Lasanble i aprouv bidze en minister e plizyer departman |18 November 2017

Bidze R57.8m pour Departman Lanplwa, Limigrasyon ek Leta Sivil, R49.381m pour Minister Tourizm, Laviasyon Sivil, Por ek Lamarin, R20m pour SMSA i osi pase me R240 mil i ganny bloke dan R142.462m pour STB.

Ti dan son bann deliberasyon yer ki Lasanble Nasyonal ti aprouv sa bann alokasyon bidze.

Dan sa R49.381m pour Minister Tourizm, Laviasyon Sivil, Por ek Lamarin  ladan i enkli en bout pour Departman Tourizm e en lot bout pour Lakademi Tourizm (STA).

En bidze R20 m pour Ladministrasyon Sekirite Maritim Sesel (SMSA) ki tonb anba sa menm minister ti osi aprouve me R240 mil dan sa sonm R142.462m pour Bord Tourizm Sesel (STB), ki osi anba parasol sa minister, in ganny bloke akoz sa sonm I konsern en kontra kominikasyon ek marketing ki pe fer par ansyen minis tourizm Msye Alain St Ange ki pe ganny peye R20 mil par mwan.

Swivan bann lenformasyon ek klarifikasyon ki sef egzekitiv Bord Tourizm Madanm Sherin Francis ti’n devwale lo sa size, dirizan lopozisyon Msye Wavel Ramkalawan ti dekri sa konman “en nen e en faver spesifik pour en endividi”.

I ti azoute ki si STB i bezwen sa kontra i neseser ki i swiv tou prosedir normal e transparan ki a fer ki sa endividi ki pli meyer a reisi. Alor i ti demande ki sa sonm R 240 mil i ganny bloke ziska prosedir normal e transparan i konplete.

Konsernan larestan bidze pour STB, ti annan plizyer lezot kestyon ek klarifikasyon ki ti leve lo plizyer laspe parey en sonm R106m ki Madanm Francis i dir i kou pour pey lokasyon lakaz pour bann staf STB ki baze aletranze.

En lot sonm ki ti lev kestyon ti R3.2m ki kou pour tiket avyon pour bann zournalis etranze ki vin isi e kestyon ti si i rantab pour kontinyen peye pour sa bann zournalis ale vini isi akoz dan bokou ka zot tre aze.

Madanm Francis ti fer resorti ki stratezi STB se pour reste vizib dan lapres aletranze akoz sa i tre enportan.

I ti fer resorti ki menm si i annan lezot mwayen fer piblisite sa enn i reste osi popiler pour donn lenformasyon bann viziter potansyel dan lapres ekri aletranze.

Ti osi annan demann ki STB i fer plis pour koup depans an sa ki konsern enprim son bann materyo piblisite e donn enpe sa bann kontra avek lakonpannyen lokal.

Lo sa pwen Madanm Francis ti dir ki STB in deza pe vwar kalite travay bann lakonpannyen lokal pour deside si zot pou ganny kontra avek STB.

An sa ki konsern bann pwen ki ti leve lo bidze Minister Tourizm ek Laviasyon Sivil, Por ek Lamarin ti annan plizyer e parmi ti konsern klarifikasyon lo provizyon pour adres mank mendev dan diferan sekter sa minister osi byen ki nesesite pour adres konsern bann travayer lo por.

Manm elekte pour Mont Fleuri Msye Jean-François Ferrari ti fer resorti ki 31 travayer por ti’n remet en petisyon avek li dan ki zot pe eksprim konsern lo menas ki zot dir zot pe gannyen avek zot anplwayer e zot kondisyon travay ek lezot konsern ki pa pe ganny ekoute.

Minis Loustau-Lalanne ti dir i pa’n ganny kopi sa petisyon me i dir ki i annan fason pour adres bann tel problenm dan landrwa travay me ki in osi fer resorti ki travayer i annan plizyer rekour ki zot kapab rode e zot pa kapab anpes sa. Me Minis Loustau-lalanne in demann bann responsab dan sa bann landrwa travay konsernen pour vin pli atantiv a konsern zot travayer.

Lo kote SMSA ti osi annan plizyer pwen pour klarifikasyon ki bann manm ti demande e ki son direkter zeneral, Kaptenn Joachim Valmont, ti reponn. Sa ti enkli kou lokasyon kot zot lofis in bouze dan Trinity House, nesesite pour SMSA  vin pli otosifizan finansyerman atraver bann reveni ki i ranmase avek bann yot sirtou kot Eden Island e osi bann servis boat charter.

Minis Loustau-Lalanne osi byen ki Msye Valmont in fer resorti ki demars pe fer pour armoniz e ranforsi lalwa lo sa bann size e sa atraver en kad legal.

Bann lezot laspe parey regilasyon pour kontrol jet ski ki bann manm i dir pa pe ganny ranforsi, Msye Valmont ti enform Lasanble ki byento, avan lafen lannen en prozedlwa ki pou adres tou sa bann laspe pou vin devan Lasanble.

En lot konsern pertinan ki manm elekte pour Les Mamelles Bernard Georges ti fer resorti i sekirite ek sovtaz dan ka aksidan bato kot i dir in annan bann lanmor resaman.

I ti demande ki provizyon i fer pour annan ase bato sovtaz dan bann distrik.

Msye Valmont ti fer resorti ki SMSA i zis kordin sa bann aksyon me ki bidze ek bann linisyativ i tonb anba Gard Lakot Sesel.

Bidze Departman Lanplwa, Limigrasyon ek Leta Sivil ti dernyen ki ti ganny debat dan sesyon yer e avan sa laprouvasyon ti annan plizyer kestyon ki Minis Myriam Telemaque, son sekreter prensipal pour lanplwa Jules Baker parmi bann lezot  zofisye ti reponn. Parmi ti annan pour fer avek rekritman lenspekter lanplwa, rekritman travayer etranze, leklersisman dan peyman GOP, parmi lezot.

PS Baker ti eksplike ki zot pe fer demars pour revwar konsep lanplwa travayer etranze pour met lord ek standar dan sa prosesis ki i dir i annan aktyelman bokou defayans ladan.

Deba lo bidze i kontinyen dan Lasanble Lendi.