Prezantasyon Bidze pour 2018 - Gouvernman i ekspekte konplet 335 lakaz, fer alokasyon 200 morso later lannen prosen |03 November 2017

Pandan lannen prosen gouvernman i ekspekte konplet 335 lakaz e fer alokasyon 200 morso later anmenmtan ki i reafirm son langazman pour konstrir 24 lakaz dan 24 distrik dan 24 mwan.

Antou en sonm 1.15 bilyon roupi in ganny propoze dan bidze pour lannen prosenn  pour depanse lo bann proze parey ki tonb anba Proze Kapital. Sa i reprezant en logmantasyon 15% lo bidze pour bann proze parey pour lannen pase.

Se Minis pour Finans, Komers ek Planifikasyon Ekonomik Dokter Peter Larose ki ti donn sa bann detay dan Lasanble Nayonal Mardi letan i ti prezant bidze pour lannen prosen.

Omwen 50% ; 578.3 milyon roupi pou sorti dan bidze nasyonal, en sonm 377.8 milyon roupi pou ganny peye par bann don etranzer e larestan, en sonm 190.4 milyon roupi pou ganny finanse par bann lón etranzer.

Lenvestisman total ki’n prevwar dan Minister pour Labita, Lenfrastriktir ek Transpor lo Later i fer apepre 18% lenvestisman total ki’n planifye pour 2018.   

Bann proze mazer dan sekter lenfrastriktir i enkli:

- Travay ki pe kontinyen lo plizyer proze lakaz, enkli Eks-Desaubin, Eks-ION e Eks Kashugy, redevlopman Kan Gard ek Faz 2 Zil Perseverans ki prensipalman travay lenfrastriktir; en pe sa bann travay i parsyelman finanse par lón etranzer tel ki BADEA, UAE e OFID.

- Travay ki pe kontinyen lo plizyer proze land bank, enkli Creuve Coeur, Carana, La Gogue, Eks Murray e Cayole.

- Plizyer proze amelyorasyon semen dan plizyer distrik, enkli elarzisman semen Salazie, Baie St Anne, amelyorasyon semen Mont Plaisir, Anse La Blague, North East Point ek Anse Royale.

- Gouvernman pe envestir 97 milyon roupi dan lenfrastriktir semen an 2018. 70% sa lenvestisman ki ariv 67.5 milyon roupi i pour proze semen kominoter.

“Sa i montre lenportans ki gouvernman i atase avek devlopman rezo semen dan kominote pou asire ki i annan en rediksyon dan kou lavi pour bann kominote kot i konsern kou transportasyon,” Minis Larose ti eksplike.

In fer resorti ki dan ka sekter lasante, li in ganny  en alokasyon 11.7% depans total pour 2018.

Bann proze mazer dan sa sekter i enkli:

- Travay renovasyon lo Sant Dyagnostik a en kou total 4 milyon roupi;

- Konstriksyon en Younit Izolasyon, ki’n ganny en alokasyon 3.5 milyon roupi;

- Konstriksyon Sant Lasante Zil Perseverans, ki pe ganny parsyelman finanse par lón etranzer sorti kot BADEA/OFID; sa proze in ganny en alokasyon 6.8 milyon roupi;

- Travay renovasyon lo Sant Lasante Baie Lazare, ki’n ganny en alokasyon 5 milyon roupi, e

- Konstriksyon nouvo Lopital Logan La Digue, ki’n ganny en alokasyon 5 milyon roupi.

Lenvestisman dan Sekter Ledikasyon i reste enn bann priyorite gouvernman. En total 13.4% lenvestisman zeneral pour 2018 in ganny rezerve pour sekter Ledikasyon ek Resours Imen. Bann proze mazer ki pou ganny finanse dan sa sekter i enkli:

- Konstriksyon lekol Primer Perseverans 2, ki’n ganny en alokasyon 15 milyon roupi, e ki parsyelman finanse par en lón BADEA,

- Konstriksyon lekol Primer La Rosière, ki’n ganny en alokasyon total 36 milyon roupi me ki osi parsyelman finanse par en lón etranzer sorti Kuwait, e

- Konstriksyon Lekol Letid Biznes ek Kontabilite, e Lekol Lar Vizyel, ki’n ganny en alokasyon total  16.7 milyon roupi, e ki osi finanse par en don gouvernman Sinwan.

Minister Gouvernman Lokal in ganny en alokasyon total 52.3 milyon roupi pour 2018. Proze mazer pour sa sekter i enkli:

- Pti Proze Distrik dan tou distrik lo Mahé, Praslin ek La Digue, ki’n ganny en alokasyon total 30 milyon roupi;

- Travay ki pe kontinyen lo proze daycare Grand Anse Praslin;

- Konstriksyon en daycare Takamaka, ki’n ganny en alokasyon total 3 milyon roupi, e

- Lagrandisman biro ladministrasyon distrik ek bann sant rezyonal, ki’n ganny en alokasyon  5 milyon roupi.

En total 4.4% depans zeneral in ganny rezerve pour Departman Zafer Entern pour lannen 2018. Proze mazer dan sa sekter i enkli:

- Konstriksyon en laboratwar DNA pour Departman Lapolis, ki’n ganny en alokasyon 8 milyon roupi e i pe ganny parsyelman finanse par gouvernman Endyen;

- Konstriksyon nouvo ‘headquarters’ Departman Prizon, ki’n ganny en alokasyon total 5 milyon roupi;

- Konstriksyon klinik pour Departman Prizon, ki’n ganny en alokasyon total 4 milyon roupi, e

- Konstriksyon en stasyon tenny dife Anse Royale pour Lazans ‘Fire & Rescue Service’, ki’n ganny en alokasyon total 13.6 milyo roupi.

En total 36 milyon roupi in ganny rezerve pour Sekter Lanvironnman an 2018 . Proze mazer ki enkli dan sa bidze i:

- Travay ki Brigad Dezas pe kontinyen fer - 5 milyon roupi;

- Proze drenaz priyoriter atraver plizyer distrik - 1.5 milyon roupi;

- Proze ki pe kontinyen lo reabilitasyon lakot - 5 milyon roupi,

- Konstriksyon en batiman pour abrit Minister Lanvironnman, Lenerzi ek Sanzman Klima e osi Lotorite Park Nasyonal Sesel, ki sipoze demare an 2018; sa proze pou finanse atraver Partenarya Piblik/Prive,

 - Plizyer pti proze ki pe ganny finanse par bann don etranzer ki vize ver ladaptasyon vizavi sanzman klima.

En total 187.3 milyon roupi in ganny rezerve pour diferan lantrepriz piblik anba ‘Development Grants’ konm swivan: a) Korporasyon Transpor Piblik Sesel (SPTC) - 30.8 milyon roupi, b) Korporasyon Litilite Piblik (PUC) - 139 milyon roupi, c) Lakonpannyen Zesyon Propriyete (PMC)-  17.4 milyon roupi.