Solda i fer netwayaz kot rezidans dimoun aze Union Vale |23 November 2017

En dizenn manm Lafors Defans Pep Sesel (SPDF) sorti kot baz naval gard lakot ti fer en louvraz koupayaz ek netwayaz yer kot lakour bann dimoun aze Union Vale. Zis bann louvraz andeor ki ti ganny fer e pa bann louvraz lo sa batiman.

Sa bann solda ti koupay e retir bann plant ek lalyann anvaisan, tel ki bann pye kasi, fatak ek pti toupi.

Zot ti osi netway obor semen kot larantre kot zot ti netway en touf bannann e  koup bann gran zerb. Sa ti donn en bon lekleraz otour sa rezidans.

Dan lakour sa rezidans, bann pye dibwa ti ganny debranse pour osi donn enpe plis lekleraz. Rato ek blower ti ganny servi pour fini sa travay.

Staf Serzan Rafael Dodin ti dir ki zot ti pe fer sa louvraz saritab alokazyon Lazournen Lafors Defans. 

«Toulezan alokazyon Lazournen Lafors Defans, SPDF i swazir bann landrwa pour fer sa bann louvraz netwayaz e sa landrwa in ganny swazir ozordi e nou pe met li enpe dan kler,» i ti dir.

Selma Lewis ki ansarz sa rezidans ti dir ki zot byen apresye ler bann solda ek lezot dimoun dan lakominote i vin ed zot fer sa bann kalite louvraz akoz zot napa dimoun pour fer li e ki sa bann feyaz i bar vizyon sa rezidans. 

«Nou ganny bann problenm bandisite par ler tel ki vol e la nou a kapab vwar kler, byen lwen deor bann dimoun ki pe pase e sa ki pe vin kot nou,» i ti dir.

I ti azoute ki zot in bezwen konmans bar sa rezidans avek blok par deryer pour anpes dimoun antre.

Bann solda pandan netwayaz yer kot rezidans dimoun aze Union Vale