Minis i vizit fasilite lagrikiltir ek lapes lo bann zil pros |20 September 2017

Minis pour Lagrikiltir ek Lapes, Pamela Charlette, ti fer en vizit familyarizasyon lo bann zil pros semenn pase.

I ti akonpannyen par sef egzekitiv departman lagrikiltir Msye Finley Racombo, sef egzekitif Lotorite Lapes Sesel (SFA) Msye Ronny Renaud, lezot o zofisye son minister, manm lasanble ek administrater distrik pour zil pros.

Vizit ti konmans kot biro lagrikiltir, Amitié, Praslin kot sa delegasyon ti ganny sans zwenn avek bann travayer dan en pti rankont pour ekout zot bann konstrent ek sizesyon lo fason pour amelyor servis ki zot ofer kominote zil pros.

Sa delegasyon ti osi ganny sans vwar diferan lesey lo serten legim tel ki tomat ki pe ganny antreprann par bann travayer. Sa 5 varyete tomat pou byento ganny rekolte pour vwar lekel ki pli byen adapte ek nou klima e aport pli bon rekolt. Demonstrasyon i ganny fer pour bann fermye vwar e plitar deside lekel dan sa bann varyete ki zot pou eseye.

Zis akote, sa delegasyon ti osi vwar progre lo konstriksyon en nouvo landrwa kot bann plant tel ki fri ek legim ava kapab ganny prodwi. Sa i enn bann proze CLISSA (Competitive Local Innovations for Small-Scale Agriculture) ki ava ede desantraliz sa servis kot pour le moman bann fermye i bezwen al rod plan Mahé.

Answit delegasyon ministeryel ti al vwar de fermye Amitié, Sonny Banane ek Raoul Souffe. Cap Samy, zot ti vizit Rovin Fred ek Emmanuel Esther e pli ba kot ansyen Dawn Dew Farm Benjamin Leon, France Rose, Selwyn Louange, Ralph Souffe ek Basil Houareau ti ganny vizite. Lo La Digue delegasyon ti vizit Jimmy Mellon, Romeo Radegonde ek Roger Morel.

Bann fermye ti ganny sans montre zot prodiksyon ensi ki fer resorti bann konstrent ki zot fer fas avek, tel ki voler, problenm drenaz kan lapli i tonbe vi ki bann dren pa pe byen ganny antretenir, mendev, mankman delo e difikilte pour vwar marse pour bann prodwi.

Sizesyon ti ganny fer ki bann fermye i zwenn ansanm pour form en lasosiasyon parey serten fermye distrik Baie Ste Anne kot la zot ava kapab esanz nide e ganny bann benefis kolektiv kan lasosiasyon i resevwar bann don.

I annan mwens ki enn an ki serten fermye in bouz kot ansyen Dawn Dew Farm e zot in bezwen fer bokou travay pour netway sa landrwa ki ti’n bwaze. Pour laplipar zot sa in afekte zot finansyerman e ozordi zot vwar li difisil pour kontinyen. 

Parmi rekonmandasyon bann fermye sete ki minister i ede fasilit finansman avek bann labank. 

Dan sa rezyon pli gran konsern bann fermye i delo ek elektrisite. Travay in deza konmanse pour fasilit distribisyon delo atraver en basen ki pa lwen atraver en proze CLISSA e diskisyon ava kontinyen avek PUC pour bann fermye resevwar konneksyon kouran byento.

Propozisyon ki en lasirans i ganny enkli dan zot ‘lease agreement’ pour protez zot pandan bann pert okazyonnen par dezas ti byen ganny akeir par lamazorite fermye.

Ti osi annan propozisyon ki bann travayer departman lagrikiltir i reste pli a zour avek bann fermye, pour enform zot lo bann prodwi ki disponib e entrodwir zot avek bann ki nouvo.

Minis Charlette ti partaz avek bann fermye bann zefor ki son minister pe fer pour esey amelyor servis ki zot ofer bann fermye ensi ki diskisyon avek bann lezot departman konsernen pour annan bann ‘relief schemes’ e amelyor akse avek finansman. Bokou nouvo proze pou byento konmanse e ansanm avek bann nouvo metod lagrikiltir ek resers, ede pour fasilit travay ek rekolt bann fermye.

Lo kote lapes, sa delegasyon ti vizit lasose La Digue e proze devlopman nouvo bazar ki pou enkli en ice plant. Sa proze i sipoze konplete ver milye lannen prosenn.

Ansyen lasose Baie Ste Anne lo Praslin ek bann fasilite SFA Baie Ste Anne ti osi ganny vizite e la sa delegasyon ti ganny sans diskit ek bann travayer e vwar bann enfrastriktir.

Bann peser ti osi ganny sans diskit avek sa delegasyon dan en rankont. La zot ti met devan zot bann konsern tel ki mankman en bazar pour zot vann zot prodwi, mank kordinasyon ant SFA ek le de lasosiasyon peser lo sa zil e demande pour en fasilite pour vann bann lekipman lapes. Sizesyon pour form en komite ki ava annan reprezantan tou bann partener kle sa lendistri lo Praslin ti ganny aksepte. Sa komite ava responsab pour diskit e rod fason pour amelyor kondisyon bann peser atraver en plandaksyon.

“Sa rankont ti vreman pozitiv e nou apresye lefet ki sa nouvo komite ava ede pour nou bouz devan e aport soutyen pour bann peser,” Msye Renaud ti partaze.

Bann peser lo La Digue pou ganny sans zwenn minis dan en prosen rankont.

Bann portre ki akonpanny lartik i montre minis ek son delegasyon pandan zot vizit lo bann zil pros.

Teks: Nadia Bedier

Portre: Romano Laurence