Parti lopozisyon dan Lasanble i siport demars pour lev iminite Msye Ferrari


14-November-2017

Dirizan lopozisyon dan Lasanble in yer deklar sipor LDS (Linyon Demokrtaik Seselwa) dan demars pour Lasanble Nasyonal lev iminite parlmanter manm elekte pour Mont Fleuri Msye Jean François Ferrari pour permet li reponn prosekisyon ki ansyen Prezidan James Michel in dir i pou anmennen kont li.

Sa ti vin apre ki Spiker Lasanble Nasyonal, Msye Patrick Pillay ti fer resorti ki ti annan de let, enn sorti kot Sef Ziz Mathilda Towmey e lot kot ansyen Prezidan James Michel, ki in ganny ekzize pour lir devan lasanble e devan medya.

Sa de let ti fer referans avek komanter ki Onorab Jean François Ferrari ti fer dan son lentervansyon le 9 Novanm e ki ti al konm swivi : «Lo kote zidisyer sa i pli gran katastrof, repitasyon sa lebra enportan gouvernman in degrade akoz bann pratik malisye ek bann lazandan personnel sa ki ansarz, ankouraze par Msye James Michel ek son group dezespere pour protez son byen mal aki e anpes prosekisyon. Repitasyon Sef Ziz i dan labou akoz bann pratik ilegal. Nou’n trouve kot i pe kas anba Prezidan Larepiblik me i paret ki bann lotorite i per met lord dan sa lenstitisyon».

Let sorti kot Sef Ziz Towmey ti dir ki sa komanter ti defamatwar e enflamatwar e ki brans zidisyer i pa en katastrof me okontrer pe mars konm i devret.

I ti dir ki Msye Ferrari in kas standing order 54 (1) lo konteni diskour ki dir ki en manm lasanble i devret koz spesifikman lo size amen e pa entrodwir lenformasyon ki pa relevan.

I ti azoute ki sa remark i osi al kont standing order 54 (5) ki sit ki en manm pa devret fer referans avek kondwit en prezidan, vis prezidan, ziz ekstera omwen ki sa i ganny fer dan en mosyon.

Let ti termin avek demann ki Onorab Ferrari i devret demann Sef Ziz en leskiz e retract son lakizasyon.

Dezyenm let sorti kot Msye Michel ti en pe pli ferm e ti dir ki si Onorab Ferrari pa ti annan rekour a son privilez parlmanter sa alegasyon ti kapab annan «represay legal de lapar son bann viktim.» (Bann lekter i ganny envite pour lir let konplet Msye Michel dan nou edisyon Sanmdi le 11 Novanm ouswa lo nou sitweb).

Lo son par Onorob Ferrari ti reponn ki i pa pou demann lekskiz pour okenn keksoz ki in dir e in menm azoute ki i pare pour lev son liminite pour ki Msye Michel i kapab pourswiv li si i swete.

Tandis ki pour let Sef Ziz Towmey i ti dir ki i pa pou reponn akoz bord lapwentman konstitisyonel in deza konmans en prosedir ki enkli sef ziz.

Onorob Wavel Ramkalawan ti anmenn son sipor pour son koleg e in fer resorti ki lopozisyon i siport Msye Ferrari e ki li personnelman i pou anmenn en mosyon pou fer ki son iminite i leve e in demande ki Msye Michel i vin devan e fayle son ka.

 

 

 

 

 

Send your comment :

Name *

Email *

Comment *