Diskour Bidze 2018 - Lasanble i fini ekout reaksyon bann manm


10-November-2017

Lasanble Nasyonal in fini ekout reaksyon tou bann manm lo prezantasyon Bidze pour lannen prosenn ki Minis pour Finans, Komers ek Planifikasyon Ekonomik, Dr Peter Larose, ti fer semenn pase.

Depi Mardi Lasanble Nasyonal ti pe ekout reaksyon bann manm e ozordi bomaten Minis Larose pou retourn dan parlman pour klarifye e donn plis leksplikasyon bann manm lo plizyer pwen ki zot in souleve letan zot ti pe donn zot reaksyon.

Apartir Lendi prosen e pour plizyer zour Lasanble pou annan bann sesyon diskisyon atraver enteraksyon avek bann minister, departman ek lezot lazans ki depan lo bidze ki pou vin reponn kestyon bann manm e zistifye bidze ki zot ekspekte gannyen.

Fodre dir ki atraver sa legzersis i annan parmi zot ki zot bidze i riske ganny sispann ziska ler zot kapab donn zistifikasyon kler tandis ki i annan ki riske ganny zot bidze koupe.

 Alafen sesyon Lasanble yer, Spiker Patrick Pillay ti felisit tou bann manm pour fason zot in koze dan zot reaksyon lo sa bidze.

«Mon kontan ki bann manm lo toulede kote latab zot in vreman proaktiv e zot in koz fran lo plizyer size,» Msye Pillay ti dir.

I ti fer resorti ki konman Spiker i tre fyer ki bann manm in eksprim zot libreman e dan en fason fran e ki lo toulede kote latab zot in koz en sel lavwa pour demann gouvernman dan en fason for pour azir vitman lo plizyer size ki konsern e tous nou dimoun o profon parey mank sekirite fas a sa sitiasyon kot vol avek vyolans pe ogmante, problenm drog, lapovrete, nesesite pour konmans sa prosesis taks progresiv an Zanvye letan ki pou annan logmantasyon dan pri tiket bis olye esper Zilyet, nesesite pour gouvernman pran son responsabilite e fer labank ki i annan par ladan fer desann lentere lo lòn o pli vit posib, nesesite pour annan plis mezir konkret pour fer desann pri komodite ki ava an retour fer desann pri lavi, parmi lezot pwen ankor.  

Antretan Spiker Pillay in osi lans lapel avek bann minister, departman, lazans ek lezot antite ki ekspekte vin devan lasanble pour prepar zot byen pour fer ki bann diskisyon e enteraksyon i al byen e vit.

 

 

 

 

 

Send your comment :

Name *

Email *

Comment *