Formasyon pour bann pti fermye komersyal |03 November 2017

Bann pti fermye sorti Takamaka, Anse Royale ek Baie Lazare in swiv en formasyon ki ava ede lev nivo e anmenn plis prodiksyon dan pei.

Sa formasyon de zour ki’n ganny organize par Lazans Lagrikiltir (SAA) anba proze Clissa, ti konmans Mardi e ti terminen yer.

Sa i fer premye lantrennman ki ganny fer lo nivo distrik avek bann fermye anrezistre e se Gabriel Prudence ki pe diriz sa formasyon.

Zofisye prensipal pour servis ekstansyon kot SAA, Gilbert Port-Louis, ti donn en apersi lo sa formasyon ek son bann benefis.

“Nou oule lev nivo ansanm avek bann fermye e ede fer zot bouz pli devan atraver formasyon ki ava ed zot amelyor ouswa ogmant prodiksyon an servan bann teknik adisyonnel ki zot aprann,” i ti dir.

I ti dir ki sa lantrennman i tous depi ler en legren i ganny senmen ziska ler i ganny rekolte.

“Zot in aprann kwa ki zot devret fer e sa ki zot pa sipoze fer kan zot pe plante e bann prosedir avan rekolt ki pou donn zot en plant an bonn sante,” i ti dir.

Sa 20enn fermye ki’n pran par dan sa formasyon i ekspekte al met sa ki zot in aprann an pratik lo laferm Anse Boileau semenn prosenn.