Lasanble i koup bidze Departman Lenformasyon par R2 milyon, aprouv pour DICT ek Departman Lekonomi Ble |11 November 2017

Departman Lenformasyon ki tonb anba biro Vis-Prezidan Vincent Meriton in ganny son bidze pour lannen prosenn koupe par R2 milyon apre ki Lasanble pa’n aprouv sa logmantasyon ki i ti pe demande pour met anplas en biro lenformasyon pour piblik e anploy trwa staf anplis ki sa nef ki i deza annan.

Sa R2 milyon ti anplis lo son bidze lannen pase ki ti R3,678 milyon.

Letan i ti propoze pour koup bidze sa departman e kit li avek son bidze parey lannen pase dirizan lopozisyon Msye Wavel Ramkalawan ti dir ki sa departman i bezwen al revwar  son travay akoz bokou keksoz relye avek diseminasyon lenformasyon gouvernman i pa pe fer.

Antretan de lezot departman ki osi tonb anba biro Vis-Prezidan -- e sa se Departman Lenformasyon Kominikasyon ek Teknolozi (Department of Information Communications and Technology) DICT ki ti’n demann R59,892 milyon ek Departman Lekonomi Ble ki ti’n demann R33,632 milyon -- zot, zot bidze in ganny laprouvasyon Lasanble.

Vis-Prezidan Meriton ek sekreter prensipal ki reprezant tou sa bann departman ti vin dan Lasanble pour reponn kestyon e zistifye zot bidze yer toudswit apre ki Minis Finans, Komers ek Planifikasyon Ekonomik Dr Peter Larose ti’n fini klarifye bann pwen souleve par bann manm dan zot reaksyon lo bidze.

Ti sekreter prensipal Departman Lenformasyon Msye Denis Rose ki ti reponn lamazorite bann kestyon e donn klarifikasyon bann mann lo sa departman. 

Manm elekte pour Anse Etoile, Ahmed Afif, ti anvi sa departman i zistifye zot bidze osi byen ki sa gro logmantasyon e i ti osi anvi konnen si manda sa departman i ankor valid dan konteks fason lenformasyon i transmet ozordi.

I ti anvi konnen lekel bann dimoun ki travay dan sa departman e ki zot fer an term donn pei e popilasyon lenformasyon vi ki i annan ozordi plizyer sours lenformasyon.

Dan son larepons PS Rose ti eksplike ki sa departman i konsernen avek donn lenformasyon gouvernman sirtou dan sa klima aktyel kot lanfaz i lo latransparans, bonn gouvernans ek rann kont, donn lenformasyon dimoun lo travay gouvernman i tre enportan.

I ti fer resorti ki sa departman ti ganny kree an Novanm lannen pase e i annan keksoz ki sa departman i ankor pe fer e pa ankor konplete.

“Gouvernman i annan en responsabilite pour fer konnen ki i pe fer atraver son bann diferan minister, lazans … e sa bann keksoz pa kapab ganny fer an dezord e sa departman i konman en lyezon ant sa bann minister pour fer sir lenformasyon ki piblik i gannyen i korek e byen ankadre ki mannyer gouvernman i sipoze donn sa lenformasyon. Menm si i vre sak minister i annan son bann dimoun ki donn lenformasyon me sa kordinasyon i ganny fer par Departman Lenformasyon,” PS Rose ti eksplike.

I ti osi fer resorti ki sa logmantasyon dan bidze sa departman pe al ver en proze spesyal ki zot pe propoze akoz gouvernman i santi avek fason demokrasi pe ale e fason dimoun i bezwen ganny lenformasyon lo gouvernman ki mannyer i fonksyonnen, son bann plan pour devlopman, nou pe propoze annan en Public Information Centre parey i annan dan plizyer pei e kot tou lenformasyon gouvernman i ava ganny mete pour konsiltasyon par manm piblik ki napa akse avek konpiter oubyen ki pa familye avek rod lenformasyon elektronikman, sa sant ava vin en landrwa kot nenport dimoun ava kapab ale pour ganny led ek lenformasyon ki zot bezwen. Laba ava annan bann white papers e tou bann rapor lo diferan progranm gouvernman e dimoun ava kapab ganny dirize lot kwa ki zot devret fer e kot pour ale pour ganny serten leksplikasyon ki pour lemoman zot bezwen al lo sit web sa bann minister oubyen al on-line me sa biro pou donn piblik en landrwa pour asize pour konsilte bann dokiman avek bi ogmant partisipasyon piblik dan bann progranm gouvernman ek devlopman ki i anvi fer. 

PS Rose i dir sa ava redwir lakantite kestyon ki ganny demande akoz lenformasyon ava disponib fizikman.

I ti azoute ki sa proze pe ganny propoze osi an prenan kont ki byento pou annan sa lalwa drwa a lenformasyon ki ekspekte pase e sa ava en mwayen pour donn dimoun akse avek lenformasyon dan en fason fizik dan en landrwa piblik.

Msye Afif pa ti konvenki par sa larepons e i ti ensiste ki i pa vwar nesesite en tel proze me PS Rose ti ensiste li osi ki lo pwennvi gouvernman i annan nesesite pour annan en tel biro akoz bokou dimoun i konsilte gouvernman pour demann lenformasyon ki Lasanble pa okouran e ki i annan en laswaf pour dimoun ganny bann tel lenformasyon.

I ti osi fer resorti ki menm si bann minister i annan sa bann lenformasyon nou konn tre byen difikilte ki annan pour nenport manm piblik ki anvi ganny akse avek sa bann lenformasyon ki zot bezwen ler zot anvi e sa biro pou fasilit sa pour zot.

I ti dir ki pour lemoman sa departman i anploy nef (9) dimoun enkli bann staf sipor me i ekspekte anploy trwa lezot dimoun pour travay spesifikman avek sa biro ki i anvi etabli.

Plizyer lezot manm ki ti pran laparol lo sa size pa ti konvenki par sa bann leksplikasyon e manm elekte pour Mont Buxton, Msye Gervais Henrie, ti dir ki sa biro i devret fermen e sev gouvernman apepre 2 a 3 milyon roupi e redeploy bann staf.

I ti donn plizyer rezon akoz e parmi i dir depi i egziste sa departman pa ankor kapab met anplas dan servis piblik bann lofis zofisye kominikasyon pour permet transmet byen lenformasyon gouvernman e fer ki a lonterm pa ti pou bezwen annan sa departman.

I ti  azoute ki sa departman i depans en gro sonm lo consultancy kan sa departman i annan special advisors ki ti kapab fer sa travay.

PS Rose ti fer resorti ki travay special advisors napa nanryen pour fer avek travay consultancy e i ti fer resorti ki sa bann dimoun ki travay dan sa departman i bann profesyonnel ki ti deza travay dan gouvernman oparavan e zot lapey i lo en serten nivo e zot bezwen ganny peye dan en fason rezonnab.

Ti annan bokou lezot deba lo sa size e bann manm ti ensiste ki zot pa konvenki lo travay sa departman e bidze ki i pe demande me PS Rose ti eksplike ki i pa neseserman ki tou dimoun i konpran e swiv travay sa departman oubyen zot pe tant pou oubliye e i ti fer resorti ki sa departman i osi annan manda pour ed lezot lazans konsernen avek lenformasyon, aranz, poli zot lezislasyon e anmenn bann lamannman devan Lasanble.

I dir sa lannen zot in fer bokou konsiltasyon lo lalwa a drwa lenformasyon, konsiltasyon e travay lo Lalwa SBC, Lalwa NISA parmi lezot ankor e tousala in pran bokou letan e zot annan plizyer lezot travay ankor ki petet pa neseserman kler e ki zot pa kapab fer tou sa kantite travay dan en lannen.

Lo son kote manm elekte pour Mont Fleuri Msye Jean François Ferrari ti dir ki annan en tel biro lenformasyon piblik i kapab servi enpe lespas dan biro Mer Lavil  e sa ava permet gouvernman fer en lekonomi R2 milyon e i ti eksprim lapresyasyon pour travay ki i pe fer lo Lalwa Drwa a Lenformasyon me li osi byen ki dirizan zafer gouvernman Msye Charles de Commarmond ti propoze ki tou sa bann lazans ki donn lenformasyon parey NISA, SNA zot vin ansanm.

Me PS Rose ti eksplike ki Departman Lenformasyonsa ki i fer i diferan avek sa ki en zournal i pibliye e sa ki SNA i fer sorti.

Me apre tou sa bann deba sa departman ti vwar Lasanble koup son bidze.

Lendi Lasanble pou kontinyen depouy bidze bann lezot departman ki tonb anba Biro Vis- Prezidan e sa se Departman Lenvestisman, Bord Lenvestisman Sesel, Lenstiti Nasyonal Lasyans Teknolozi ek Linovasyon.