WASO i kondann lagresyon lo ansennyan


10-November-2017

Lorganizasyon non-gouvernmantal WASO in kondann sa lensidan kot en ansennyan lekol segonder Mont Fleuri in ganny atake e abize e i’n lans en lapel pour respe pour kanmarad dan nenport sirkonstans osi byen ki lapresiasyon pour nou gran.

“Dan nou mesaz solidarite ek tou bann ansennyan, espesyalman sa ansennyan ki’n ganny atake e abize, WASO i lev son lavwa byen fyer pour demande ki tou sitwayen Seselwa i montre bokou respe e protez nou ansennyan,” WASO i dir dan en kominike.

«Vyolans nou’n toultan kondannen e nou pou toultan kondannen e nou santi ki gouvernman pa pe fer ase pour adres sa problenm. Nou swete ki la zot a vwar nesesite pour adres sa size vyolans seryezman e o pli vit posib – nou deza an retar e la konman nou pe diskit lo bidze, annou pran en gran konsiderasyon pour met larzan dan bidze 2018 pour sa ‘Shelter Home’ ek sa ‘Juvenile Centre’.

«Me nou osi bezwen en ‘Shelter Home’ pour abrit bann madanm ki sibir vyolans kot lakour, dan fanmiy. Pa bliye sa vyolans ki pe arive ozordi i en sitiasyon ki fanmiy pe sibir e zanfan pe pas atraver.

«Nou’n toultan dir ki vyolans dan lakour pou manifeste dan nou sosyete. La en legzanp tipik. Annou gete ki ansanm nou kapab fer,» sa kominike i dir.

 

 

 

Send your comment :

Name *

Email *

Comment *