Lasanble i vote pour ogmant kantite manm lo bord Tribinal Lafanmir |22 September 2017

Lasanble in aprouv lamannman dan Lalwa Zanfan 1982 pour permet ogmant kantite manm ki lo bord Tribinal Lafanmir ki ava an retour fer ki i ava annan ase manm pour li kontiny son travay letan serten i annan lezot komitman oubyen dan ka ki zot malad.

Sete Minis responsab pour Zafer Lafanmir, Madanm Jeanne Simeon, ki ti prezant sa bann lamannman avek manm lasanble pour zot konsiderasyon.

Sa bann lamannman i konsern bord Tribinal Lafanmir e pe propoz amann Seksyon 77 pour retir ‘senk lezot manm’ e ranplas li par ‘pa mwens ki senk e pa plis ki 15 manm’.

Pour lemoman bord Tribinal Lafanmir i konpri 8 manm antou enkli tyermenn ek vis-tyermenn e sa lamannman ava permet lapwentman ase dimoun lo sa bord ki pou disponib pour donn bann kliyan en pli bon servis.

Minis Simeon ti eksplike ki pour lemoman sa tribinal pe fer fas avek serten konstrent akoz lakantite manm lo bord i fer li difisil pour li kontiny son travay letan serten manm i annan lezot komitman oubyen si zot malad.

“I osi annan en logmantasyon dan bann ka ki pe pas devan tribinal,” Minis Simeon ti fer remarke.

Ti osi annan enn ou de lezot pti lamannman grafik ki Minis Simeon ti met devan.

Letan i ti pran laparol pour entervenir lo sa proze de lwa manm elekte pour Les Mamelles Onorab Bernard Georges ti fer resorti ki propozisyon pour ogmant manm lo sa bord i en bon keksoz akoz letan Tribinal Lafanmir i konmans ekout en ka menm manm i bezwen kontinyen ekoute ziska i fini e pa kapab sanz manm sinon i pou fer sa prosedir pa valid.

Onorab Georges i dir i byen ki i annan en pli gran kantite manm ki kapab ganny swazir pour adres defayans aktyel ki sa tribinal pe fer fas avek.

Parmi bann lezot manm ki ti entervenir ti manm Parti Lepep Onorab Sebastien Pillay ki ti propoz serten lezot pti lamannman ki ti annan pour fer avek lokasyon kot tribinal i fer son bann sesyon.

Manm elekte pour Mont Fleuri, Onorab Jean-François Ferrari, ti met devan konsern piblik ki pe dir i annan tro bokou bord ek tribinal e tro bokou dimoun ki deza annan zot prop lokipasyon ki pe ganny apwente lo bann bord. In propoze ki bann manm bord zot ganny peye zot allowance selman letan ki zot vreman travay e ekout bann ka.

I ti fer resorti ki sa i ava satisfer piblik e i ava osi dan benefis gouvernman e pei an zeneral. 

Lo son kote manm Parti Lepep Onorab Basil Hoareau ti siport propozisyon son de koleg e fer resorti ki i konn byen bann difikilte aktyel Tribinal Lafanmir e ki i neseser ki bann ka ki vin devan li i ganny adrese vitman akoz sa bann dimoun i vin rod led ek sipor pour ed zot trouv en solisyon vitman pour zot problenm e tribinal pa kapab pran tro bokou letan lo zot ka.

I ti osi propoze ki i annan plis ki en tyermenn pour fer ki tribinal ava annan plis sesyon pour ede retir bann ka ki’n akimile, en pwen ki ti ganny sipor manm elekte pour Anse Aux Pins Onorab Clifford Andre.