Kominike Lapolis |20 September 2017

Lapolis in raporte ki Roy Estico, sa zonm 44-an ki reste Bel Air e ki ti’n sove Prizon Montagne Posée kot i ti pe rimann pour lofans kas lakaz e vole, in ganny ratrape yer apremidi e i aktyelman an detansyon lapolis.

********

Lapolis in egalman raporte ki Ralph Japhet, en zonm Anse Royale ki lapolis ti pe reserse pour plizyer lofans kas lakaz e vole, in pas ankour yer e in ganny sarze pour de (2) lofans kas lakaz e vole e en (1) lofans kas lakaz. Tou le trwa (3) lensidan ti ariv Anse Royale.

Lakour in konsekaman enpoz kondisyon lo li ki konpri : en ‘cash bail’ 7000 Roupi pour li kapab ganny large e si i ganny large pour li pas kot kordgard Anse Royale tou le Lendi, Merkredi ek Vandredi pour siny liv Lord Lakour e pour pa komet okenn lofans.

Ralph Japhet pa’n kapab pey sa ‘cash bail’ alor Lakour in ordonnen ki i ganny rimann prizon Montagne Posée ziska le 3 Oktob kan i pou repas ankor ankour.

********

Lapolis in osi raporte ki Darrel Celestine, en zonm 21-an ki reste Cascade, in osi pas ankour yer apremidi e in ganny sarze pour de lofans kas lakaz e vole ki ti arive dan distrik Anse Royale.

Lakour in ordonnen ki sa zonm i ganny rimann ziska le 3 Oktob 2017 kan i pou repas ankor ankour kot i sipoze ganny sarze pour lezot lofans kas lakas e vole ki’n ganny anmennen kont li par lapolis.