Lanket FPAC lo tranzaksyon finansyel FIU ek NDEA |16 September 2017

Gouverner Labank Santral i revel en gro peyman resan

Gouverner Labank Santral Sesel Manmzel Caroline Abel ti ankor enn fwa devan komite finans e kont piblik dan Lasanble Nasyonal Zedi pour en dyalog avek sa kominite lo tranzaksyon finansyel e peyman ki gouvernman Sesel in fer dan bann kont lakonpannyen e endividi Irlande ki a sa letan ti ansarz Financial Intelligence Unit (FIU) ek National Drugs Enforcement Agency (NDEA) ziska 2016.

Madanm Abel ti anmenn serten dokiman konsernan sa labank dan sa tranzaksyon ki ti manke pandan premye hearing le 29 Out 2017.

Dan rapor Oditer Zeneral ti annan 166 peyman me ziska Mardi le 12 Septanm zot in nobou vwar 138 me ki zot ankor pe travay lo la.

Pandan sa sesyon kestyon-repons Manmzel Abel ti devwale ki Labank Santral ti’n fek pas en peyman le 19 Zilyet sa lannen lavaler €50,000 pour servis en avoka Seselwa ki FIU i bezwen.

«I annan en peyman ki’n pas atraver Labank Santral le 19 Zilyet 2017 lavaler €50,000 (anviron R800,000) ki nou’n vwar ki FIU ti’n fer resaman. Ler nou vwar en peyman parey dan prosesis Labank Santral se lofis dezyenm depite ki fer sa travay ansanm avek servis banker. Mon port latansyon ki i anann en peyman ki’n ganny fer annou get li en ti pe pli pre. Sa peyman ki’n ganny fer pour en avoka, Manmzel Samantha Aglae. E Labank Santral in fek resevwar kontra ki FIU in sinyen avek Manmzel Aglae ki detay travay ki sa avoka i sipoze fer pour FIU. E apre verifikasyon en lot dokiman anliny avek prosedir procurement atraver Msye Philip Moustache, direkter FIU, se ki FIU in ganny laprouvasyon pour sa kontra ganny ekzekite. Me se apre ki zot in resevwar sa kontra, Manmzel Abel ti dir, ki zot pa dan en pozisyon pour eksplik totalite sa sonm,» Manmzel Abel ti dir.

Manmzel Abel ti azoute ki sa €50,000 mannyer i ganny en konpran i ler sa kontra i ganny pase.

«Ler monn regard sa kontra i ki tou le trwa mwan Madanm Aglae ti pou ganny €75,000 (€25,000 par mwan),» Manzel Abel ti dir. I ti azoute ki konsernan lanket FIU, in annan plizyer lenstans sa lannen kot labank santral in pey FIU.

«Dan son remark, Msye Wavel Ramkalawan, ki tyermenn sa komite, ti dir bann keksoz ki komite pe soke avek, se bann sif ki pe sorti dan sa lanket. Alors i ti demann leklersisman lo sa peyman.

Msye Philip Moustache ti donn leklersisman letan ki li a son tour ti reponn kestyon sa komite plitar dan lazournen Zedi. Li osi i ti pe anmenn bann dokiman manke ki komite ti’n demann li dan dernyen hearing.

«Ler Barry Galvin ti vini nou ti annan en miting avek Minis Finans kot nou ti enform minister ki sa msye pe aret fourni servis legal Zanvye. Nou ti diskite e minis finans ti prezant devan bann dezavantaz. Nou ti annna nou apepre 300 milyon roupi viz-a-vi bann ka ki ankour. E probabilite se ki gouvernman Sesel ti kapab ganny pourswiv. Msye Galvin ti dir si Sesel i oule son servis i pou kout €400 par erd-tan. Nou ti dir non. E swivan diskisyon avek Minis Finans nou ti deside pour rod servis en avoka lokal. Bann avoka ki nou ti gete ti annan bann ka kont FIU e la nou ti tonm lo Madanm Aglae. I ti donn nou sa kotasyon €25,000 par mwan sa vedir per quarter €75,000 me avek en lagreman ki FIU i pey li €25,000 par mwan. Sa bann ka ki nou ti annan ti bann ka enternasyonal. E vi Msye Galvin pa ti hand over, I (Manmzel Aglae) ti dir nou i bezwen rod konsiltasyon enternasyonal e se pourkwa sa pri,» Msye Moustache ti eksplike.