Prezidan Faure i vizit kordgard ek stasyon tenny dife lo Praslin |18 November 2017

Prezidan Danny Faure ti yer vizit kordgard Grand Anse ek Baie Ste Anne Prasloin ensi ki stasyon tenny dife lo zil Eve.

Pour akonpanny li lo sa vizit ti Minis pour Zafer Entern Macsuzy Mondon, Prokirer Zeneral Frank Ally, Komisyonner Lapolis Kishnan Labonte, son depite Romano Songor ek lezot zofisye konsernen.

Vizit ti konmans kot kordgard Grand Anse. Menm si i pa ankor ofisyelman ouver son laport, kordgard Grand Anse in deza bouz dan zot nouvo batiman ki sitie dan menm plas ki ansyen kordgard.

Pour gid prezidan, ti James Matombe, zofisye responsab pour Praslin.

Nouvo kordgard i konpri bann diferan lofis, barak ek kaso pour deteni. Komisyonner Labonte ti mansyonnen ki i neseser pour fer serten lamandman striktirel avek sa nouvo kordgard pour asir sekirite bann gard ek lezot travayer.

Prezidan Faure ti fer resorti ki i meyer ki tou sa bann travay i konplete avan son louvertir ofisyel.

Komisyonner Labonte i ekspekte ki sa i ava boner lannen prosenn.

Answit, delegasyon prezidansyel ti diriz kot kordgard Baie Ste Anne, enn bann pli vye kordgard nasyonalman, ki aprezan ganny servi konman en ‘reporting station’ selman. Diskisyon pou kontinyen pour deside si sa stasyon pou ganny repare ou rekonstrir konpletman pour vin en stasyon an operasyon konplet avek tou bann servis neseser.

Joachim Marie, zofisye responsab pour stasyon tenny dife lo Praslin ti diriz sa delegasyon lo en vizit sa stasyon ki ti ouver 2-an pase. Avek en trantenn travayer sorti lo Praslin ek Mahé, sa stasyon i konpri  en batiman pour bann lofis ek lasal administrativ ensi ki en batiman separe akote pour akomodasyon bann travayer, avek 24 lasanm endividyel. Parmi bann konstrent ki zot fer fas avek se en mank vantilasyon, e sa i anvizaze ganny remedye lannen prosenn.

Prezidan Faure ti profite pour mansyonnen ki i pe fer en propozisyon ki lecture room sa stasyon i ganny servi par bann lezot lazans ek departman gouvernman pour bann miting, an fezan en kontribisyon anver sa stasyon. Sa i ava ed gouvernman pour koup lo bann depans ki bann minister ou lorganizasyon gouvernmantal i fer ler zot lwe bann tel lasal dan bann lenstitisyon prive parey dan bann lotel.

Vizit ti termin par en rankont avek bann o zofisye sa delegasyon kot zot ti ganny sans diskit pli an detay lo fonksyonnman servis lapolis lo Praslin.

«Dabor nou remersye Prezidan Faure pour son vizit pour vwar nou bann lenfrastriktir ek serten bann defi ki lafors lapolis i fer fas avek lo Praslin. I’n donn nou son langazman ki stasyon Baie Ste Anne i vin en stasyon an operasyon konplet pour ed nou reponn sa bezwen pour konbat krim pli byen lo Praslin. Nou’n osi ganny serten gidans legal avek Prokirer Zeneral lo konman pour vin pli efikas,»  depite komisyonner Romano Songor ti partaze apre sa rankont.

Bann portre ki swiv i montre Prezidan Faure pandan son vizit Praslin yer.

Teks par Nadia Bedier

Portre par Romano Laurence