Follow us on:

Facebook Twitter LinkedIn YouTube

Archive -National Assembly

En lodit pour redefini rol STC |20 September 2017

 

Menm si STC pe fer son mye pour abzorb en kantite kou pour asire ki konsonmater i ganny bann pri komodite ki ase stab e abordab akoz marsandiz lo marse enternasyonal pe kontinyen ogmante, i annan demann pour ki rol ek manda sa lakonpannyen i ganny revwar.

Minis pour Finans Dr Peter Larose in dir ki byento pou annan en lodit pour met laklerte lo manda, fonksyon ek rol STC.

Minis Larose ti donn sa bann detay letan i ti pe reponn en kestyon lo pri lavi par dirizan zafer gouvernman Msye Charles de Commarmond.

Msye de Commarmond ti demann Minis responsab pour Finans, Komers ek Planifikasyon Ekonomik Dr Peter Larose si i kapab enform Lasanble ki bann keksoz konkret ki gouvernman in fer pour fer desann pri marsandiz e koudlavi dan pei pandan sa dernyen lannen e ki kantite efektiv sa bann mezir in efektiv e akoz olye desann pri marsandiz e koudlavi i kontinyen monte?

Akoz i konsernen avek pri lavi gouvernman in pran sa bann mezir swivan: retir VAT lo ankor plis komodite ki STC i vann e swivan sa STC in estimen ki konsonmater in benefisye avek en sevings anviron 2.5 milyon roupi me menm sa i annan lezot kou ki kontinyen monte parey to lesanz ki en fakter prensipal ki Minis Larose i dir gouvernman pe swiv de tre pre.

Bann lezot kou ankor ki pe kontinyen ogmante i pri kontener ki met marsandiz ladan ki’n ariv 240 dolar enn, pri komodite ki pe kontinyen ogmante lo marse enternasyonal parey diri ki’n monte ant 11 a 14% parmi lezot komodite ankor.

Minis Larose i dir ki STC lo son kote in fer resorti ki i pe abzorb plizyer sa bann ogmantasyon e fre kot i kapab pour asire ki pri dan magazen i reste ase stab e afordab pour konsonmater.

Minis Larose i dir ki depi Avril STC pe swiv pri marsandiz lo marse enternasyonal an servan Food Price Index ki pe montre ogmantasyon konsiderab dan pri manze e tandans i montre ogmantasyon kontinyel e STC pou napa swa me pas enpe sa bann kou lo konsonmater.

Minis Larose ti fer resorti ki gouvernman i tre konsernen par sa sitiasyon me i dir i annan bokou fakter ki fer sa arive e lefe ki Sesel i en pei ki enport preski tou keksoz e pri bann prodwi enporte i ganny enflianse par lenflasyon, kalite sa bann komodite, fre transportasyon, fre lasirans kargo, to lesanz roupi vizavi deviz etranzer, fre pour desarz marsandiz lo por, kou transportasyon sorti lo por ek erport, kou stokaz marsandiz, kou taks ki aplikab, kou profi ki aplikab, tousala azout ansanm i defini pri ki marsandiz pou vann ler i ariv dan magazen.

Atraver son progranm loyalty card STC pe kontinyen ofer serten benefis son bann kliyan e depi Avril ziska Out sa lannen sa benefis atraver bann pwen lo sa bann kart in kout STC 8 milyon roupi.

Minis Larose in osi fer resorti ki STC i osi abzorb bann kou lozistik me kantmenm son reveni i ganny afekte STC pe esey son mye pour asire son bann prodwi i meyer kalite posib.

An sa ki konsern efektivite sa bann mezir pour fer desann koudlavi, Minis Larose i dir resaman gouvernman in zwenn avek sekter prive pour rod zot sipor ek lasistans pour ede fer desann pri lavi. Sa i enkli rediksyon dan to lentere dan labank e Minister Finans pe ankouraz zot pour fer plis.

Kot i konsern pri petrol Minis Larose i dir sa i lye avek kou deviz etranzer e sa i aplik osi pour kou litilite. Rezilta diskisyon avek bann konpannyen lasirans in fer ki zot in propoze ki gouvernman i redwir VAT lo premium e sa pa ankor defini.

An sa ki konsern kou telekominikasyon, Minsi Larose i dir i annan ankor diskisyon pour fer zot donn en pli meyer tarif bann konsonmater.

Dan en kestyon siplemanter Msye de Commarmond ti demande si gouvernman i pare pour revwar vitman son korperasyon komersyal ki i annan avek Lenn ek Kenya pour enport serten komodite debaz direk avek prodikter e met pri kontrol lo sa bann komodite pour asire zot reste stab e ba e osi si gouvernman i kapab konsider retir VAT lo kou pour lwe lakaz.

Msye de Commarmond ti osi demande ki gouvernman i vin for kot i konsern kou telekominikasyon pour ki si bann lakonpannyen pa fer desann zot pri alor ranforsi mezir pour ranmas taks.

Minis ti dir ki aktyelman in annan serten demars vizavi relasyon komersyal avek Kenya me avek sitiasyon ki pa stab dan sa pei nanryen pa ankor konkretize me relasyon avek Lenn ava ganny eksplore.

Lo size kou telekominikasyon Minis Larose i dir ki kolekte taks i priyorite Minister Finans.

Minis Larose ti fer resorti ki gouvernman li tousel pa kapab donn tou servis me i annan nesesite pour ranforsi kolaborasyon avek sekter prive pour kontinyen vwar meyer fason pour redwir kou servis ek komodite.

Msye de Commarmond ti ensiste akoz ki STC pa enport marsandiz debaz direk avek Lenn ki en pei stab pour kapab redwir pri akoz i pa normal ki marsandiz debaz i vann pli bon marse dan lezot laboutik ki kot STC.

Minis Larose in demande ki bann enportater marsandiz ek bann marsan zot azir dan en fason onnet e pa sarz bann pri egzorbitan.

Lo son kote manm Parti Lepep Simon Gill ti fer remarke ki STC i selman enn parmi tou sa kantite enportater ki annan dan pei e ki STC li tousel pa kapab kre en lenpakt lo pri komodite dan pei e si STC li tousel i kapab enport 99% komodite ki pei i konsonmen pour kre en lenpakt e in lans lapel pour enportater pa triple zot pri e azir dan en fason onnet. 

Kot i konsern rol Komisyon Komers Lib (FTC) Minis Larose i dir travay pe fer pour ki i ganny en nouvo striktir pour pli byen defini son fonksyon e sa pou prezante avek Lasanble byento. 

In osi demande ki manm piblik i vin devan e devwal bann pratik malonnet ki zot fer fas avek.

Ti annan bokou deba lo sa size ki tous tou Seselwa oprofon e ti annan manm elekte pour Mont Fleuri Msye Jean-François Ferrari ki ti demande ki rol ek manda STC i ganny revwar pour asire i vann keksoz esansyel e ki i pa fer bann lekstravagans me donn Seselwa marsandiz de baz de kalite a bann pri konpetitiv.

Minis Larose ti dir ki pou byento annan en lodit pour revwar loperasyon ek fonksyon STC pour determinen si i pe onor son manda e pou annan plis laklerte lo son fonksyon.

Ti osi annan kestyon lo kou marsandiz pour bann dimoun Praslin ek La Digue e bann manm elekte pour sa bann zil ti demande ki i annan plis konsiderasyon ek formil pour zabitan bann zil.

          

 

 

 

» Back to Archive