Ledikasyon Konsonmater - Servis apre lavant |23 November 2017

NATCOF i ankor pe sansibiliz bann konsonmater lo zot drwa ek devwar me malerezman i ankor annan bokou ki pe kontinyelman pa pran zot responsabilite.  

Ki garanti en konsonmater i annan letan i aste en prodwi/lekipman?

I enportan pour konsonmater konpran klerman kisisa en garanti letan i pe depans son larzan. En garanti i vedir ki sa prodwi in ganny fabrike lo en standar ki fer son fonksyon pour en serten kantite letan. I annan ki son dirasyon i pli kourt e lezot ki annan en dire pli long depandan lo son kapasite. An konsekans, sa i fer en diferans dan pri. Alor dan sa ka ler konsonmater pe aste sa bann prodwi nou devret konnen e ganny eksplike par vander lo sa size kapasite ek standar sa prodwi oubyen servi enternet e fer resers oubyen demann lenformasyon avek dimoun ki konpetan dan sa domenn.

I enportan pour annan en bon garanti. Sa i asir nou ki sa prodwi ki nou’n aste i enn ki bon kalite e si okenn keksoz i mal fonksyonen pandan sa peryod letan, sa marsan oubyen lakonpannyen pou pran responsabilite pour rektifye dapre kondisyon lo son garanti. Dapre lalwa proteksyon konsonmater, «si i annan en problenm avek en prodwi, sa kliyan i kapab pandan sa peryod letan sis mwan apre ki in aste sa prodwi retourn avek kot sa marsan san ki i ganny penalize. I osi dir ki i responsabilite sa marsan pour rann sa konsonmater son larzan ki in depanse pour servi, enstale oubyen delivre sa prodwi. Par kont sa marsan i osi kapab pandan sa peryod letan repar sa prodwi oubyen donn sa kliyan en lot prodwi.»

Eski sa garanti sis mwan i normal ?

Mon aste en fan ki kout R750 ek en set lanmizik ki kout R15,000. An retour mon ganny en garanti sis mwan pour tou le de prodwi ki mon’n aste. Eski sa i FAIR ?

Eski sa lalwa pa i devret pe protez pli byen konsonmater ?

Alor konman konsonmater nou bezwen pran nou responsabilite e lir byen bann not garanti pour konnen ki sa garanti pe ofer nou. Si nou pa konpran, demann kestyon oubyen rod plis lenformasyon. Fer sir nou konnen ki sa magazen pe ofer nou si i annan en problenm e nou bezwen asire ki sa dokiman i reste an bon kondisyon. I egalman enportan pour nou lir sa bann lenformasyon ek gidans ki’n donnen dan manual (dokiman ki eksplik fonksyon en lekipman) pour asire ki nou servi sa lekipman korekteman e evit okenn mal fonksyonnman.

Par kont, i annan lenstans kot marsan i verbalman dir konsonmater bann kondisyon pour garanti san ki zot donn okenn dokiman. Dan sa ka koumsa i konseyab pour pa aste sa prodwi. Sa i akoz si i ariv okenn problenm avek sa prodwi e nou retoun avek, sa marsan i kapab refize pour asiste nou vi ki napa okenn laprev sa konversasyon ki ti deroule sa zour.

Eski sa bann marsan pa i devret ganny gide lo ki mannyer zot annan en devwar anver konsonmater e ki mannyer obligatwarman zot devret pe fer zot biznes anba zot laysenns ?

An konklizyon, i bon note ki i antyerman nou responsabilite konman konsonmater pour fer bann bon swa e egzize ki nou ganny bann servis de kalite osi byen ki valer pour nou larzan.

KONSONMATER FER TANDE OU LAVWA !

En kontribisyon NATCOF