Lasanble i aprouv bidze Minister Lagrikiltir ek Lapes |22 November 2017
Lasanble Nasyonal in aprouv bidze R32 milyon 925.69 mil pour Minister Lagrikiltir ek Lapes dan son sesyon depouy bidze yer.
Bann manm lasanble ti osi donn laprouvasyon pour bidze trwa lazans ki tonm anba responsabilite sa minister, notaman lazans lagrikiltir (SAA), lazans responsab pour lendistri lapes (SFA) ek lazans nasyonal pour biosekirite (NBA).
Se Minis Pamela Charlette ek son sekreter prensipal pour lapes Michel Nalletamby ki ti prezan pandan ki lasanble ti deliber lo bidze sa minister.
En size pertinan ki ti leve par Onorab Ahmed Afif ti lo lwaye (rent) R3.7 milyon ki sa minister pe pey fon pansyon tou le lannen, e ki Msye Afif ti deklar konman eksesiv.
Msye Nalletamby ti reponn ki son minister i osi vwar ki sa sonm ki zot pe peye konman lokater i tro bokou.
Pour adres sa konsern sekreter prensipal pour Finans, Patrick Payet, ti fer resorti ki priyorite Minister Finans pandan 2018 i pour lans tender pour ki Minister Lagrikiltir ek Lapes i ganny son prop batiman.
Lider zafer gouvernman, Charles de Commarmond, ti osi rekonmande ki Minister Finans i revwar tou lwaye ki bann minister ek lazans piblik pe peye pour ki i annan en rediksyon konsiderab dan depans gouvernman.
Gervais Henrie, manm elekte pour distrik Mont Buxton, ti apre demann sa minister ki i pe fer pour ankouraz bann zenn pour pran la relev dan sekter lagrikilitir ek lapes, e osi ki i pe fer pour ankouraz soutyen finansyer e teknik pour bann fermye.
Msye Nalletamby ti dir ki minister i fer son mye pour solisit finansman ek sipor sorti kot son bann partner bilateral. An se ki konsern bann zenn i ti azoute ki minister i annan kolaborasyon ant lekol lagrikiltir ek lekol maritim pour ed zot form bann etidyan kalib.
Apre ki bidze sa minister ti ganny aprouve lasanble ti pran bidze pour SAA, SFA ek NBA.
Sef egzekitif NBA, Marc Naiken, ti prezan pour defann alokasyon R20 milyon 735.49 mil pour son lorganizasyon.
Waven William ti eksprim son konsern ki i pa ti pe vwar okenn konponan pour kontrol e detrir senir plim dan pei.
Leksplikasyon Msye Naiken ti konm swivi:“Dan bidze i annan en konponan pour kontrol ek sirveyans, alors okenn larzan ki nou demande pou osi enkli lalit kont senir plim.”
I ti azoute ki NBA in finalman kapab idantifye sa lespes senir e zot pe travay an kolaborasyon avek lorganizasyon enternasyonal pour manze ek lagrikiltir (FAO) pour kre en stratezi lon-term pour retir li dan nou biodiversite.
Minis Charlette ti osi met lasanble okouran ki departman ladministrasyon in aprouv transfer servis veteriner anba responsabilite SAA pour al anba NBA e alors alokasyon pour sa servis pou osi ganny transfer kot NBA byento.
SFA, ki ti demann R286.2 milyon, ti ganny reprezante par sef egzekitif Ronny Renaud ki ti ganny demande pour zistifye R6 milyon asosye avek proze mariculture.
Me menm avek leksplikasyon adisyonnel sorti kot Minis Charlette lo fezabilite sa proze pilot mariculture, pa tou manm ki ti konvenki.
Alors desizyon ti ganny pran pour retenir ouswa freeze sa larzan ziska ki SFA i retourn dan lasanble pour fer prezantasyon pour demontre konteni plan mariculture, e eksplik bann letap ensi ki bann finansman neseser.
Toudmen lazans ki ti pli ganny kestyonnen ti SAA reprezante par son sef egzekitif Finley Racombo.
Later lagrikiltir ensi ki batiman SAA pe lwe avek Islands Development Company (IDC) ti de ant bann size tre kontroversyel ki Spiker Patrick Pillay ti demann Minis Charlette ek son lantouraz pour fer lenvestigasyon ladan.
Labatwar Le Rocher osi ti ganny aborde e lider lopozisyon Wavel Ramkalawan ti eksprim son mekontantman ki lokater kot sa labatwar pe ganny en sibvansyon R200 mil alors ki i pa ni pe get dan welfare bann fermye.
Msye de Commarmond ti partaz menm lopinyon avek son koleg, e i ti menm azoute ki minister lagrikiltir i devret repran sa labatwar.
Labatwar gouvernman lo Praslin ki ti ganny vann e privatize ti osi form parti sa deba e la ankor Spiker ti demann lazans konsernen pour fer lenvestigasyon pli profon.