an 2006 anver en sel endividi e sa ti Msye Decklan Barber a en lepok kot ti napa deviz e pour Labank Santral sa ti en kantite larzan, Msye Chang Leng ti reponn ki toultan ti annan en rezerv dan labank pour letan i annan en kriz e gouvernman ti annan son lalis priorite e li ki ti deside e Labank Santral pa pran desizyon lekel ki pou peye, me Selman li i pa rapel sa enn peyman akoz ti annan en kantite peyman ki’n ganny fer .